ହସିନାଙ୍କ ପରେ ଟାର୍ଗେଟରେ ପ୍ରଧାନ ବିଚାରପତି; ସୁପ୍ରିମକୋର୍ଟ ଘେରିଲେ ଆନ୍ଦୋଳନକାରୀ

ସମାଜ ଡିଜିଟାଲ ଡେସ୍କ: ବାଂଲାଦେଶରେ ହିଂସା ଥମିବାର ନାଁ ଧରୁନାହିଁ। ସେନା ଚାପରେ ପ୍ରଧାନମନ୍ତ୍ରୀ ଶେଖ୍ ହସିନା ନିଜ ପଦରୁ ଇସ୍ତଫା ଦେଇସାରିଥିବାବେଳେ ଏବେ ଆନ୍ଦୋଳନକାରୀଙ୍କ ଟାର୍ଗେଟକୁ ଆସିଛନ୍ତି ସୁପ୍ରିମକୋର୍ଟର ପ୍ରଧାନ ବିଚାରପତି ଏବଂ ସମସ୍ତ ବିଚାରପତି। ଶନିବାର ହଜାର ହଜାର ବିକ୍ଷୋଭକାରୀ ସୁପ୍ରିମକୋର୍ଟ ଘେରାଉ କରି ପ୍ରଧାନ ବିଚାରପତି ଏବଂ ସବୁ ବିଚାରପତିଙ୍କ ଇସ୍ତଫା ଦାବି କରିଛନ୍ତି। ସମସ୍ତଙ୍କୁ ୧ ଘଣ୍ଟାର ସମୟ ଦିଆଯାଇଥିବାବେଳେ ପ୍ରଧାନ ବିଚାରପତି କୋର୍ଟ ଛାଡ଼ି ପଳାଇଥିବା ସୂଚନା ମିଳିଛି।

ତେବେ ବିକ୍ଷୋଭକାରୀ ସୁପ୍ରିମକୋର୍ଟକୁ ଟାର୍ଗେଟ କରିବା ପଛର କାରଣ ହେଉଛି ନୂଆ ଅନ୍ତରୀଣ ସରକାରର ବିନା ପରାମର୍ଶରେ ପ୍ରଧାନ ବିଚାରପତି କୋର୍ଟ ବୈଠକ ଡକାଇ ଦେଇଥିଲେ। ଏହାକୁ ନେଇ ଆନ୍ଦୋଳନକାରୀ ବିକ୍ଷୋଭ ପ୍ରଦର୍ଶନ କରିବା ସହିତ ପ୍ରଦାନ ବିଚାରପତି ମଧ୍ୟ ହସିନାଙ୍କ ସମର୍ଥନରେ ଥିବା ଅଭିଯୋଗ କରିଛନ୍ତି। ପରିସ୍ଥିତି ଉତ୍ତେଜନାପୂର୍ଣ୍ଣ ହେବାରୁ କୋର୍ଟ ବୈଠକକୁ ରଦ୍ଦ କରିଦିଆଯାଇଥିଲା। ହେଲେ ବିକ୍ଷୋଭକାରୀ ଶାନ୍ତ ହୋଇ ନ ଥିଲେ। ସେମାନେ କୋର୍ଟ ଘେରାଉ କରିଥିଲେ। ଆନ୍ଦୋଳନକାରୀମାନେ ପ୍ରଧାନ ବିଚାରପତିଙ୍କୁ ପଦ ଛାଡ଼ିବାକୁ ୧ ଘଣ୍ଟା ସମୟ ଦେଇଥିଲେ।​‌ ସେହିପରି ନୂଆ ଅନ୍ତରୀଣ ସରକାରର କ୍ରୀଡ଼ା ମନ୍ତ୍ରୀ ସର୍ବସାଧାରଣରେ ପ୍ରଧାନ ବିଚାରପତି ଓବୈଦୁଲ ହସନଙ୍କ ଇସ୍ତଫା ଦାବି କରିଥିଲେ।