ଦେଓଗାଁ: ରାଜୁଡ଼ା ଅମଳରୁ ହୋଇ ଆସୁଥିବା ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକ ଜରାସିଂହା ପାଟଖଣ୍ଡା ଯାତ୍ରାରେ ଅନେକ ପରମ୍ପରା ରହିଛି। ଯାତ୍ରା ଆରମ୍ଭ ହେବା ଦିନରୁ ଶେଷ ହେବା ପର୍ଯ୍ୟନ୍ତ ଢୋଲ ନିଶାନ ଓ ମୁହୁରୀ ଗୋଟିଏ ସ୍ୱରରେ ବାଜୁଥିବା ବେଳେ ଦେବୀ ଆବିର୍ଭାବ ହେବା ଦିନରୁ ନ ଗାଧୋଇ ଅକାଠୁଆ ରହନ୍ତି ୩୨ ଦେହୁରୀ। କେବଳ ଜମିଦାର ନିଜର ନିତ୍ୟକର୍ମ କରି ଗାଧୋଉ ଥିବା ବେଳେ ୩୨ ଦେହେରୀ ଅକାଠୁଆ ରହି କେବଳ ଜଳ ପାନ କରିବାର ନିଆରା ପରମ୍ପରା ରହିଛି।
ମଣିଷ ପ୍ରତି ଦିନ ଦିନକୁ ଦୁଇ ଥର ଦାନ୍ତ ଘଷୁଥିବା ବେଳେ ଆଧୁନିକ ଯୁଗର ମଣିଷ ୫ ଦିନ ଧରି ଅକାଠୁଆ ରହି ଦେବୀଙ୍କ ଶରଣରେ ରହିବା ଆଲୋଚନାର ବିଷୟ ହୋଇଛି। ଦେଝାର ଜଙ୍ଗଲରୁ ଦେବୀ ପାଟଖଣ୍ଡା ଉଚ୍ଚ ବାହାଳି, ବଉରା ପିଟା, ସେଲମାଙ୍କ ଖଳାରେ ଭକ୍ତଙ୍କ ଗୁହାରି ଶୁଣି ନିଷି ଗୁଡିକୁ ପ୍ରବେଶ କରିବା ପରେ ଏକ ବୋଦାକୁ ବଳି ଦେଇ ତାର କଲିଜାକୁ ମାଟି ହାଣ୍ଡିରେ ଭୋଗ ପସ୍ତୁତ କରି ଦେବୀଙ୍କ ପାଖରେ ଅର୍ପଣ କରିବା ପରେ ୩ ଜଣ ବାରିକ, ୩ ଜଣ ବାଜା ଵାଲା ଏବଂ ୬ ଜଣ ବାହା ଧରୁ କାଠି କରିବାର ପରମ୍ପରା ରହିଛି। ଏହି ୧୨ ଜଣଙ୍କୁ ଛାଡି ବାକି ଥିବା ୨୦ ଜଣ ଦେହେରୀ ପାଟଖଣ୍ଡା ଦେବୀ ଦେଝାରକୁ ଗମନ କରିବା ପରେ ଛତରକୁ ମନ୍ଦିରରେ ରଖି ଘରକୁ ଗଲେ କାଠି କରି ଗାଧୋଇବାର ପରମ୍ପରା ରହିଛି ବୋଲି ବୁଢୀ ଆଇ ଦେବୀଙ୍କ ପୂଜକ ଉଜ୍ବଳ ଝାଙ୍କର ପ୍ରକାଶ କରିଛନ୍ତି। ଖାଲି ଏତିକି ନୁହେଁ ଶହ ଶହ ବର୍ଷର ଯାତ୍ରାରେ ଅନେକ ଗୁଡ଼ିଏ ପରମ୍ପରା ରହିଛି। ମହଲାୟା ତଳେଇ ବସା ଦିନ ଠାରୁ ପାଟଖଣ୍ଡା ମନ୍ଦିରରେ ପୂଜା ଆରମ୍ଭ ହୋଇଥାଏ। ପ୍ରତି ଦିନ ଗୋଟିଏ ଗୋଟିଏ ଦହନା ମାଲ ନବମୀ ଦିନ ପର୍ଯ୍ୟନ୍ତ ଦିଆଯାଇଥାଏ। ଏହି ଦହନା ମାଲ ଓ ଚୁଲୁକୁ ପିନ୍ଧି ମୁଖ୍ୟ ଦେହେରୀ ଦେଝରକୁ ଗଲା ପରେ ବରୁଆ ଦେହରେ ଦେବୀ ଆବିର୍ଭାବ ହୋଇ ୫ ଦିନ ପାଇଁ ଯାତ୍ରା ଖଳାକୁ ଆସିବାର ପରମ୍ପରା ରହିଛି।
