ପାଚିଲା ଧାନ କିଆରୀ ଉଜାଡି ଦେଲା ବାତ୍ୟା

ଗୁରୁଡ଼ିଝାଟିଆ: ବାତ୍ୟା ‘ଦାନା’ କୃଷକର ଛଡାଇ ନେଇଛି ଦାନା। ମୁଣ୍ଡଝାଳ ତୁଣ୍ଡରେ ମାରି ଖରିଫ କରିଥିଲା। ଦାନା ବାତ୍ୟା ପ୍ରଭାବରେ ଲଗାଣ ବର୍ଷା ଯୋଗୁଁଁ ପାଚିଲା ଧାନ କିଆରୀ ବୁଡି ରହିଛି। ଆଉ ଘରକୁ ଆଣିବା ଅବସ୍ଥାରେ ନାହିଁ କୃଷକ। କ୍ଷେତରେ ହିଁ ଗଜା ହୋଇ ନଷ୍ଟ ହେବ। ଏଭଳି ଅବସ୍ଥା ଦେଖାଦେଇଛି ଗୁରୁଡ଼ିଝାଟିଆ ଅଞ୍ଚଳରେ। ବିଶେଷତଃ ସ୍ୱଳ୍ପ ମିଆଦି ଧାନ ପାଚି ଯାଇଥିଲା। ଆଉ କେତେକ ସ୍ଥଳରେ ମଥା ମାରିଥିଲା।ସ୍ୱଳ୍ପ ସମୟ ମଧ୍ୟରେ ଆବଶ୍ୟକ ଧାନକଟା ଯନ୍ତ୍ର ନମିଳିବାରୁ ବର୍ଷା ସାଙ୍ଗକୁ ପବନ ଯୋଗୁଁଁ ପାଚିଲା ଧାନ ଶୋଇପଡ଼ିଥିଲା। ଯାହା ଫଳରେ କି ଏବେ ପାଣି ତା ଉପରେ ରହିଛି। ଧୁରୁଷିଆ, ଅନନ୍ତପୁର, ଘଣ୍ଟିଖାଲ, କଖଡି, ମଞ୍ଚେଶ୍ୱର ପଞ୍ଚାୟତରେ ଏଭଳି ଅବସ୍ଥା ଦେଖିବାକୁ ମିଳିଛି। ବିଚରା କୃଷକ ମୁଣ୍ଡରେ ହାତ ଦେଇଛି। ବର୍ଷକର ଦାନା ତାର ପେଟରୁ ଛଡାଇ ନେଇଛି ବାତ୍ୟା ଦାନା। ସେହିଭଳି ଭାବେ ଦୀର୍ଘମିଆଦି ଧାନ ଏବେ ଥୋରମୁଖି। ତାହା ମଧ୍ୟ ପବନ ଯୋଗୁଁଁ କ୍ଷତିଗ୍ରସ୍ତ ହୋଇଛି। ଜମିରେ ଧାନଗଛ ଶୋଇପଡ଼ିବା ଯୋଗୁଁଁ ତା ଉପରେ ମଧ୍ୟ ପାଣି ଜମିରହିଛି। ଯାହାଫଳରେ କି ଥୋରଧାନ ସଠିକ୍‌‌ ଭାବେ ବାହାରି ପାରିବ ନାହିଁ। ଯାହାବି ବାହାରିବ ତାହା ପାଣିରେ ଆହାର ନେଇପାରିବ ନାହିଁ। ଗୁରୁଡ଼ିଝାଟିଆ ଅଞ୍ଚଳର ନବେଢ଼ା ପଞ୍ଚାୟତମାନଙ୍କରେ ଧାନ ବାହାରୁଥିବା ଅବସ୍ଥାରେ ଲଗାଣବର୍ଷା ଓ ପବନ ଯୋଗୁଁଁ ଅନେକ କିଆରୀରେ ଅଗାଡି ହେବାର ସମ୍ଭାବନା ଦେଖାଦେଇଛି। କୃଷି ବିଭାଗ ତରଫରୁ ଏହାର ଯଥା ରୀତି ଅନୁଧ୍ୟାନ ପୂର୍ବକ ତଦନ୍ତ କରାଯାଇ କ୍ଷତିଗ୍ରସ୍ତ କୃଷକଙ୍କୁ ସହାୟତା ରାଶି ଦେବା ସଂଗେ ସଂଗେ ରବି ଫସଲ ବିହନ ରିହାତିରେ ଯୋଗାଇଦେବା ପାଇଁ ସ୍ଥାନୀୟ ଅଞ୍ଚଳର କୃଷକମାନେ ଦାବି କରିଛନ୍ତି। ବିଶେଷତଃ ଏହାଦ୍ୱାରା କୌଣସି କୌଣସି ପ୍ରକାରେ ରବି ଫସଲ ରେ ଧାନକ୍ଷେତରେ ହୋଇଥିବା କ୍ଷତିକୁ ଭରଣା କରିପାରିବେ। ଏଥିପ୍ରତି ସ୍ୱତନ୍ତ୍ର ଦୃଷ୍ଟିଦେବା ପାଇଁ କୃଷକମାନେ ଦାବି କରିଛନ୍ତି।