ପୁରୀ : ଶ୍ରୀମନ୍ଦିର ଚତୁଃପାର୍ଶ୍ୱରେ ଏକ ଚିଲ ଥଣ୍ଟରେ ବାନା ପରି ଦିଶୁଥିବା ଏକ ହଳଦିଆ କପଡ଼ା ଧରି ଉଡ଼ୁଥିବା ଭିଡିଓ ସାମାଜିକ ଗଣମାଧ୍ୟମରେ ପ୍ରଘଟ ହେଉଥିବା ଦେଖିବାକୁ ମିଳିଛି। ଏହି ଭିଡିଓ ଦେଖିବା ପରେ ଜଗନ୍ନାଥପ୍ରେମୀ ମାନେ ଭୟଭୀତ ହୋଇ ପଡ଼ିଥିବା ଦେଖିବାକୁ ମିଳିଛି। ସୂଚନା ମୁତାବକ, ଶନିବାର ସନ୍ଧ୍ୟାରେ ଶ୍ରୀମନ୍ଦିର ଉପରେ ଚୂନରା ସେବକମାନେ ଧ୍ବଜା ନୀତି ସମ୍ପନ୍ନ କରୁଥିବାବେଳେ ଏକ ଚିଲ ଶ୍ରୀମନ୍ଦିର ଉପର ପାର୍ଶ୍ବରେ ଧ୍ବଜା ପରି ଦେଖାଯାଉଥିବା ଏକ ହଳଦିଆ କପଡ଼ା ଧରି ଉଡ଼ୁଥିବା କିଛି ସମୟ ପାଇଁ ଦେଖିବାକୁ ମିଳିଥିଲା। ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ କୌଣସି ସୂଚନା ଦିଆଯାଇ ନାହିଁ। କିନ୍ତୁ ଏଭଳି ଦୃଶ୍ୟ ଦେଖି ଶ୍ରଦ୍ଧାଳୁମାନେ ଭୟଭୀତ ହୋଇପଡ଼ିଛନ୍ତି। କାରଣ ଶ୍ରୀମନ୍ଦିର ଉପରେ ଚିଲ ଉଡ଼ିବା ଏକ ଅଶୁଭ ସଙ୍କେତ ହୋଇଥିବାରୁ ଲୋକେ ଆଶଙ୍କିତ ରହିଛନ୍ତି। କିଛି ଲୋକ ଏହାକୁ ମହାବିପତ୍ତି ଆସୁଥିବା ନେଇ ପୂର୍ବ ସୂଚନା ବୋଲି ସାମାଜିକ ଗଣମାଧ୍ୟମରେ ଲେଖିଛନ୍ତି। ଆଉ କିଛି ଲୋକଙ୍କ ମତରେ, ରାଜ୍ୟରେ ଯେବେ ବି ମହାବିପତ୍ତି ମାଡ଼ି ଆସିବାର ପୂର୍ବ ସୂଚନା ମୁତାବକ ମହାପ୍ରଭୁ କିଛି ନା କିଛି ସତର୍କ ସଙ୍କେତ ଦେଇଥାନ୍ତି ବୋଲି ଲେଖିଛନ୍ତି। ତେବେ ଏପରି ସଙ୍କେତ ଭାରତ ତଥା ବିଶ୍ୱ ପାଇଁ ଶୁଭଙ୍କର ନୁହେଁ ବୋଲି ଜଗନ୍ନାଥପ୍ରେମୀ କହିଛନ୍ତି।
Comments are closed.