ବଢ଼ିପାରେ ବିଧାୟକ ମାନଙ୍କ ଦରମା; ଗୃହରେ ଉଠିଲା ଗସ୍ତ ଖର୍ଚ୍ଚ ସହ ଦରମା ବୃଦ୍ଧି ପ୍ରସଙ୍ଗ, ଏବେ ପାଉଛନ୍ତି ଏତିକି ଟଙ୍କା

ଭୁବନେଶ୍ୱର: ବଢ଼ିପାରେ ବିଧାୟକ ମାନଙ୍କ ଦରମା । ବିଧାୟକ ମାନଙ୍କ ଦରମା ବୃଦ୍ଧି ହୋବାନେଇ ବିଧାନସଭାରେ ପ୍ରସଙ୍ଗ ଉଠିଛି । ସୂଚନା ଅନୁଯାୟୀ ଶୂନ୍ୟକାଳରେ ଏହି ପ୍ରସଙ୍ଗ ବିଜେଡି, ବିଜେପି, କଂଗ୍ରେସ ଓ ସ୍ୱାଧୀନ ବିଧାୟକ ମାନେ ଉଠାଇଛନ୍ତି । ଏହାକୁ ନେଇ ବିରୋଧୀ ଦଳର ମୁଖ୍ୟ ସଚେତକ ମୋହନ ମାଝୀ କହିଛନ୍ତି କିି, ଶେଷ ଥର ପାଇଁ ୨୦୧୭ ମସିହା ସେପ୍ଟେମ୍ବର ମାସ ୧୩ ତାରିଖରେ ବିଧାୟକ ମାନଙ୍କ ଦରମା ବୃଦ୍ଧି ପାଇଥିଲା । ଏହା ପରେ ଆଉ ବିଧାୟକ ମାନଙ୍କ ଦରମା ବୃଦ୍ଧି କରାଯାଇ ନାହିଁ ।

ବର୍ତ୍ତମାନ ବଜାରର ଦରଦାମ୍‍ ବୃଦ୍ଧି ପାଇଛି । ତେଣୁ ବିଧାୟକ ମାନଙ୍କ ଦରମା ସହ ଗସ୍ତ ଖର୍ଚ୍ଚ ବୃଦ୍ଧି କରାଯାଉ ବୋଲି ସେ କହିଛନ୍ତି । ଖାଲି ସେତିକି ନୁହେଁ ଅନ୍ୟ ରାଜ୍ୟର ବିଧାୟକ ମାନଙ୍କ ଦରମା ଆମ ରାଜ୍ୟର ବିଧାୟକ ମାନଙ୍କ ଠାରୁ ଅଧିକ ରହିଛି । ଓଡ଼ିଶାରେ ବିଧାୟକ ମାନେ ବର୍ତ୍ତମାନ ୯୯ହଜାର ୮ଶହ ଟଙ୍କା ଦରମା ପାଉଛନ୍ତି ବୋଲି ବିଧାନସଭାରେ କୁହାଯାଇଛି । ଏହାକୁ ନେଇ କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି ମଧ୍ୟ ତାଙ୍କ ବିବୃତି ରଖିଛନ୍ତି । ସେ ମଧ୍ୟ ଦରମା ବୃଦ୍ଧି କରିବାକୁ ଦାବି କରିିଛନ୍ତି । ଅନ୍ୟପଟେ ପୂର୍ବତନ ବିଧାୟକ ମାନେ ମାସିକ ପେନସନ ୩୦ ହଜାର ଟଙ୍କା ପାଉଛନ୍ତି ।

ତେଣୁ ଉଭୟ ବିଧାୟକ ଓ ପୂର୍ବତନ ବିଧାୟକ ମାନଙ୍କ ଦରମା ବୃଦ୍ଧି କରାଯାଉ ବୋଲି କୁହାଯାଇଛି । ବିଜେଡି ବିଧାୟକ ଅମର ପ୍ରସାଦ ଶତପଥୀ ଦରମା ଓ ମେଡିକାଲ ସହ ପେନସନ ବୃଦ୍ଧି କରିବାକୁ ଦାବିି କରିଛନ୍ତି । ସ୍ୱାଧୀନ ବିଧାୟକ ମକରନ୍ଦ ମୁଦୁଲି ମଧ୍ୟ ଏହାକୁ ସମର୍ଥନ ଜଣାଇବା ସହ ବିଧାୟକ ମାନଙ୍କ ଦରମା ବୃଦ୍ଧି କରିବାକୁ କହିଛନ୍ତି ।