କଲ୍ୟାଣସିଂହପୁର: ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସିଙ୍ଗାରି ପଞ୍ଚାୟତର କାଙ୍ଗସିରି ଗ୍ରାମର ମାନୁ ଶିକକାଙ୍କ ପୁଅର ଚିକିତ୍ସା ପାଇଁ ଅର୍ଥ ସାଜିଛି ବାଧକ। ମାନୁ ଶିକକାଙ୍କ ସ୍ତ୍ରୀ ସବିତା ଶିକକାଙ୍କ ୫ ବର୍ଷର ପୁଅ ଗୌତମ ଶିକକା ଜନ୍ମ ଗ୍ରହଣ କରିବାର ଦୁଇ ମାସ ହେବା ପରେ ତାକୁ ଭୀଷଣ ଜ୍ୱର ହୋଇଥିଲା। ପ୍ରଥମେ ପୁଅକୁ କଲ୍ୟାଣସିଂହପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। କିଛି ଦିନ ଧରି ଚିକିତ୍ସା ହେବା ପରେ ରାୟଗଡା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ସେଠାରେ ଏକ ମାସ ଧରି ରହିବା ପରେ କୋରାପୁଟ ମେଡିକାଲକୁ ପଠାଇ ଦେଇଥିଲେ। ପରେ ତାଙ୍କୁ ବ୍ରହ୍ମପୁର ବଡ଼ ମେଡିକାଲକୁ ଚିକିତ୍ସା ପାଇଁ ପଠା ଯାଇଥିଲା। ଆର୍ଥିକ ଅଭାବ ଯୋଗୁଁ ବ୍ରହ୍ମପୁର ମେଡିକାଲକୁ ନେଇ ପାରିନାହିଁ ବୋଲି କୋହ ଭରା କଣ୍ଠରେ କହିଛନ୍ତି ମାନୁ। ପୁଅର ଗୋଡ଼ ହାତ ବଙ୍କା ହୋଇଯାଇଥିବାରୁ ଠିଆ ହୋଇପାରୁ ନାହିଁ, କଥା କହି ପାରୁ ନାହିଁ ବୋଲି ମାଆ ସବିତା କହିଛନ୍ତି। ଏହି ପରିବାର ଆଦିବାସୀ ଶେଣୀର ଅଟନ୍ତି। କୁଲି କାମ କରି ପରିବାରର ୪ ପ୍ରାଣୀଙ୍କ ଭରଣପୋଷଣ କରିଆସୁଛନ୍ତି। ବର୍ତ୍ତମାନ ୫ ମାସର ପୁଅ ରହିଛି। କିପରି ପୁଅ ଗୌତମର ଚିକିତ୍ସା କରିବେ ବୋଲି ଚିନ୍ତାରେ ଭାଙ୍ଗି ପଡିଛନ୍ତି। ସରକାର ସାହାଯ୍ୟ କଲେ ପୁଅର ଉତ୍ତମ ଚିକିତ୍ସା କରିବେ ବୋଲି ଗୌତମର ମା’ କହିଛନ୍ତି।
Comments are closed.