ନୂଆଦିଲ୍ଲୀ: ଆତଙ୍କବାଦକୁ ପ୍ରୋତ୍ସାହନ ଦେଉଥିବା ପାକିସ୍ତାନ ବିରୋଧରେ ଭାରତ ପକ୍ଷରୁ ବିଶ୍ଵସ୍ତରରେ ପକାଯାଉଥିବା ଚାପର ପ୍ରଭାବ ପଡ଼ିଛି। ଭାରତ ସହ ଲାଗିରହିଥିବା ଉତ୍ତେଜନାକୁ ହ୍ରାସ କରିବା ଲାଗି ପାକ୍ ପ୍ରଧାନମନ୍ତ୍ରୀ ପାକିସ୍ତାନୀ ଆତଙ୍କବାଦୀ ସଂଗଠନ ଜୈଶର ମୁଖ୍ୟ ମାସୁଦ ଆଝାରଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇପାରନ୍ତି। ଯଦି ମାସୁଦଙ୍କୁ ବିଶ୍ଵ ଆତଙ୍କବାଦୀ ଘୋଷଣା କରିବା ଲାଗି ଜାତିସଂଘ ସୁରକ୍ଷା ପରିଷଦରେ ପ୍ରସ୍ତାବ ଅଣାଯିବ ତାହାକୁ ପାକିସ୍ତାନ ବିରୋଧ କରିବ ନାହିଁ ବୋଲି ଇମ୍ରାନ ନିଷ୍ପତ୍ତି ନେଇଥିବା ଖବର ସରବରାହ ସଂସ୍ଥା ପିଟିଆଇକୁ ଏକ ସୂତ୍ରରୁ ସୂଚନା ମିଳିଛି।
ପିଟିଆଇ ସୂତ୍ର ଅନୁସାରେ ପାକିସ୍ତାନରେ ଜୈଶ ବିରୋଧରେ ଯେକୌଣସି ସମୟରେ କାର୍ଯ୍ୟାନୁଷ୍ଠାନ ନିଆଯାଇପାରେ। ଭାରତୀୟ ବାୟୁସେନା ୱିଙ୍ଗ କମାଣ୍ଡର ଅଭିନନ୍ଦନ ବର୍ଦ୍ଧମାନଙ୍କୁ ପାକିସ୍ତାନ ଭାରତକୁ ହସ୍ତାନ୍ତର କରିବା ପରେ ଏହା ଅନ୍ୟ ଏକ ଗୁରୁତ୍ଵପୂର୍ଣ୍ଣ ନିଷ୍ପତ୍ତି ବୋଲି କୁହାଯାଉଛି। ପାକିସ୍ତାନୀ ଖବରକାଗଜ ଏକ୍ସପ୍ରେସ ଟ୍ରିବ୍ୟୁନ ଏ ସମ୍ପର୍କରେ ଏକ ରିପୋର୍ଟ ପ୍ରକାଶ କରିଛି। ‘ଜାତିସଂଘ ସୁରକ୍ଷା ପରିଷଦରେ ମାସୁଦଙ୍କୁ ବିଶ୍ଵ ଆତଙ୍କବାଦୀ ଘୋଷଣା କରିବା ଦିଗରେ ପାକିସ୍ତାନ ଆଉ ବିରୋଧ କରିବ କି ?’ ବୋଲି ଏକ ପ୍ରଶ୍ନରେ ପାକିସ୍ତାନ ସରକାରଙ୍କ ଜଣେ ବରିଷ୍ଠ ଅଧିକାରୀ ଉତ୍ତର ଦେଇଛନ୍ତି ଯେ, ଦେଶକୁ ଏବେ ନିଷ୍ପତ୍ତି ନେବାକୁ ହେବ ଯେ ଜଣେ ବ୍ୟକ୍ତି ଗୁରୁତ୍ଵପୂର୍ଣ୍ଣ ନା ରାଷ୍ଟ୍ରର ହିତ ଗୁରୁତ୍ଵପୂର୍ଣ୍ଣ।
ସୂଚନାଯୋଗ୍ୟ, ଗତ ଫେବୃୟାରୀ ୨୭ରେ ଆମେରିକା, ଫ୍ରାନ୍ସ, ବ୍ରିଟେନ ପକ୍ଷରୁ ମାସୁଦଙ୍କୁ ବିଶ୍ଵ ଆତଙ୍କବାଦୀ ଘୋଷଣା କରିବାକୁ ଜାତିସଂଘ ସୁରକ୍ଷା ପରିଷଦରେ ପ୍ରସ୍ତାବ ଦିଆଯାଇଛି। କିନ୍ତୁ ଚୀନ ଏହି ମାମଲରେ ବର୍ତ୍ତମାନ ସୁଦ୍ଧା ନିଜର ଆଭିମୁଖ୍ୟ ସ୍ପଷ୍ଟ କରିନାହିଁ। ଯଦି ମାସୁଦଙ୍କୁ ବିଶ୍ଵ ଆତଙ୍କବାଦୀ ଘୋଷଣା କରାଯାଏ, ତେବେ ବିଶ୍ଵର କୌଣସି ସ୍ଥାନକୁ ତାଙ୍କ ଯାତ୍ରା ଉପରେ ପ୍ରତିବନ୍ଧକ ଲଗାଯାଇ ପାରିବା ସହ ସମସ୍ତ ସମ୍ପତ୍ତିକୁ ଫ୍ରିଜ କରିଦିଆଯିବ।
