ପୁରୀ : ବର୍ଷର ପ୍ରଥମ ଦିନ ଅର୍ଥାତ ବୁଧବାର ଶ୍ରୀମନ୍ଦିର ହୁଣ୍ଡିରୁ ୧୦ଲକ୍ଷ ୯୪ହଜାର ୭୪ଟଙ୍କା ଦାନସୂତ୍ରରେ ମିଳିଛି। ଗତ ବର୍ଷ ଅକ୍ଟୋବର ୮ରେ ଶ୍ରୀମନ୍ଦିର ହୁଣ୍ଡିରୁ ଶ୍ରଦ୍ଧାଳୁଙ୍କ ପକ୍ଷରୁ ସର୍ବାଧିକ ୯ଲକ୍ଷ ୬୬ହଜାର ୪୮୦ଟଙ୍କା ଦାନ ସୂତ୍ରରେ ମିଳିଥିଲା। ସେହିଭଳି ଗତ ବର୍ଷ କାର୍ତ୍ତିକ ମାସ ୨୨ଦିନ ମଧ୍ୟରେ ୧କୋଟି ୧୨ଲକ୍ଷ ୭୧ହଜାର ୩୦୭ଟଙ୍କା ଦାନ ସୂତ୍ରରେ ଶ୍ରୀମନ୍ଦିର ହୁଣ୍ଡିରୁ ମିଳିଥିଲା। ୨୦୨୧ରୁ ୨୦୨୪ ମଧ୍ୟରେ ହୁଣ୍ଡି ସମେତ ବିଭିନ୍ନ ସୂତ୍ରରୁ ୧ଶହ ୧୩କୋଟି ୨ଲକ୍ଷ ୫୫ହଜାର ୮୮୯ ଟଙ୍କା ଶ୍ରୀମନ୍ଦିର ପ୍ରଶାସନକୁ ମିଳିଛି। ୨୦୨୧-୨୨ରେ ଶ୍ରୀଜଗନ୍ନାଥଙ୍କ ହୁଣ୍ଡିକୁ ୮କୋଟି ୨୩ଲକ୍ଷ ୧୩ହଜାର ୧୨୭ଟଙ୍କା ମିଳିଥିବା ବେଳେ ୨୦୨୨-୨୩ରେ ୧୫କୋଟି ୪୬ଲକ୍ଷ ୧୭ହଜାର ୧୫୨ ଏବଂ ୨୦୨୩-୨୪ରେ ୧୬କୋଟି ୯୨ଲକ୍ଷ ୩୬ହଜାର ୯୭୪ ଟଙ୍କା ମିଳିଥିଲା। ସେହିପରି ବ୍ୟାଙ୍କ ଆକାଉଣ୍ଟ ଜରିଆରେ ଶ୍ରୀଜଗନ୍ନାଥ ମନ୍ଦିରକୁ ୨୦୨୧-୨୨ରେ ୬କୋଟି ୮୩ଲକ୍ଷ ୩୧ହଜାର ୯୬୧ଟଙ୍କା ମିଳିଥିବା ବେଳେ ୨୦୨୨-୨୩ରେ ୩୦କୋଟି ୭୨ଲକ୍ଷ ୨୭ହଜାର ୨୧୬ଟଙ୍କା ମିଳିଥିଲା। ବର୍ଷ ୨୦୨୩-୨୪ରେ ୨୨କୋଟି୨୪ଲକ୍ଷ ୩୯ହଜାର ୯୧୮ଟଙ୍କା ମିଳିଛି। ଅନ୍ୟାନ୍ୟ ସୂତ୍ରରୁ ମହାପ୍ରଭୁଙ୍କୁ ୨୦୨୧-୨୨ରେ ୨କୋଟି ୨୫ଲକ୍ଷ ୪୯୬ଟଙ୍କା ମିଳିଥିବା ବେଳେ ୨୦୨୨-୨୩ରେ ୪କୋଟି ୬୨ଲକ୍ଷ ୩୪୩ଟଙ୍କା ଏବଂ ୨୦୨୩-୨୪ରେ ୫କୋଟି ୭୩ଲକ୍ଷ ୫୬ହଜାର ୭୦୧ଟଙ୍କା ମିଳିଥିବା ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ମିଳିଛି।
ଅନ୍ୟପକ୍ଷରେ ଶ୍ରୀମନ୍ଦିର ବାହାରେ ଏବଂ ଭିତରେ ବିଭିନ୍ନ ସ୍ଥାନରେ ବେଆଇନ ଭାବେ ଥାଳି ରଖାଯାଉଛି। ଯାହାକୁ ୨୦୧୯ ମସିହାରେ ସର୍ବୋଚ୍ଚ ଅଦାଲତ ବେଆଇନ ଦର୍ଶାଇ ତୁରନ୍ତ ଥାଳି ଏବଂ ଗରା ଉଠାଇ ଦେବାକୁ ନିର୍ଦେଶ ଦେଇସାରିଛନ୍ତି। ନୂଆ ଦର୍ଶନ ବ୍ୟବସ୍ଥା ଲାଗୁ ହେବା ପରେ ଶ୍ରୀମନ୍ଦିରର ବିଭିନ୍ନ ସ୍ଥାନରେ ଥାଳି ଉଠାଯାଇ ହୁଣ୍ଡି ସ୍ଥାପନ କରାଯିବ। ଶ୍ରୀମନ୍ଦିରର କେଉଁ ସ୍ଥାନରେ ହୁଣ୍ଡି ସ୍ଥାପନ କରାଯିବ, ସେନେଇ ପରିଚାଳନା କମିଟି ଏବଂ ଛତିଶା ନିଯୋଗ ବୈଠକରେ ଆଲୋଚନା କରାଯାଇ ନିଷ୍ପତ୍ତି ଗ୍ରହଣ କରାଯିବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ସୂଚନା ଦେଇଛନ୍ତି।
Comments are closed.