ସମାଜ ଡିଜିଟାଲ ଡେସ୍କ: ହିଜାବ ନ ପିନ୍ଧି ଗୀତ ଗାଇବାକୁ ନେଇ ଇରାନରେ ଜଣେ ୨୭ ବର୍ଷୀୟ ଗାୟିକା ଗିରଫ ହୋଇଛନ୍ତି। ଗାୟିକା ଜଣକ ନିଜ ଗୀତର ଭିଡିଓ ୟୁଟ୍ୟୁବରେ ଅପ୍ଲୋଡ୍ କରିଥିଲେ ଏବଂ ଏଥିରେ ସେ ହିଜାବ ପିନ୍ଧି ନଥିଲେ। ଏଠାରେ ସୂଚନାଯୋଗ୍ୟ, ଏହି ଗାୟିକାଙ୍କ ଗୀତକୁ ଏପର୍ଯ୍ୟନ୍ତ ୧୫ ଲକ୍ଷରୁ ଊର୍ଦ୍ଧ୍ବ ଦେଖି ଓ ଶୁଣି ସାରିଲେଣି।
ଗଣମାଧ୍ୟମ ରିପୋର୍ଟ ଅନୁସାରେ, ଗାୟିକାଙ୍କ ନାମ ପରସ୍ତୁ ଅହମଦୀ ବୋଲି ଜଣାପଡ଼ିଛି। ଶନିବାର ଇରାନର ସାରୀ ସହରରୁ ପରସ୍ତୁଙ୍କୁ ଗିରଫ କରାଯାଇଛି। ସାରୀ ହେଉଛି ଇରାନର ମଜାନଦାରାନ ପ୍ରଦେଶର ଏକ ସହର, ଯାହା ରାଜଧାନୀ ତେହେରାନଠାରୁ ପ୍ରାୟ ୨୮୦ କିଲୋମିଟର ଦୂରରେ ଅବସ୍ଥିତ। ପରସ୍ତୁ ତାଙ୍କ ଗୀତର ଭିଡିଓ ୟୁଟ୍ୟୁବରେ ଅପ୍ଲୋଡ୍ କରିବା ପରେ ଗୁରୁବାର ତାଙ୍କ ବିରୋଧରେ ଏକ ମାମଲା ରୁଜୁ ହୋଇଥିଲା। ଭିଡିଓରେ ପରସ୍ତୁ ଏକ ସ୍ଲିଭଲେସ୍ କଳା ପୋଷାକରେ ଗୀତ ଗାଉଥିବା ନଜର ଆସିଛନ୍ତି। ସୂଚନା ଅନୁସାରେ, ଭିଡିଓରେ ପରସ୍ତୁଙ୍କ ପଛରେ ଠିଆ ହୋଇଥିବା ଚାରିଜଣ ବାଦକଙ୍କ ବିରୋଧରେ ମଧ୍ୟ ମାମଲା ରୁଜୁ ହୋଇଛି। ସେମାନଙ୍କ ମଧ୍ୟରୁ ଦୁଇଜଣଙ୍କୁ ରାଜଧାନୀ ତେହେରାନରୁ ଗିରଫ କରାଯାଇଛି।
ସୂଚନାଯୋଗ୍ୟ, ଇରାନରେ ମହିଳାଙ୍କ ପାଇଁ ହିଜାବ ପିନ୍ଧିବା ବାଧ୍ୟତାମୂଳକ ଏବଂ ଏହି ନିୟମ ପାଳନ କରୁ ନ ଥିବା ମହିଳାଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥାଏ। ୨୦୨୨ରେ ଇରାନରେ ହିଜାବ ବିରୋଧରେ ବଡ଼ ଧରଣର ବିକ୍ଷୋଭ ପ୍ରଦର୍ଶନ ମଧ୍ୟ କରାଯାଇଥିଲା।
Comments are closed.