ପିପିଲି:ପିପିଲି ଉପନିବନ୍ଧକ (ସବ୍ରେଜିଷ୍ଟ୍ରାର)ଙ୍କ କାର୍ଯ୍ୟାଳୟ ସମ୍ମୁଖରେ ଜାତୀୟ ଦଳିତ, ଆଦିବାସୀ, ସଂଖ୍ୟାଲଘୁ ମହାସଂଘ ପକ୍ଷରୁ ସୋମବାର ୩ଘଣ୍ଟା କାଳ ଗଣଧାରଣା ଦିଆଯାଇଥିଲା। ଏହି ତହସିଲ ଅନ୍ତର୍ଗତ ସଙ୍ଗୁଳାଇଶାସନ ଗ୍ରାମର ପ୍ରଦୀପ୍ତ ଭୋଇ ଗତମାସ ୨୨ ତାରିଖରେ ଏକ ଜମି କ୍ରୟ କରିବା ପାଇଁ ଉପନିବନ୍ଧକଙ୍କ କାର୍ଯ୍ୟାଳୟରେ ଆବଶ୍ୟକ ଫିସ୍ ଦାଖଲ କରିଥିବା ବେଳେ ଉଭୟ କ୍ରେତା ଓ ବିକ୍ରେତାଙ୍କ ବାୟୋମେଟ୍ରିକ୍ ମଧ୍ୟ ନିଆଯାଇଥିଲା। ତେବେ ପ୍ରଦୀପ୍ତଙ୍କୁ ସରକାରୀ ଫିସ୍ର ରସିଦ (ଟିକେଟ୍) ଦିଆଯାଇନଥିବା ବେଳେ ତାଙ୍କୁ ଦଲିଲ ମଧ୍ୟ ପ୍ରଦାନ କରାଯାଇନଥିବା ଅଭିଯୋଗ କରି ମହାସଂଘର ରାଜ୍ୟ ସଭାପତି ବିଜୟ କୁମାର ସେଠୀ, ରାଜ୍ୟ ସଂପାଦିକା ସୋନିଲତା ସେଠୀଙ୍କ ନେତୃତ୍ୱରେ ପ୍ରଦୀପ୍ତଙ୍କ ପରିବାର ସଦସ୍ୟାଙ୍କ ସମେତ ଶତାଧିକ ମହିଳା ସୋମବାର ପୂର୍ବାହ୍ନ ସାଢେ ୧୦ଟାରୁ ୩ଘଣ୍ଟା କାଳ ଉକ୍ତ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଦେଇଥିଲେ।
ପ୍ରଦୀପ୍ତଙ୍କୁ ଉକ୍ତ ଜମି କ୍ରୟବିକ୍ରୟର ଦଲିଲ ଓ ଟିକେଟ୍ ପ୍ରଦାନ କରିବା ଦାବିରେ ସ୍ଥାନୀୟ ତହସିଲଦାରଙ୍କ ଜରିଆରେ ଜିଲାପାଳଙ୍କୁ ଏକ ଦାବିପତ୍ର ପ୍ରଦାନ କରାଯାଇଥିଲା। ଏ ସଂପର୍କରେ ପିପିଲି ସବ୍ରେଜିଷ୍ଟ୍ରାର କ୍ରୀଷ୍ଣା ପାଢୀଙ୍କୁ ପଚାରିବାରେ କୋର୍ଟରେ ମାମଲା ଥିବାରୁ ଦଲିଲ ପ୍ରୋସେସ୍ ହୋଇପାରିନି ବୋଲି କହିଥିଲେ। ପ୍ରଦୀପ୍ତଙ୍କୁ ନ୍ୟାୟ ନମିଳିଲେ ଆଗାମୀ ଦିନରେ ମହାସଂଘ ପକ୍ଷରୁ ଜୋରଦାର ଆନ୍ଦୋଳନ କରାଯିବ ବୋଲି ମହାସଂଘର ରାଜ୍ୟ ସଭାପତି ବିଜୟ କୁମାର ସେଠୀ ଚେତାବନୀ ଦେଇଛନ୍ତି।
