ଆଠଗଡ: ସମ୍ଭାବ୍ୟ ବାତ୍ୟାକୁ ନେଇ ସମସ୍ତେ ଆଶଙ୍କିତ ଥିବାବେଳେ କେମିତି ଏହି ସମୟରେ ପରିବାର ପାଇଁ ଖାଦ୍ୟପେୟ ବ୍ୟବସ୍ଥା କରିବେ ସେଥିଲାଗି ଚିନ୍ତିତ ଅଛନ୍ତି। ବାତ୍ୟା ପୂର୍ବରୁ ଆଠଗଡ ଅଞ୍ଚଳରେ ପଡି କାର୍ଡଧାରୀଙ୍କୁ ଚାଉଳ ଯୋଗାଣ ପାଇଁ ଯୋଗାଣ ବିଭାଗର ନିର୍ଦେଶ ଅନୁଯାୟୀ ସମସ୍ତ ପିଡିଏସ ଖୁଚୁରା ବିତରକ ଉପଭୋକ୍ତାଙ୍କୁ ଚାଉଳ ଯୋଗାଣ ପାଇଁ ପଦକ୍ଷେପ ନେଇଛନ୍ତି। ତେବେ ମେଘା ପଞ୍ଚାୟତର ଦାସପୁର ଗ୍ରାମର ୯ନଂ ୱାର୍ଡବାସୀ ଏଥିରୁ ବଞ୍ଚିତ ହୋଇଛନ୍ତି। ଦାସପୁରର ୪ଟି ୱାର୍ଡ ମଧ୍ୟରୁ ୩ଟି ୱାର୍ଡର ପ୍ରାୟ ଅଧିକାଂଶ ଖାଉଟିଙ୍କୁ ପିଡିଏସ ଚାଉଳ ବଣ୍ଟନ କରାଯାଇଥିବା ବେଳେ ୯ନଂ ୱାର୍ଡବାସୀ ଚାଉଳ ପାଇନାହାନ୍ତି। ଆସନ୍ନ ବାତ୍ୟା ପୂର୍ବରୁ ସେମାନଙ୍କୁ ଚାଉଳ ଯୋଗାଇ ଦେବାକୁ ସେମାନେ ପିଡିଏସ ଡିଲରଙ୍କୁ ଅନୁରୋଧ କରିବା ସତ୍ତ୍ୱେ ସଂପୃକ୍ତ ଡିଲର ବୁଧବାର ସୁଦ୍ଧା ଚାଉଳ ଦେଲେ ନାହିଁ। ଫଳରେ ସଂପୃକ୍ତ ୱାର୍ଡର ଅଧିବାସୀ ଆଠଗଡ ଆସି ଉପଜିଲ୍ଲାପାଳଙ୍କ ଉଦ୍ଦେଶ୍ୟରେ ସହକାରୀ ଯୋଗାଣ ଅଧିକାରୀଙ୍କୁ ଏକ ସ୍ମାରକପତ୍ର ପ୍ରଦାନ କରିଥିଲେ। ଏହା ପୂର୍ବରୁ ଚଳିତ ବର୍ଷ ମାର୍ଚ୍ଚରୁ ଏପ୍ରିଲ ମାସ ପର୍ଯ୍ୟନ୍ତ ୩ ମାସର ପିଡିଏସ ଚାଉଳ ଦେଇନଥିଲେ। ସହକାରୀ ଯୋଗାଣ ଅଧିକାରୀଙ୍କ ହସ୍ତକ୍ଷେପ ଓ ନିର୍ଦ୍ଦେଶ ପରେ ସଂପୃକ୍ତ ଡିଲର ମେ ମାସ ପରେ ଚାଉଳ ଯୋଗାଇ ଦେଇଥିଲେ। ଏହିପରି ଭାବରେ ସଂପୃକ୍ତ ପିଡିଏସ ଡିଲର ସବୁବେଳେ ଦାସପୁର ଗ୍ରାମବାସୀଙ୍କୁ ଚାଉଳ ଯୋଗାଇବାରେ ହଇରାଣ ହରକତ କରୁଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ବୁଧବାର ଅଭିଯୋଗ ପାଇବା ପରେ ସହକାରୀ ଯୋଗାଣ ଅଧିକାରୀ ଜଗମୋହନ ଦାସ ସଂପୃକ୍ତ ଡିଲରଙ୍କୁ ତୁରନ୍ତ ଗୁରୁବାର ମଧ୍ୟରେ ତିନିମାସର ପିଡିଏସ ଚାଉଳ ଦାସପୁର ୯ନଂ ୱାର୍ଡର ହିତାଧିକାରୀଙ୍କୁ ଯୋଗାଇ ଦେବାକୁ ନିର୍ଦ୍ଦେଶ ଦେଇଥିଲେ। ସହକାରୀ ଯୋଗାଣ ଅଧିକାରୀ ବ୍ଲକର ଯୋଗାଣ ନିରୀକ୍ଷକ ମିଥୁନ ବେହେରାଙ୍କୁ ମେଘା ପଞ୍ଚାୟତର ଦାସପୁର ଯାଇ ହିତାଧିକାରୀଙ୍କୁ ଚାଉଳ ଯୋଗାଣ ହେଲା କି ନାହିଁ ତାହା ତଦାରଖ କରିବାକୁ ମଧ୍ୟ ପରାମର୍ଶ ଦେଇଛନ୍ତି।
Popular Categories
Previous article
Next article