ଟିଟିଲାଗଡ଼: ଟିଟିଲାଗଡ଼ ଉପଖଣ୍ଡକୁ ଜିଲା ମାନ୍ୟତା ପ୍ରଦାନ ପାଇଁ ଏବେ ଅଞ୍ଚଳ ଆନ୍ଦୋଳିତ ହୋଇଛି। ଉପନିର୍ବାଚନକୁ ଦୃଷ୍ଟିରେ ରଖି ଶାସକ ଦଳ ପଦ୍ମପୁରକୁ ଜିଲା କରିବେ ବୋଳି ଘୋଷଣା ପରେ ଟିଟିଲାଗଡ଼ ଉପଖଣ୍ଡ ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଛି। ମାନବ ଶୃଙ୍ଖଳ ଜରିଆରେ ଆନ୍ଦୋଳନ ବାର୍ତ୍ତା, ବିରୋଧି କଂଗ୍ରେସ ଏବଂ ବିଜେପି ସାମ୍ବାଦିକ ସମ୍ମିଳନୀ କରି ଆନ୍ଦୋଳନ ଚେତାବନୀ ଦେଇଛନ୍ତି। ଜିଲା କ୍ରିୟାନୁଷ୍ଠାନ କମିଟିର ଏକ ଗୁରୁତ୍ୱପୂର୍ଣ୍ଣ ବୈଠକରେ ଆସନ୍ତା ୧୫ ଦିନ ମଧ୍ୟରେ ଜିଲା ଘୋଷଣା ନହେଲେ ଭୟାବହ ଆନ୍ଦୋଳନ ହେବ ବୋଳି ଚେତାବନୀ ଦିଆଯାଇଛି। ଆଜି ଟିଟିଲାଗଡ଼ ବିକାଶ ସେନା ସଭାପତି ଇଂ ଅମ୍ଲାନ ଷଡ଼ଙ୍ଗୀ ନେତୃତ୍ୱରେ ହଜାର ହଜାର ଯୁବକ ଶତାଧିକ ବାଇକ ଶୋଭାଯାତ୍ରାରେ ଟିଟିଲାଗଡ଼ ସହର ପରିକ୍ରମା କରିଥିଲେ। ଉପଜିଲ୍ଲାପାଳଙ୍କ କାର୍ୟ୍ୟାଳୟକୁ ଆନ୍ଦୋଳନକାରୀ ଧସେଇ ପଶିବାକୁ ଉଦ୍ୟମ ନେଇ କିଛି ସମୟ ପୁଲିସ ସହ ପ୍ରବଳ ଠେଲାପେଲା ହୋଇଥିଲା। ଟିଟିଲାଗଡ଼ ଏସଡ଼ିପିଓ ଅଙ୍କିତା କୁମ୍ଭାରଙ୍କ ନେତୃତ୍ୱରେ ବହୁ ସଂଖ୍ୟାରେ ପୁଲିସ ବଳ ଉପଜିଲ୍ଲାପାଳ କାର୍ଯ୍ୟାଳୟ ଗେଟରେ ତାଲା ପକାଇ ଦେବାରୁ ଆନ୍ଦୋଳନକାରୀ ଗେଟ ସମ୍ମୁଖରେ ବହୁ ସମୟ ଧାରଣା ଦେବା ସହ ନାରାବାଜି କରିଥିଲେ। ପରେ ଟିଟିଲାଗଡ଼କୁ ତୁରନ୍ତ ଜିଲା ଗଠନ ନେଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଆନ୍ଦୋଳନକାରୀ ଜିଲା କ୍ରିୟାନୁଷ୍ଠାନ କମିଟିର ଚେତାବନୀ ମୁତାବକ ୧୫ ଦିନ ମଧ୍ୟରେ ଟିଟିଲାଗଡ଼ ଜିଲ୍ଲା ଘୋଷଣା ନେଇ ଦାବି ପତ୍ର ପ୍ରଦାନ କରିଥିଲେ।
Popular Categories
Previous article
Next article