ନୂଆଦିଲ୍ଳୀ : ବିହାରରେ ଚଳିତ ବର୍ଷର ବିଧାନସଭା ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୯୪.୫୩ କୋଟି ଟଙ୍କାର ଯୋଜନା ରାଜ୍ୟକୁ ଉପହାର ଆକାରରେ ଦେଇଛନ୍ତି। ପ୍ରଧାନମନ୍ତ୍ରୀ ମୋଦୀ “ପିଏମ୍ ମତ୍ସ୍ୟ ସମ୍ପଦା ଯୋଜନା” (PMMSY) ର ଶୁଭାରମ୍ଭ କରିଛନ୍ତି। କୃଷକଙ୍କ ପ୍ରତ୍ୟକ୍ଷ ବ୍ୟବହାର ପାଇଁ ଏକ ସାମଗ୍ରିକ ପ୍ରଜାତିର ଉନ୍ନତି, ବଜାର ଏବଂ ସୂଚନା ସମ୍ବନ୍ଧୀୟ ‘ଇ-ଗୋପାଲା’ ଆପର ମଧ୍ୟ ଶୁଭାରମ୍ଭ କରିଛନ୍ତି। ଏଥିରେ ମୁଖ୍ୟମନ୍ତ୍ରୀ ନୀତୀଶ କୁମାର, ଉପମୁଖ୍ୟମନ୍ତ୍ରୀ ସୁଶୀଲ କୁମାର ମୋଦୀ, କେନ୍ଦ୍ର ମନ୍ତ୍ରୀ ଗିରିରାଜ ସିଂହଙ୍କ ସମେତ ବହୁ ବିଶିଷ୍ଟ ବ୍ୟକ୍ତ ଉପସ୍ଥିତ ଥିଲେ।
ଏହି ଅବସରରେ ପ୍ରଧାନମନ୍ତ୍ରୀ ବିଭିନ୍ନ ହିତାଧିକାରୀମାନଙ୍କ ସହ ଆଲୋଚନା କରିଥିଲେ ଏବଂ ଏହି ଯୋଜନାଗୁଡିକର ଲାଭ ବିଷୟରେ ବର୍ଣ୍ଣନା କରିଥିଲେ। ଏହି ସମୟ ମଧ୍ୟରେ ପୁର୍ଣ୍ଣିଆର ଜଣେ ମହିଳା ପିଏମ ମୋଦୀଙ୍କୁ କହିଛନ୍ତି ଯେ ରାଜ୍ୟରେ ମଦ ନିଷେଧ ହେବା ପରଠାରୁ ତାଙ୍କ ପରିବାର ଗୋପାଳନ ଆରମ୍ଭ କରିଛନ୍ତି। ଏହା ଉପରେ ପ୍ରଧାନମନ୍ତ୍ରୀ କହିଛନ୍ତି ଯେ ମହିଳା ମାନଙ୍କୁ ଆତ୍ମନିର୍ଭରଶୀଳ କରିବା ପାଇଁ ଆମ ସରକାର ମଧ୍ୟ ଦିନରାତି କାର୍ଯ୍ୟ କରୁଛନ୍ତି।
“ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦା ଯୋଜନା” ଦେଶରେ ମତ୍ସ୍ୟପାଳନ କ୍ଷେତ୍ରରେ ସ୍ଥାୟୀ ବିକାଶ ହାସଲ ପାଇଁ ସରକାରଙ୍କର ଏକ ପ୍ରମୁଖ ଯୋଜନା। ଏହି ଯୋଜନା ବାବଦରେ ୨୦ ହଜାର କୋଟି ଟଙ୍କା ଖର୍ଚ୍ଚ ହେବ, ଯାହା ମତ୍ସ୍ୟ ପାଳନ କ୍ଷେତ୍ରରେ ଏ ପର୍ଯ୍ୟନ୍ତ ସବୁଠାରୁ ଅଧିକ ପୁଞ୍ଜିନିବେଶ। ୨୦୨୪- ୨୫ ସୁଦ୍ଧା ଆଉ ଅତିରିକ୍ତ ୭୦ଲକ୍ଷ ଟନ୍ ମତ୍ସ୍ୟ ଉତ୍ପାଦନ ପାଇଁ ଏଥିରେ ଲକ୍ଷ୍ୟ ରଖାଯାଇଛି।
