ନୂଆଦିଲ୍ଲୀ : ପୁରୀ ବନ୍ଦ ବେଳେ ହୋଇଥିବା ହିଂସାକାଣ୍ଡ ଏବଂ ଶ୍ରୀମନ୍ଦିରରେ ପୋଲିସ କର୍ମଚାରୀ ଜୋତା ପିନ୍ଧି ପ୍ରବେଶ କରିବା ମାମଲାର ଶୁଣାଣୀ ବୁଧବାର ସୁପ୍ରିମକୋର୍ଟରେ ସ୍ଥଗିତ ରହିଛି । ଆମିକସ୍ କ୍ୟୁରି ଗୋପାଳ ସୁବ୍ରମଣ୍ୟମଙ୍କ ଅସୁସ୍ଥତା କାରଣରୁ ଶୁଣାଣୀକୁ ଘୁଞ୍ଚାଇ ଦିଆଯାଇଛି। ସୁବ୍ରମଣ୍ୟମ୍ଙ୍କ ଅନୁପସ୍ଥିତି ଯୋଗୁଁ ସୁପ୍ରିମକୋର୍ଟ ମାମଲାର ଶୁଣାଣୀ ଘୁଞ୍ଚାଇ ଦେଇଛନ୍ତି। ନଭେମ୍ବର ୩୦ରେ ପରବର୍ତ୍ତୀ ଶୁଣାଣି ପାଇଁ ଦିନ ଧାର୍ଯ୍ୟ କରାଯାଇଛି ।
ବିଚାରପତି ମଦନ ବି ଲୋକୁର, ଏସ୍ ଏ ନାଜିର ଓ ଦୀପକ ଗୁପ୍ତାଙ୍କ ଖଣ୍ଡପୀଠରେ ଶ୍ରୀମନ୍ଦିର ମାମଲାର ଶୁଣାଣି ହେବାର ଥିଲା । ତେବେ ଅସୁସ୍ଥତା ଯୋଗୁ ଶୁଣାଣି ସ୍ଥଗିତ ରଖିବାକୁ ଅମିକସ କ୍ୟୁରି ଆବେଦନ କରିଥିଲେ । ସେଥିପାଇଁ ଆଜି ଶୁଣାଣୀକୁ ଖଣ୍ଡପୀଠ ସ୍ଥଗିତ କରିଛନ୍ତି ।
ସୂଚନା ଯୋଗ୍ୟ ସମାଜସେବୀ ତଥା ଆଇନଜୀବୀ ମୃଣାଳିନୀ ପାଢ଼ୀଙ୍କ ପକ୍ଷରୁ ଦାଖଲ କରାଯାଇଥିବା ମାମଲା ଉପରେ ଚଳିତ ମାସ ୧୦ ତାରିଖରେ ଇଣ୍ଟରକଣ୍ଟିନେଣ୍ଟାଲ ଆସୋସିଏସନ ସଂସ୍ଥା ଦ୍ୱାରା ସୁପ୍ରିମକୋର୍ଟରେ ତ୍ୱରିତ ଆବେଦନ ଦାଖଲ କରାଯାଇଥିଲା । ଆବେଦନରେ ପୁରୀ ଜିଲ୍ଲା ଜଜ୍ଙ୍କ ପରାମର୍ଶ ଏବଂ ଜୁଲାଇ ୫ ତାରିଖରେ ସୁପ୍ରିମକୋର୍ଟ ଦେଇଥିବା ଆଦେଶ ଉପରେ ରହିତାଦେଶ ଜାରି କରିବା ପାଇଁ ଅନୁରୋଧ କରାଯାଇଥିଲା । ଏହି ଆବେଦନକୁ କୋର୍ଟ ଗ୍ରହଣ କରି ରାଜ୍ୟ ସରକାର ଓ ମନ୍ଦିର ପ୍ରଶାସନକୁ ଜବାବ ଦାଖଲ ପାଇଁ ନିର୍ଦ୍ଦେଶ ଦେଇଥିଲେ । ଏହାର ଜବାବରେ ସରକାରଙ୍କ ଦ୍ୱାରା ଦାଖଲ ହୋଇଥିବା ୩ ପୃଷ୍ଠାର ସତ୍ୟପାଠରେ ପୁରୀ ହିଂସାରେ ବର୍ତ୍ତମାନ ସୁଦ୍ଧା ପୋଲିସ ୯୦ରୁ ଅଧିକ ଲୋକଙ୍କୁ ଗିରଫ କରିଥିବା କୁହାଯାଇଛି। ସେହିପରି ଶ୍ରୀଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ ୧୧ ପୃଷ୍ଠାର ସତ୍ୟପାଠ ମାଧ୍ରେୟ ମଧ୍ୟ ଜବାବ ଦାଖଲ କରିଛି।
