ସମାଜ ଡିଜିଟାଲ ଡେସ୍କ: ବାଘ ଧରିବାକୁ ଚାଲିଛି କସରତ। ହେଲେ ବାଘର ଦେଖା ନାହିଁ। ଶନିବାର ସକାଳୁ ଭୁବନେଶ୍ଵର ବିମାନ ବନ୍ଦର ନିକଟ ଡମ୍ପିଂୟାର୍ଡ ଅଞ୍ଚଳରେ ବାଘକୁ କିଛି ଲୋକ ଦେଖିବା ପରେ ଏବେ ରାଜଧାନୀରେ ଆତଙ୍କ ଖେଳିଯାଇଛି। ବାଘ ଧରିବାକୁ ବନ ବିଭାଗ ପକ୍ଷରୁ ପ୍ରଥମେ ଗୋଟିଏ ଯନ୍ତା ବସାଯାଇଥିବାବେଳେ ସନ୍ଧ୍ୟାରେ ଆଉ ଗୋଟିଏ ଯନ୍ତା ବସାଯାଇଛି। ଦୁଇଟି ଯାକ ଯନ୍ତାରେ କୁକୁଡ଼ାକୁ ଥୋପ ଭାବେ ରଖାଯାଇଛି। ବାଘ କୁକୁଡ଼ା ଖାଇବା ଲୋଭରେ ଯନ୍ତାକୁ ଆସିଲେ ଧରାପଡ଼ିବ ବୋଲି ବନ ବିଭାଗ ଏଭଳି ଯୋଜନା କରିଛି। ଏହା ସହିତ ବାଘ ଧରିବାକୁ ଜାଲ ବି ବିଛାଯାଇଛି।
ଭୁବନେଶ୍ୱର ବିମାନବନ୍ଦର ଡ୍ରମ୍ପିଂୟାର୍ଡ ନିକଟରେ ଶନିବାର ସକାଳେ କାମ କରୁଥିବା କିଛି ଲୋକ ବାଘ ଦେଖିଥିବା କହିଛନ୍ତି। ନିକଟ ସ୍ଥାନରେ ବାଘର ପାଦ ଚିହ୍ନ ମଧ୍ୟ ରହିଛି । ସକାଳ ୯ଟା ୨୯ ମିନିଟ୍ରେ ଜଣେ ମହିଳା ବାଘକୁ ଦେଖିଥିବା କହିବା ପରେ ଅଞ୍ଚଳରେ ଭୟର ବାତାବରଣ ଖେଳିଯାଇଛି । ଖବର ପାଇ ବନବିଭାଗ ଟିମ୍ ଘଟଣାସ୍ଥଳରେ ପହଞ୍ଚିଛି । ବିମାନବନ୍ଦର କର୍ତ୍ତୃପକ୍ଷଙ୍କୁ ମଧ୍ୟ ଏ ନେଇ ସୂଚନା ଦିଆଯାଇଛି । ବାଘ କାବୁ ନ ହେବା ଯାଏଁ ଲୋକେ ସେହି ଅଞ୍ଚଳରେ କାମ କରିବେ ନାହିଁ ବୋଲି କହିଛନ୍ତି। ବାଘ ଧରିବାକୁ ୨୫ ଜଣ କର୍ମଚାରୀ ନିୟୋଜିତ ହୋଇଛନ୍ତି।
