ଫୁଲବାଣୀ: କନ୍ଧମାଳ ଜିଲ୍ଲା ଫିରିଙ୍ଗିଆ ବନବିଭାଗ କାର୍ଯ୍ୟାଳୟ ପରିସରରେ ଫିରିଙ୍ଗିଆ ବନାଞ୍ଚଳ ଅଧୀନରେ ବସବାସ କରିଆସୁଥିବା ଆଦିବାସୀମାନଙ୍କୁ ଫିରିଙ୍ଗିଆ ବନବିଭାଗ ତରଫରୁ ଜଙ୍ଗଲ ଜମି ପଟ୍ଟା ପ୍ରଦାନ କରାଯାଇଛି। ଏହି କାର୍ଯ୍ୟକ୍ରମରେ ଫୁଲବାଣୀ ବନଖଣ୍ଡ ଅଧିକାରୀ ପ୍ରଶାନ୍ତ ପଟେଲ ମୁଖ୍ୟ ଅତିଥି ଭାବରେ ଯୋଗଦେଇଥିଲେ। ଅନ୍ୟମାନଙ୍କ ମଧ୍ୟରେ ସହକାରୀ ବନସଂରକ୍ଷକ ମଳୟ ରଞ୍ଜନ କାଲୋ, ଫିରିଙ୍ଗିଆ ବନାଞ୍ଚଳ ଅଧିକାରୀ ରବୀନ୍ଦ୍ର କୁମାର ପାତ୍ର, ବନ ପାଳ ପ୍ରବୀଣ ଦାଶ, ବ୍ରଜ ସୁନ୍ଦର ଦାସ, ଦିଲୀପ ବିଶୋଇ, ବନରକ୍ଷୀ ସୁଜିତ ପ୍ରଧାନ, ସନ୍ତୋଷ ସାହୁ ପ୍ରମୁଖ ଯୋଗ ଦେଇଥିଲେ। କାର୍ଯ୍ୟକ୍ରମରେ ଓଡ଼ିଶା ସରକାରଙ୍କ ଜଙ୍ଗଲ ଜମି ଅଧିକାର ଆଇନ ୨୦୦୬ ଏବଂ ସଂଶୋଧନ ଆଇନ ୨୦୧୨ ବଳରେ ୨୦୦୫ ମସିହାର ପ୍ରାୟ ୨୫ ବର୍ଷ ପୂର୍ବରୁ ଜଙ୍ଗଲ ମଧ୍ୟରେ ବସବାସ କରି ଜୀବନ ଜୀବିକା ନିର୍ବାହ କରୁଥିବା ଆଦିବାସୀମାନଙ୍କ ମଧ୍ୟରୁ ୧୬୬ ଗୋଟି ଶିରୋନାମା ପଟ୍ଟା ୫୬ ଜଣ ହିତାଧିକାରୀଙ୍କୁ ବଣ୍ଟନ କରାଯାଇଛି। କାର୍ଯ୍ୟକ୍ରମରେ ବାଘ ନଦୀ ସଂରକ୍ଷିତ ଜଙ୍ଗଲ ମଧ୍ୟରେ ୧୫୩ ଗୋଟି ପଟ୍ଟା, ବାଲନ୍ଦା ପଡା ଦକ୍ଷିଣ ପ୍ରସ୍ତାବିତ ସଂରକ୍ଷିତ ଜଙ୍ଗଲ ମଧ୍ୟରେ ୧୦ ଗୋଟି ପଟ୍ଟା, କିଆମୁଣ୍ଡା ପ୍ରସ୍ତାବିତ ସଂରକ୍ଷିତ ଜଙ୍ଗଲ ମଧ୍ୟରେ ୨ ଗୋଟି ପଟ୍ଟା ଓ ଗୋଷ୍ଠୀଗତ ଜଙ୍ଗଲ ଅଧିକାର ଆଇନ ବଳରେ ବନ୍ଧଗଡ଼ ‘କ’ ପ୍ରସ୍ତାବିତ ସଂରକ୍ଷିତ ଜଙ୍ଗଲ ମଧ୍ୟରେ ୧ ଗୋଟି ଶିରୋନାମା ବଣ୍ଟନ କରାଯାଇଛି। ତେବେ ଏହି ଜଙ୍ଗଲ ଜମି ପଟ୍ଟା ପାଇଥିବା ହିତାଧିକାରୀମାନେ କେବଳ ନିଜେ ବିଭିନ୍ନ ଚାଷ କରି ପରିବାର ପ୍ରତିପୋଷଣ କରିପାରିବେ ଓ ନିଜର ପୁତ୍ର ଓ ପରିବାର ଏହି ଜମିରେ ଅଧିକାର ସାବ୍ୟସ୍ତ କରିପାରିବେ କିନ୍ତୁ ଏହି ଜଙ୍ଗଲ ଜମି ଅନ୍ୟ ଲୋକଙ୍କୁ ହସ୍ତାନ୍ତର କିମ୍ବା ବିକ୍ରି କରିପାରିବେ ନାହିଁ ବୋଲି ବକ୍ତବ୍ୟରେ ବନଖଣ୍ଡ ଅଧିକାରୀ ପ୍ରଶାନ୍ତ ପଟେଲ କହିଛନ୍ତି।
Popular Categories
Previous article
Next article