ପୁରୀ: ରବିବାର ଏବଂ ସୋମବାର ବନ୍ଦ ଥବା ଉଚ୍ଛେଦ କାର୍ଯ୍ୟ ମଙ୍ଗଳବାର ପୁଣିଥରେ ଆରମ୍ଭ ହେବ।ଆଉ ଏଥର ପାଳି ବଡ ଆଖଡା ମଠର। ମଙ୍ଗଳବାର ମାଟିରେ ମିଶିବ ବଡ ଆଖଡା ମଠ। ସପ୍ତାହେ ଧରି ପୁରୀରେ ଚାଲିଥବା ଏହି ଉଚ୍ଛେଦ କାର୍ଯ୍ୟରେ ପ୍ରଥମେ ମେଘନାଦ ପାଚେରୀ ଚାରିପାଖରେ ଥିବା ସମସ୍ତ ଜବରଦଖଲ ଏବଂ ଯାତ୍ରୀକା ଯାତ୍ରୀ ନିବାସ ଉଚ୍ଛେଦ ହେବାପରେ ମଠ ଉଚ୍ଛେଦ କାର୍ଯ୍ୟ ଅରମ୍ଭ ହୋଇଥିଲା। ଏହି କ୍ରମରେ ପ୍ରଥମ ମଠ ଭାବରେ ମାଟିରେ ମିଶି ସାରିଛି ପ୍ରସିଦ୍ଧ ଲଙ୍ଗୁଳି ମଠ। ଏହାପରେ ଏମାର ମଠର ଉଚ୍ଛେଦ କାର୍ଯ୍ୟ ଆରମ୍ଭ କରି ଏମାର ମଠ ସଂଲଗ୍ନ ରଘୁନନ୍ଦନ ଲାଇବ୍ରେରୀର ଉଚ୍ଛେଦ କରାଯାଇଥିଲା। ଏମାର ମଠର କିଛି ଅଂଶ ଉଚ୍ଛେଦ କରାଯାଇଥିଲେ ମଧ୍ୟ ଏମାର ମଠର ମହନ୍ତ ରାଜଗୋପାଳ ରାମାନୁଜ ଦାସ ଗାଦି ନଛାଡିବାକୁ ପ୍ରଶାସନ ସଂପୂର୍ଣ୍ଣ ଉଚ୍ଛେଦ କରିପାରିନଥିଲା। ଏଣୁ ମଙ୍ଗଳବାର ଏମାର ମଠକୁ ଛାଡି ପ୍ରଶାସନ ବଡ ଆଖଡା ମଠ ଉପରେ ବୁଲଡୋଜର ଚଢାଇବ। ଏଠାରେ ସୂଚନାଯୋଗ୍ୟ ପୁରୀକୁ ବିଶ୍ୱ ଐତିହରେ ପରିଣତ କରିବା ଏବଂ ଶ୍ରୀମନ୍ଦିରର ସୁରକ୍ଷକୁ ଗୁରୁତ୍ୱ ଦେଇ ପ୍ରଶାସନ ପକ୍ଷରୁ ଶ୍ରୀମନ୍ଦିରର ପାଖରୁ ୭୫ ମିଟର ପରିଧି ମଧ୍ୟରେ ରହିଥବା ସମସ୍ତ ନିର୍ମାଣକୁ ଉଚ୍ଛେଦ ଆରମ୍ଭ ହୋଇଥିଲା।
Comments are closed.