ନୂଆଦିଲ୍ଲୀ: ଦିଲ୍ଲୀ ବିଶ୍ବବିଦ୍ୟାଳୟର ଆଧୁନିକ ଭାରତୀୟ ଭାଷା ଓ ସାହିତ୍ୟ ଅଧ୍ୟୟନ ବିଭାଗର ପ୍ରଫେସର ଡକ୍ଟର ପ୍ରକାଶଚନ୍ଦ ପଟ୍ଟନାୟକ ୟୁ.ଜି.ସି.ର କ୍ୟାରିୟର ଆଡଭାନ୍ସମେଣ୍ଟ ସ୍କିମ୍-୨୦୧୮ ଅନୁସାରେ ‘ବରିଷ୍ଠ ପ୍ରଫେସର’ ରୂପେ ମନୋନୀତ ହୋଇଛନ୍ତି। ଏହି ସମ୍ମାନଜନକ ପଦ ପାଇବାରେ ସେ ପ୍ରଥମ ଓଡ଼ିଆ ପ୍ରଫେସର। ଗତ ୧୦ ତାରିଖରେ ଏ ସଂକ୍ରାନ୍ତ ବିଜ୍ଞପ୍ତି ବିଶ୍ବବିଦ୍ୟାଳୟ ପକ୍ଷରୁ ପ୍ରକାଶ ପାଇଛି।
ଉତ୍କଳ ବିଶ୍ବବିଦ୍ୟାଳୟରୁ ଓଡ଼ିଆରେ ସ୍ନାତକୋତ୍ତର ଶିକ୍ଷାଲାଭ କରିଥିବା ଶ୍ରୀ ପଟ୍ଟନାୟକ ୧୯୮୭ରେ ପ୍ରଥମେ ଦିଲ୍ଲୀ ବିଶ୍ବବିଦ୍ୟାଳୟରେ ଅଧ୍ୟାପକ ଭାବରେ ଯୋଗ ଦେଇଥିଲେ ଏବଂ ୧୯୯୨ରେ ବରିଷ୍ଠ ଅଧ୍ୟାପକ ଓ ୧୯୯୮ରେ ପ୍ରାଧ୍ୟାପକ ହେବାପରେ, ୨୦୦୬ରେ ପ୍ରଫେସର ହୋଇଥିଲେ। ସେହିଦିନଠାରୁ ଦୀର୍ଘ ୧୬ବର୍ଷ ଧରି ସେ ଉକ୍ତ ବିଭାଗର ପ୍ରଫେସର ରହିଛନ୍ତି ଏବଂ ବିଭାଗୀୟ ମୁଖ୍ୟ ଭାବରେ ମଧ୍ୟ ଦାୟିତ୍ବ ନିର୍ବାହ କରିଛନ୍ତି।
ଉଲ୍ଲେଖନୀୟ ଯେ କେନ୍ଦ୍ର ସଂସ୍କୃତି ବିଭାଗ ଓ ସାହିତ୍ୟ ଅକାଦେମୀର ନିମନ୍ତ୍ରଣ କ୍ରମେ ପ୍ରଫେସର ପ୍ରକାଶ ପଟ୍ଟନାୟକ ଓଡ଼ିଆ ଭାଷାକୁ ଶାସ୍ତ୍ରୀୟମାନ୍ୟତା ପ୍ରଦାନର ଚୂଡ଼ାନ୍ତ ବୈଠକରେ ଭାଷା ବିଶେଷଜ୍ଞ ଭାବରେ ଯୋଗଦେଇ ଓଡ଼ିଆ ଭାଷାର ଶାସ୍ତ୍ରୀୟ ମାନ୍ୟତା କ୍ଷେତ୍ରରେ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରିଥିଲେ।
