ପ୍ରାକୃତିକ ବିପର୍ଯ୍ୟୟ ୟାସ୍ ବିଭିନ୍ନ ଜିଲ୍ଲାରେ ତାଣ୍ଡବଲୀଳା ରଚିଥିବା ବେଳେ ରାଜ୍ୟ ପୋଲିସ୍ର ସହାୟତାରେ ଅମ୍ଳଜାନ ଯୋଗାଣ କାର୍ଯ୍ୟ ଅବ୍ୟାହତ ରହିଥିଲା। ଅକ୍ସିଜେନ୍ ଅଭାବର ସମ୍ମୁଖୀନ ହେଉଥିବା ରାଜ୍ୟଗୁଡ଼ିକୁ ତଥା ରାଜ୍ୟ ମଧ୍ୟରେ ଟ୍ୟାଙ୍କର୍ ଯୋଗେ ସୁରକ୍ଷିତ ଭାବେ ପୋଲିସ୍ ଟ୍ୟାଙ୍କରକୁ ପଠାଇବାରେ ସକ୍ଷମ ହୋଇପାରିଥିଲା। ୟାସ୍ ଭଳି ପ୍ରାକୃତିକ ବିପର୍ଯ୍ୟୟ ସମୟରେ ମଧ୍ୟ ପୋଲିସ୍ ସୁରକ୍ଷା ବଳୟ ମଧ୍ୟରେ ଅନୁଗୁଳରୁ ୪ଟି ଅକ୍ସିଜେନ୍ ଟ୍ୟାଙ୍କର୍ ହାଇଦ୍ରାବାଦ୍ ଓ ବିଶାଖାପାଟଣା ଏବଂ ଯାଜପୁରରୁ ୨ଟି ଟ୍ୟାଙ୍କର୍ ବ୍ରହ୍ମପୁର ଓ ଭୁବନେଶ୍ୱର ଅଭିମୁଖେ ପଠାଯାଇଥିଲା।
ଅକ୍ସିଜେନ୍ ଯୋଗାଣ କାର୍ଯ୍ୟରେ ଯେଭଳି କୌଣସି ଅସୁବିଧା ସୃଷ୍ଟି ନ ହେବ ସେଥିପ୍ରତି ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ଆଇନ୍ ଓ ଶୃଙ୍ଖଳା) ଯଶୋୱନ୍ତ ଜେଠୱା ସ୍ୱତନ୍ତ୍ର ନଜର ରଖିଥିଲେ। ଅକ୍ସିଜେନ୍ ଯୋଗାଣର ସୁପରିଚାଳନା ନିମନ୍ତେ ସ୍ୱତନ୍ତ୍ର ଯୋଜନା ଏବଂ ଗାଇଡ୍ଲାଇନ୍ ପ୍ରସ୍ତୁତ କରାଯାଇଥିବା ବେଳେ ଟ୍ୟାଙ୍କର୍, ଡ୍ରାଇଭର୍ଏବଂ କର୍ମଚାରୀଙ୍କୁ ନିଯୁକ୍ତ କରାଯାଇଥିଲା।୬୦ଟି ଓଡ୍ରାଫ୍ ଟିମ୍ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହୋଇଥିବା ଜିଲ୍ଲାର ବିଭିନ୍ନ ସ୍ଥାନରେ ମୁତୟନ କରାଯାଇଥିଲା। ଭୀଷଣ ପବନ ଓ ବର୍ଷା ଯୋଗୁଁ ବିଭିନ୍ନ ସ୍ଥାନରେ ଜାତୀୟ ରାଜପଥ ତଥା ରାସ୍ତା ଉପରେ ଗଛ ଓ ଇଲେକ୍ଟ୍ରିକ୍ ଖୁଂଟ ପଡ଼ିଯାଇଥିଲା। ଯୁଦ୍ଧକାଳୀନ ଭିତିରେ ଓଡ୍ରାଫ୍ ବାହିନୀ ଦ୍ୱାରା ରାସ୍ତା ସଫା କରାଯାଇ ଟ୍ୟାଙ୍କର୍କୁ ନିର୍ଦ୍ଧାରିତ ସ୍ଥାନ ଅଭିମୁଖେ ପଠାଯାଇଥିଲା।
ଗତ ୩୪ ଦିନ ଧରି ରାଉରକେଲା, ଯାଜପୁର, ଅନୁଗୁଳ ଏବଂ ଢେଙ୍କାନାଳ ଜିଲ୍ଲାରୁ ୧୫ଟି ରାଜ୍ୟକୁ ଅକ୍ସିଜେନ୍ ଟ୍ୟାଙ୍କର୍ ପଠାଯାଉଛି।ଏ ପର୍ଯ୍ୟନ୍ତ ଓଡ଼ିଶାରୁ ୧୨୨୬ଟି ଟ୍ୟାଙ୍କର୍ ଯୋଗେ ୨୨୫୪୨.୮୯୫ ମେଟ୍ରିକ୍ ଟନ୍ ଅକ୍ସିଜେନ୍ ପଠାଯାଇଛି।
