ଇସଲାମାବାଦ : ଫାଇନାନ୍ସିଆଲ ଆକ୍ସଟ ଟାକ୍ସ ଫୋର୍ସ (ଏଫଏଟିଏଫ୍)ର ଧୂସର ତାଲିକାରେ ପାକିସ୍ତାନ ପୁନର୍ବାର ନିଜ ନାମ ବଜାୟ ରଖିଛି। ଫ୍ରାନ୍ସର ପ୍ୟାରିସରେ ଚାଲିଥିବା ଏଫଏଟିଏଫ ବୈଠକରେ ପାକିସ୍ତାନ ସମ୍ପର୍କରେ ମଙ୍ଗଳବାର ଏହି ନିଷ୍ପତ୍ତି ନିଆଯାଇଛି। ଏଫଏଟିଏଫର ସହଯୋଗୀ ସଂଗଠନ ଆନ୍ତର୍ଜାତିକ ସମନ୍ବୟ ସମୀକ୍ଷା ଗୋଷ୍ଠୀ (ଆଇସିଆରଜି) ପାକିସ୍ତାନର ଆତଙ୍କବାଦ ଦମନ ନୀତି ଉପରେ ଅନୁଧ୍ୟାନ କରିବା ପରେ ଏହି ନିଷ୍ପତ୍ତି ନିଆଯାଇଥିଲା। ବିଶ୍ବବ୍ୟାପୀ ଆତଙ୍କବାଦୀ ସଂଗଠନଗୁଡିକୁ ପାଣ୍ଠି ଯୋଗାଣ ବନ୍ଦ ଉପରେ ଗୁରୁତ୍ବ ଦେଉଥିବା ଏଫଏଟିଏଫ୍ ପାକିସ୍ତାନ ଧୂସର ତାଲିକାରେ ରଖିବା ସହିତ କଡା ଚେତାବନୀ ଦେଇଛି। ଆଗାମୀ ଦିନରେ ଆତଙ୍କବାଦ ଦମନ ନୀତିକୁ ଆହୁରି କଠୋର କରିବା ଲାଗି ପାକିସ୍ତାନକୁ ନିର୍ଦେଶ ଦିଆଯାଇଛି।
ବିଶେଷକରି ଆତଙ୍କବାଦୀ ସଂଗଠନଗୁଡିକୁ ଯେପରି ପାଣ୍ଠି ଯୋଗାଣ ନ ହେବ ଏବଂ ଆତଙ୍କବାଦୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୁହାଯାଇଛି। ରିପୋର୍ଟ ଅନୁଯାୟୀ ପାକିସ୍ତାନର ଆତଙ୍କବାଦ ଦମନ କାର୍ଯ୍ୟ ଉପରେ ଏଫଏଟିଏଫ୍ ସନ୍ତୋଷ ବ୍ୟକ୍ତ କରିବା ସତ୍ତ୍ବେ ଆଗାମୀ ଦିନରେ ଏହାକୁ ଅଧିକ କଡାକଡି କରିବାକୁ କୁହାଯାଇଛି। ଆତଙ୍କବାଦ ଦମନ ଲାଗି ଧାର୍ଯ୍ୟ ୨୭ଟି ମାନଦଣ୍ଡରୁ ୧୪ଟି ମାନଦଣ୍ଡକୁ ପାକିସ୍ତାନ ପୂରଣ କରିଛି। ବେଆଇନ ଅର୍ଥ କାରବାର ନିରୋଧ ଆଇନ ଓ ଆତଙ୍କବାଦୀ ସଂଗଠନକୁ ଅର୍ଥ ଚାଲାଣକୁ ନିୟନ୍ତ୍ରଣ ଲାଗି ପାକ୍ ଅନୁଷ୍ଠାନ ମଧ୍ୟରେ ସମନ୍ବୟ ଅଭାବ ରହିଥିବା ଏଫଏଟିଏଫ କହିଛି। ୨୦୧୮ ଜୁନ୍ରେ ପାକିସ୍ତାନ ପ୍ରଥମ କରି ଧୂସର ତାଲିକାଭୁକ୍ତ ହୋଇଥିଲା। ଏଥିପାଇଁ ଆବଶ୍ୟକ ମାନଦଣ୍ଡ ପୂରଣ କରିବାକୁ କୁହାଯାଇଥିଲା। ଅନ୍ୟଥା ଏହା କଳାତାଲିକାଭୁକ୍ତ ହେବାର ଧମକ ଦିଆଯାଇଥିଲା। ଧୂସର ତାଲିକାରୁ ଧଳାକୁ ଆସିବା ଲାଗି ପାକିସ୍ତାନକୁ ଏଫଏଟିଏଫର ୩୯ ସଦସ୍ୟଙ୍କ ମଧ୍ୟରୁ ୧୨ ସଦସ୍ୟଙ୍କ ସମର୍ଥନ ଆବଶ୍ୟକ। ଧୂସର ତାଲିକାରେ ରହିବା ଦ୍ବାରା ପାକିସ୍ତାନ ବିଶ୍ବବ୍ୟାଙ୍କ, ଆଇଏମଏଫ, ଏଡିବି ଓ ୟୁରୋପୀୟ ୟୁନିୟନ ଠାରୁ ଆବଶ୍ୟକ ଆର୍ଥିକ ସହାୟତା ପାଇବା କଷ୍ଟକର ହେବ।
