ନୂଆଦିଲ୍ଲୀ: ଆଜି ଲୋକସଭାରେ ଶିଶୁମାନଙ୍କ ପ୍ରତି ଯୌନ ଅପରାଧ ସଂରକ୍ଷଣ ସଂଶୋଧନ ବିଧେୟକ ୨୦୧୯ ଗୃହୀତ ହେବ ସହ ସଂସଦର ମଞ୍ଜୁରୀ ମିଳିଛି। ପୂର୍ବରୁ ଏହି ବିଧେୟକ ରାଜ୍ୟସଭାରେ ଗୃହୀତ ହୋଇଥିଲା। ବିଧେୟକରେ ଶିଶୁମାନଙ୍କ ସହିତ ଯୌନ ଅପରାଧୀକୁ ସର୍ବାଧିକ ମୃତ୍ୟୁଦଣ୍ଡ ଦିଆଯିବାର ବ୍ୟବସ୍ଥା ରହିଛି ଓ ମୃତ୍ୟୁଦଣ୍ଡ ସହିତ ଦଣ୍ଡାଦେଶର ସୀମା ବୃଦ୍ଧି କରିବା ଭଳି ବ୍ୟବସ୍ଥା ଥିବା ଜଣାପଡିଛି। ସେହିପରି ଛୋଟ ପିଲାଙ୍କ ଅଶ୍ଳୀଳ ଫିଲ୍ମ ତିଆରି କରିବା ଉପରେ କଟକଣା ପ୍ରଦର୍ଶନ ସ୍ୱରୂପ ୫ ବର୍ଷ ଯାଏଁ ଦଣ୍ଡ ବିଧାନ ଏବଂ ଜୋରିମାନା ବ୍ୟବସ୍ଥା ରହିଛି। ଅପରାଧ ପୁନରାବୃତ୍ତି ହେଲେ ଅଧିକ ଦୁଇ ବର୍ଷ ଦଣ୍ଡ ବିଧାନ ପାଇଁ ନୀତି ନିର୍ଦ୍ଧାରଣ କରାଯାଇଛି। ବିଶେଷ କରି ଛୋଟ ପିଲାମାନଙ୍କୁ ବ୍ୟବହାର କରି ଅଶ୍ଳୀଳ ଭିଡିଓ ସମ୍ପର୍କରେ ବିଧେୟକରେ ଉଲ୍ଲେଖ ରହିଛି।
ବିଧେୟକ ଉପରେ ଆଲୋଚନା ସମୟରେ ମହିଳା ଏବଂ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ କହିଥିଲେ, ଦେଶର ପ୍ରତ୍ୟେକ ଶିଶୁଙ୍କ ସୁରକ୍ଷା ସୁନିଶ୍ଚିତ କରିବା ସରକାରଙ୍କ ଦାୟିତ୍ୱ। ସେ କହିଛନ୍ତି ଯେ ଏହା ଫଳରେ କମ ଦିନ ମଧ୍ୟରେ ବିଚାର ପ୍ରକ୍ରିୟା ଶେଷ ହୋଇପାରିବ। ଏହି ଆଇନ ଅଧୀନରେ ୧ ହଜାରରୁ ଅଧିକ ଫାଷ୍ଟ ଟ୍ରାକ କୋର୍ଟ ସ୍ଥାପନ ପାଇଁ ସରକାର ମଞ୍ଜୁରୀ ଦେଇଥିବା ସ୍ମୃତି କହିଛନ୍ତି ତେବେ ୧୮ ରାଜ୍ୟ ଏଭଳି ଫାଷ୍ଟ ଟ୍ରାକ କୋର୍ଟ ଗଠନ ପାଇଁ ରାଜି ହୋଇଥିବା ସେ କହିଛନ୍ତି।
