ବାଙ୍କୀ: ବାଙ୍କୀ ଉପଖଣ୍ଡର ରଗଡ଼ି ଗ୍ରାମରେ ପୂଜା ପାଉଥିବା ରାଜ ପ୍ରତିଷ୍ଠିତ ମହିମାମଣି ଦେବ ସ୍ନାନ ଯାତ୍ରା ସାରି ଫେରିଛନ୍ତି । ସ୍ନାନ ପରେ ଠାକୁରଙ୍କୁ ଜ୍ୱର ହେବାରୁ ତାଙ୍କୁ ଅଣସର ଘରେ ରଖାଯାଇ ଗୁପ୍ତ ରିତିରେ ପୂଜାର୍ଚ୍ଚନା ଚାଲୁରହିଛି । ମହିମାମଣି ଅଣସରରେ ଘରେ ରହିଥିବାରୁ ମୁଖ୍ୟ ମନ୍ଦିରରେ ପଟି ଦିଅଁ ପୂଜା ପାଉଥିବା ଦେଖାଯାଇଛି । ନବ ଯୌବନରେ ଠାକୁର ଦର୍ଶନ ଦେବା ପର୍ୟ୍ୟନ୍ତ ପଟି ଦିଅଁ ପୂଜା ପାଇବେ ବୋଲି ମନ୍ଦିରର ବଡ଼ ପଣ୍ଡା ନବ କିଶୋର ମହାପାତ୍ର ପ୍ରକାଶ କରିଛନ୍ତି । ଠାକୁରଙ୍କ ନିକଟରେ ଶଙ୍ଖୁଡ଼ି ଭୋଗ ହେଉନଥିବା ଜଣାପଡ଼ିଥିବା ବେଳେ କେବଳ ଫଳ ଏବଂ ପଣା ନୀତି ଅର୍ପଣ ହେଉଛି । କୋଭିଡ଼ କଟକଣା ପାଇଁ ସାଧାରଣ ଦର୍ଶନକୁ ମନ୍ଦିର ପରିଚାଳନା କମିଟି ବନ୍ଦ ରଖିଥିବା ଟ୍ରଷ୍ଟି ଭୃଗୁରାମ ରାଉତ ପ୍ରକାଶ କରିଛନ୍ତି । ବ୍ରାହ୍ମଣ ସେବାୟତ ରାଜ କିଶୋର ମହାପାତ୍ର, ସଞ୍ଜୟ ମହାପାତ୍ର, ସନ୍ତୋଷ ମହାପାତ୍ର, ବନ ବିହାରୀ ପଣ୍ଡା, ବିକାଶ ମହାପାତ୍ର, ମାଳି ସେବାୟତ ହାଡ଼ି ବନ୍ଧୁ ରଣା, କୁରୁପା ରଣା, ଧୃବ ରଣା, ବାବୁଲା ରଣାଙ୍କ ସମେତ ଛତିଶା ନିଜୋଗର ସେବାୟତ ଠାକୁରଙ୍କ ସେବା କାର୍ୟ୍ୟରେ ନିୟୋଜିତ ଥିବା ଜଣାପଡ଼ିଛି । ପୀଠଟି ଅନ୍ୟ ଜଗନ୍ନାଥ ପୀଠଠାରୁ ସ୍ୱତନ୍ତ୍ରତା ବହନ କରିଥାଏ । ଏହି ମନ୍ଦିରରେ ଚତୁର୍ଦ୍ଧା ମୂର୍ତ୍ତିଙ୍କର ପୂଜା କରାଯାଉ ନ ଥିବା ବେଳେ କେବଳ ଜଗନ୍ନାଥଙ୍କୁ ମହିମାମଣି ନାମରେ ପୂଜାର୍ଚ୍ଚନା କରାଯାଇଥାଏ ।
Comments are closed.