ନୂଆଦିଲ୍ଲୀ: ଜାତୀୟ ଦଳରେ ସାମିଲ ନ ଥିବା ବେଳେ ଭାରତୀୟ କ୍ରିକେଟର୍ ନିଜ ରାଜ୍ୟ ପାଇଁ ଘରୋଇ କ୍ରିକେଟ ଖେଳିବାକୁ ବିସିସିଆଇ ତରଫରୁ ନିର୍ଦେଶାନାମା ଜାରି କରାଯିବା ସତ୍ତ୍ବେ ଏହାକୁ ନ ମାନିବାରୁ କେନ୍ଦ୍ରୀୟ ଚୁକ୍ତିରୁ ଶ୍ରେୟସ ଆୟର ଓ ଈଶାନ କିଷନଙ୍କୁ ବାଦ୍ ଦିଆଯାଇଛି। ତେବେ ତାରକା ଅଲରାଉଣ୍ଡର ହାର୍ଦିକ ପାଣ୍ଡ୍ୟା ଘରୋଇ କ୍ରିକେଟ ଖେଳିନଥିଲେ ସୁଦ୍ଧା ତାଙ୍କୁ ବିସିସିଆଇ କେନ୍ଦ୍ରୀୟ ଚୁକ୍ତିରେ ସାମିଲ କରାଯାଇଥିବାରୁ ପୂର୍ବତନ କ୍ରିକେଟର ପ୍ରବୀଣ କୁମାର ଏହାକୁ ନାପସନ୍ଦ କରିଛନ୍ତି।
ୟୁଟ୍ୟୁବରେ ଏକ ଭିଡିଓ ଛାଡ଼ି ପ୍ରବୀଣ ଦର୍ଶାଇଥିଲେ ବିସିସିଆଇ ଯେଉଁ ନିଷ୍ପତ୍ତି ନେଇଛି ତାହା ଯୁକ୍ତିଯୁକ୍ତ। ତେବେ ଏହାକୁ ସବୁ କ୍ରିକେଟରଙ୍କ କ୍ଷେତ୍ରରେ ସମାନ ଭାବେ ଲାଗୁ କରାଯିବା ଉଚିତ୍। ଶ୍ରେୟସ ଓ କିଷନଙ୍କୁ ବିସିସିଆଇ କେନ୍ଦ୍ରୀୟ ଚୁକ୍ତିରେ ବାଦ୍ ଦିଆଯାଇଥିବା ବେଳେ ଘରୋଇ କ୍ରିକେଟ ନ ଖେଳିବା ସତ୍ତ୍ବେ ହାର୍ଦିକଙ୍କୁ ଚୁକ୍ତିରେ ସ୍ଥାନ ଦେବା ଯୁକ୍ତିଯୁକ୍ତ ନୁହେଁ। ଜଣେ ଖେଳାଳିଙ୍କ ନିମନ୍ତେ ନିୟମ କୋହଳ କରାଯିବା ଅନୁଚିତ୍। ହାର୍ଦିକ ଚନ୍ଦ୍ରରୁ ଆସି ନାହାନ୍ତି। ସେ ମଧ୍ୟ ଘରୋଇ କ୍ରିକେଟ ଖେଳିବାକୁ ବାଧ୍ୟ। ସେ ଘରୋଇ କ୍ରିକେଟ ଖେଳିନଥିବାରୁ ତାଙ୍କୁ କେନ୍ଦ୍ରୀୟ ଚୁକ୍ତିରୁ ବାଦ୍ ଦେବା ଉଚିତ୍ ଥିଲା। ସୂଚନାଥାଉକି ଆଇପିଏଲ୍ର ଚଳିତ ସଂସ୍କରଣରେ ହାର୍ଦିକ ମୁମ୍ବଇ ଇଣ୍ଡିଆନ୍ସ ଦଳର ନେତୃତ୍ବ ନେବେ। ରୋହିତ ଶର୍ମାଙ୍କ ସ୍ଥାନରେ ହାର୍ଦିକଙ୍କୁ ମୁମ୍ବଇ ଇଣ୍ଡିଆନ୍ସ ଦଳର ଅଧିନାୟକ ଭାବେ ନିଯୁକ୍ତ କରାଯାଇଛି।
Comments are closed.