କଣ୍ଟାବାଞ୍ଜି : ଆମ ଆଦମୀ ପାର୍ଟି ତରଫରୁ ଆଜି ତହସିଲ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଦିଆଯାଇଛି । ନିର୍ବାଚନ ମଣ୍ଡଳୀର ସଭାପତି ସୁରଥ ବେହେରାଙ୍କ ସଭାପତିତ୍ବରେ ଆୟୋଜିତ ସଭାରେ ବେହେରା କହିଲେ ଯେ କଣ୍ଟାବାଞ୍ଜିରେ ସରକାରୀ ତଥା ରେଳବାଇ ଅଞ୍ଚଳରେ ରହୁଥିବା ପ୍ରାୟ ୫୦୦ ପରିବାରକୁ ଘର ଯୋଗାଇ ଦେବାପାଇଁ ଓଡ଼ିଶା ବସ୍ତି ବାସିନ୍ଦା ଭୂମି ଅଧିକାର ଅଧିନିୟମ ୨୦୧୭ ଭୂମି ଅଧିକାର ପ୍ରମାଣ ପତ୍ର ଗତ ପାଞ୍ଚ ବର୍ଷ ତଳେ ପ୍ରଦାନ କରାଯାଇ ଥିଲା । କିନ୍ତୁ ଦୀର୍ଘ ସମୟ ବିତି ଯାଇଥିଲେ ବି ସେମାନଙ୍କୁ ଘର ଦିଆଯାଇନାହିଁ କିମ୍ବା ଜମିପଟ୍ଟା ପ୍ରଦାନ କରାଯାଇନାହିଁ । ପୂର୍ବରୁ ଏନେଇ ଡିସେମ୍ବର ୨୬ ତାରିଖରେ ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଥିଲା । ଦାବି ପୂରଣ କରାଯିବ ବୋଲି ପ୍ରଶାସନ ତରଫରୁ ପ୍ରତିଶ୍ରୁତି ଦିଆଯାଇଥିଲା ।
ମାତ୍ର ଦୀର୍ଘ ଦୁଇ ମାସ ବିତିଯାଇଥିଲେ ମଧ୍ୟ ଉକ୍ତ ଦାବି ଉପରେ କୌଣସି କର୍ଣ୍ଣପାତ ନ ହେବାରୁ ଗୁରୁବାରଠାରୁ ଦଳ ପକ୍ଷରୁ ପୁଣି ତହସିଲ କାର୍ଯ୍ୟାଳୟ ସମ୍ମୁଖରେ ଦାବି ପୂରଣ ନ ହେବା ଯାଏଁ ଗଣଧାରଣାରେ ବସି ରହିବୁ ବୋଲି ବେହେରା କହିଛନ୍ତି । ଅନ୍ୟ ପକ୍ଷରେ ୧୯୩୬ ବନ୍ଦୋବସ୍ତ ଅନୁସାରେ ବିଭିନ୍ନ ସରକାରୀ ଜମିରେ ରହିଥିବା ବସ୍ତି ବାସିନ୍ଦାଙ୍କ ଘର ମଧ୍ୟ ଭାଙ୍ଗି ଦିଆଯାଉଥିବାର ଅଭିଯୋଗ ହେଉଛି । ଧାରଣାରେ ନଗର ସଭାପତି ବିଷ୍ନୁ ପୁଞ୍ଜି, ବିଧାନସଭା ସମ୍ପାଦକ ହାଡ଼ୁ ଛତ୍ରିଆ, ଉପସଭାପତି ଡ଼ୋଲାମଣୀ ମହତ୍, ନାରୀନେତ୍ରୀ ସୁବର୍ଣ୍ଣ ଲତା ସାହୁ, ସଭ୍ୟ ଚମାର ବେହେରା ସହ ବହୁ କାର୍ଯ୍ୟକର୍ତ୍ତା ଯୋଗ ଦେଇଥିଲେ ।
Comments are closed.