ବାଲେଶ୍ୱର: ଉତ୍ତେଜନାପୂର୍ଣ୍ଣ ସ୍ଥିତି ଯୋଗୁଁ କଟକରେ ଇଣ୍ଟରନେଟ ସେବା ବନ୍ଦ କରାଯାଇଥିବାବେଳେ ବାଲେଶ୍ବର ସହରରେ ଆଜି ରାତି ୧୦ଟାରୁ ସମସ୍ତ ଦୋକାନ ବଜାର ବନ୍ଦ ପାଇଁ ପ୍ରଶାସନ ପକ୍ଷରୁ ଘୋଷଣା କରାଯାଇଛି। ନିକଟ ଅତୀତରେ ସହରର ଏକ ମସଜିଦରେ ଲାଇଟ ଭଙ୍ଗା ଓ ପତାକା ଛିଣ୍ଡାଇବା ଘଟଣାକୁ ନେଇ ପୁଲିସ-ପ୍ରଶାସନ ଏହି ପଦକ୍ଷେପ ନେଇଛି କି ବୋଲି ବିଭିନ୍ନ ମହଲରେ ପ୍ରଶ୍ନବାଚୀ ସୃଷ୍ଟି କରିଛି। କାହିଁକି ନା ଏବେ ବି ସହରର ପୁଲବଜାର ସମେତ ସୁନହଟ, ଗୋଳାପୋଖରୀ ପ୍ରଭୃତି ଅଞ୍ଚଳରେ ୯ ପ୍ଲାଟୁନ ପୁଲିସ ଓ ଫୋର୍ସ ମୁତୟନ ଅଛନ୍ତି। ପରିସ୍ଥିତିକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ପରୋକ୍ଷରେ ରାତ୍ରିକାଳୀନ କର୍ଫ୍ୟୁ ଲାଗୁ କରାଯାଇଛି କି ବୋଲି ପ୍ରଶ୍ନ ଉଠିଛି।
ତେବେ ଏ ସମ୍ପର୍କରେ ଜିଲା ଆରକ୍ଷୀ ଅଧୀକ୍ଷକ ପ୍ରତ୍ୟୁଷ ଦିବାକରଙ୍କୁ ପଚାରିବାରୁ ସେ ନାଇଟ କର୍ଫ୍ୟୁକୁ ଅସ୍ବୀକାର କରିଛନ୍ତି। ଗତକାଲି ପାଟ୍ରୋଲିଂବେଳେ ରାତି ୧୨ଟା ପରେ ବି ସହରର କିଛି ଅଞ୍ଚଳରେ ଦୋକାନ ଖୋଲା ରହିବା ସାଙ୍ଗକୁ ଲୋକେମାନେ ରୁଣ୍ଡ ହେଉଥିବା ଲକ୍ଷ୍ୟ କରାଯାଇଥିଲା। ଏହାକୁ ଦୃଷ୍ଟିରେ ରଖି ଏହି ରାତ୍ରିକାଳୀନ କଟକଣା ଲଗାଯାଇଛି। କିଛିଦିନ ପାଇଁ ଏହି କଟକଣା ରହିବ ବୋଲି ଏସପି ଶ୍ରୀ ଦିବାକର ସୂଚନା ଦେଇଛନ୍ତି। ଜିଲାପାଳଙ୍କ ନିର୍ଦେଶ ଆଧାରରେ ଏହା ଘୋଷଣା କରାଯାଇଥିବାବେଳେ ଏହାକୁ ନେଇ ଆତଙ୍କିତ ନ ହେବାକୁ ସେ ସହରବାସୀଙ୍କୁ ନିବେଦନ କରିଛନ୍ତି।
