ଫୁଲବାଣୀ: ଆଉ ମାତ୍ର ଗୋଟିଏ ଦିନ ପରେ ଆଲୋକର ପର୍ବ ଦୀପାବଳି। ଦୀପାବଳିରେ ଘରକୁ ପଦାର୍ପଣ କରିଥାନ୍ତି ମା’ ମହାଲକ୍ଷ୍ମୀ । ଘରେ ଘରେ ମା’ କାଳୀ ଓ ମହାଲକ୍ଷ୍ମୀଙ୍କ ପୂଜାପାଠ ହେବା ସହିତ ବିଭିନ୍ନ ପ୍ରକାର ବାଣ ଫୁଟେଇ ଲୋକେ ମନେଇଥାନ୍ତି ଏହି ପର୍ବ । ଲୋକଙ୍କୁ ସବୁଠାରୁ ଅଧିକ ମାଟିଦୀପର ଆବଶ୍ୟକତା ପଡିଥାଏ କେବଳ ଏହି ଦୀପାବଳି ପର୍ବ ଦିନ । ଘରେ ମାଟି ଦୀପ ପ୍ରଜ୍ବଳନ କରିଥାନ୍ତି ଲୋକେ । ତେଣୁ ବିଭିନ୍ନ ପ୍ରକାରର ଦୀପ ତିଆରିରେ ବ୍ୟସ୍ତ ଅଛନ୍ତି କୁମ୍ଭକାର ପରିବାର । ଏଭଳି ଏକ ଦୃଶ୍ୟ ଦେଖାଯାଇଛି ଡିଣ୍ଡିରଗାଁ ପଂଚାୟତ ସଦର ମହକୁମା ଟେଲାପାଲିରେ। ଗ୍ରାମରେ ରହୁଛନ୍ତି ୧୫ରୁ ଊର୍ଦ୍ଧ୍ବ କୁମ୍ଭକାର ପରିବାର । ସମସ୍ତେ ମାଟିଦୀପ ସାଙ୍ଗକୁ ଅନ୍ୟାନ୍ୟ ମାଟି ସାମଗ୍ରୀ ତିଆରିରେ ବ୍ୟସ୍ତ। ବର୍ଷସାରା ବିଭିନ୍ନ ମାଟିର ସାମଗ୍ରୀ ତିଆରି କରି ବଜାର ଓ ଗାଁ ଗଣ୍ଡା ସବୁରେ ବୁଲି ବୁଲି ତାକୁ ବିକ୍ରି କରି ପେଟ ପୋଷଣ କରିଥାନ୍ତି ଏହି ପରିବାର ସବୁ । ଏହି ଅବସରରେ ଗ୍ରାମର ଶ୍ରୀକୃଷ୍ଣ ରଣା ଓ ପତ୍ନୀ ସୁଫଳା ରଣା ବର୍ଷ ତମାମ ବିଭିନ୍ନ ମାଟି ତିଆରି ଜିନିଷ ସବୁ ବିକ୍ରି କରି ପରିବାର ଚଳାଉଛନ୍ତି । ମାଟି ତିଆରି ବିଭିନ୍ନ ପ୍ରକାର ଜିନିଷ ସବୁ ବିକ୍ରୟ କରି ସେ ବର୍ଷକୁ ଲକ୍ଷେ ଉପରେ ରୋଜଗାର କରୁଥିବା କୁହନ୍ତି ଶ୍ରୀକୃଷ୍ଣ ରଣା । ବାକି ମାସଗୁଡିକ ଅପେକ୍ଷା ଦୀପାବଳି ପର୍ବରେ ସବୁଠୁ ଅଧିକ ରୋଜଗାର ହେଉଥିବା ସେ କହିଛନ୍ତି ।
ପ୍ରତି ଦୀପାବଳି ସମୟରେ ସେ ୧୦ରୁ ୨୦ ହଜାର ଟଙ୍କା ରୋଜଗାର କରନ୍ତି । ନିଜ ଅଞ୍ଚଳରେ ଦୀପର ଚାହିଦା ଟିକେ କମ ରହୁଥିବାରୁ ବଜାରକୁ ମଧ୍ୟ ଦୀପ ବିକ୍ରୟ କରିବାକୁ ଯାଉଥିବା କହିଛନ୍ତି ଶ୍ରୀକୃଷ୍ଣ । ଫୁଲବାଣୀ ଓ ଫିରିଙ୍ଗିଆରେ ୧୦୦ଟି ଦୀପକୁ ୧୩୦ ଟଙ୍କାରେ ବିକ୍ରି କରୁଥୁବା ବେଳେ ନିଜ ଅଂଚଳରେ ୧୦୦ଟି ଦୀପକୁ ୧୦୦ ଟଙ୍କା ହାରରେ ବିକ୍ରି କରନ୍ତି । ଦୀପାବଳି ପାଇଁ ବ୍ୟବହୃତ ହେଉଥିବା ଦୀପ ଗୁଡିକ ମଧ୍ୟରେ ରୁକା ଦୀପ, ଛୋଟ ଦୀପ, ଜୁନାମାର ଆଳତୀ ଦୀପ ଓ କଳସ ଦୀପଗୁଡ଼ିକ ପ୍ରମୁଖ ଦୀପ । ବିଶେଷ କରି ଦୀପାବଳି ରେ ଲୋକେ ଏହି ସବୁ ଦୀପଗୁଡିକ ପାଇଁ ହିଁ ତାଙ୍କ ପାଖକୁ ଆସିଥାନ୍ତି । ଷ୍ଟିଲ, ପ୍ଲାଷ୍ଟିକ, ଆଲୁମିନିୟମ ଆଦିରେ ତିଆରି ଘରୋଇ ଉପକରଣ ସବୁ ଅଧିକ ମାତ୍ରାରେ ବଜାରରେ ଉପଲବ୍ଧ ରହୁଥିବାରୁ କୁମ୍ଭାରମାନଙ୍କ ମାଟି ତିଆରି ଜିନିଷ ସବୁର ଚାହିଦା କମି କମି ଯାଉଥିବା ବେଳେ, ଦୀପାବଳି, ବିବାହ, ବ୍ରତ ଓ ଅନ୍ୟାନ୍ୟ ପର୍ବ ପର୍ବାଣୀଗୁଡିକରେ ମାଟି ତିଆରି ସାମଗ୍ରୀର ଆବଶ୍ୟକତା ଅଧିକ ପଡୁଥିବାରୁ ଲୋକେ କୁମ୍ଭାର ପରିବାର ଉପରେ ନିର୍ଭର କରୁଥିବା କହିଛନ୍ତି ଏହି କୁମ୍ଭାର ଦମ୍ପତି । ତେବେ ଇତି ମଧ୍ୟରେ ଫୁଲବାଣୀ ସହରକୁ ବିଭିନ୍ନ ଅଞ୍ଚଳର କୁମ୍ଭକାର ପରିବାରର ବ୍ୟକ୍ତି ବିଶେଷମାନେ ଦୀପ ବିକ୍ରି କରୁଥିବା ଦେଖାଯାଇଛି।
Comments are closed.