ପାଟଣା: ଅଲ ଇଣ୍ଡିଆ କିଷାନ କ୍ଷେତ ମଜ଼ଦୂର ସଂଗଠନର ଦ୍ୱିତୀୟ କେନ୍ଦୁଝର ଜିଲ୍ଲା ସମ୍ମିଳନୀ ପାଟଣା ବ୍ଲକ ଅନ୍ତର୍ଗତ କୋଡ଼ଖମଣ ଗାଁରେ ଅନୁଷ୍ଠିତ ହୋଇଯାଇଛି । ବରିଷ୍ଠ ଚାଷୀ ନେତା ଘନଶ୍ୟାମ ମହାନ୍ତଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମ୍ମିଳନୀରେ ଏ.ଆଇ.କେ.କେ.ଏମ.ଏସ୍ ର ରାଜ୍ୟ ସମ୍ପାଦକ କମ୍ରେଡ଼ ରଘୁନାଥ ଦାସ ଯୋଗ ଦେଇ ତାଙ୍କ ଆଲୋଚନା ପ୍ରସଙ୍ଗରେ ଦେଶରେ କେନ୍ଦ୍ର ସରକାର କୃଷି ବ୍ୟବସ୍ଥାକୁ କିଭଳି ଭାବେ କର୍ପୋରେଟ କରଣ କରିଚାଲିଛନ୍ତି ସେ ବିଷୟରେ ବିସ୍ତୃତ ଭାବେ ଆଲୋଚନା କରି କେନ୍ଦୁଝର ଜିଲ୍ଲାରେ ଚାଷୀ ମୁଲିଆ ଆନ୍ଦୋଳନ ବ୍ୟାପକ କରିବା ପାଇଁ ଆହ୍ୱାନ ଦେଇଛନ୍ତି। ଏହି ସମ୍ମିଳନୀରେ ତିନୋଟି ପ୍ରସ୍ତାବ ଯଥାକ୍ରମେ ମୂଳ ରାଜନୈତିକ ପ୍ରସ୍ତାବ, ସାଙ୍ଗଠନିକ ପ୍ରସ୍ତାବ ଓ ଆନ୍ଦୋଳନାତ୍ମକ କାର୍ଯ୍ୟକ୍ରମ ଉପରେ ଆଧାରିତ ପ୍ରସ୍ତାବ ଉପରେ ପ୍ରତିନିଧିମାନେ ନିଜ ନିଜର ବିଚାର ରଖିବା ପରେ ସର୍ବସମ୍ମତି କ୍ରମେ ଗୃହୀତ ହୋଇଛି ।
ଦାବି ମଧ୍ୟରେ ପୁରୁଷାନୁକ୍ରମେ ଭୋଗଦଖଲ କରି ଆସୁଥିବା ଦଖଲଦାରଙ୍କ ନାମରେ ବିନା ସଲାମିରେ ଦଖଲିକୃତ ଜମିକୁ ପଟ୍ଟା ପ୍ରଦାନ କରାଯାଉ, ମନରେଗା ଯୋଜନା ଅନୁଯାୟୀ ମୁଲିଆ ମାନଙ୍କୁ ଜବ କର୍ଡ ପ୍ରଦାନ କରି ବର୍ଷସାରା ଦୈନିକ ୫୦୦ ଟଙ୍କା ମଜୁରୀରେ କାମ ଯୋଗାଇ ଦିଆଯିବା, ଜଙ୍ଗଲ ଜମି ଅଧିକାର ଆଇନ ଅନୁଯାୟୀ ଦଖଲ ଦାରଙ୍କ ନାମରେ ପଟ୍ଟା ଦିଆଯିବା, ସରକାରୀ ଉଦ୍ୟୋଗରେ ଛୋଟ ଛୋଟ ନାଳ ନଦୀରେ ଚେକ ଡ୍ୟାମ ନିର୍ମାଣ କରାଯିବା, ସରକାରୀ ଉଦ୍ୟୋଗରେ କେନ୍ଦୁଝର ଜିଲ୍ଲାରେ ପ୍ରବାହିତ ବୈତରଣୀ ନଦୀ ସମେତ ଅନ୍ୟାନ୍ୟ ନଦୀମାନଙ୍କର ଉଭୟ ପାର୍ଶ୍ୱରେ ଉଠା ଜଳସେଚନ ବ୍ୟବସ୍ତା କରି ଜମିକୁ ଜଳ ଯୋଗାଇ ଦିଆଯିବା ଭଳି ଦାବି ରଖିଛନ୍ତି ।
ଆହୁରି ମଧ୍ୟ ସାର୍ବନିମ୍ନ ସହାୟକ ମୂଲ୍ୟକୁ ଆଇନର ଗ୍ୟାରେଣ୍ଟି ଦିଆଯିବା, ପ୍ରତି ପଂଚାୟତରେ ସରକାରୀ ଧାନ ମଣ୍ଡି ସ୍ଥାପନ କରି ବର୍ଷସାରା ଚାଷୀଙ୍କଠାରୁ ଧାନ ସଂଗ୍ରହ କରାଯିବା, କୃଷିଜାତ ଦ୍ରବ୍ୟ ସଂରକ୍ଷଣ ପାଇଁ ପ୍ରତି ବ୍ଲକରେ ଅନୁନ୍ୟ ୩ରୁ ଊର୍ଦ୍ଧ୍ଵ ସରକାରୀ ଶୀତଳ ଭଣ୍ଡାର ନିର୍ମାଣ କରାଯିବା, ଭାଗ ଚାଷୀମାନଙ୍କୁ ସରକାରୀ ମଣ୍ଡିରେ ଧାନ ବିକ୍ରି କରିବା ପାଇଁ ପରିଚୟ ପତ୍ର ଦିଆଯିବା ଓ ବିଦ୍ୟୁତ ସଂଶୋଧନ ବିଲ ୨୦୨୨ ବାତିଲ କରାଯିବା ଦାବି ନେଇ ଏହି ସମ୍ମିଳନୀରେ ଘନଶ୍ୟାମ ମହାନ୍ତ, ଜିଲ୍ଲା ସଭାପତି, ବେଣୁଧର ସର୍ଦ୍ଦାର, ଜିଲ୍ଲା ସମ୍ପାଦକ, ତ୍ରିଲୋଚନ ମହାନ୍ତ, ଉପସଭାପତି, ପ୍ରକାଶ ମଲ୍ଲିକ, ଅଫିସ ସମ୍ପାଦକ ତଥା କୋଷାଧ୍ୟକ ଭାବେ ସର୍ବସନମତି କ୍ରମେ ନିର୍ବାଚିତ ହେବା ସଂଗେ ସଂଗେ ଏକ ୮ ଜଣିଆ କାର୍ଯ୍ୟକାରୀ କମିଟି ନିର୍ବାଚିତ ହୋଇଛନ୍ତି। ଉପରୋକ୍ତ ୧୦ ଦଫା ଦାବି ନେଇ ଆଗାମୀ ଦିନରେ ଚାଷୀ ମୁଲିଆ ଆନ୍ଦୋଳନ କେନ୍ଦୁଝର ଜିଲ୍ଲାରେ ଗଢି ତୋଳିବା ପାଇଁ ନିଷ୍ପତ୍ତି ନିଆଯାଇଛି।
