ରାତି ପାହିଲେ ନୂଆଖାଇ ; ଉତ୍ସବମୁଖର ପଶ୍ଚିମ ଓଡ଼ିଶା

ସମ୍ବଲପୁର : ପଶ୍ଚିମ ଓଡ଼ିଶାର ଅନନ୍ୟ ଗଣପର୍ବ ନୂଆଖାଇ ଆସନ୍ତାକାଲି(ମଙ୍ଗଳବାର) ପାଳନ କରାଯିବ। ସେଥିପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି। ସୋମବାରଠାରୁ ସମଗ୍ର ପଶ୍ଚିମ ଓଡ଼ିଶାର ପୁରପଲ୍ଲୀ ଉତ୍ସବମୁଖର ହୋଇଉଠିଛନ୍ତି। ଦୂରଦୂରାନ୍ତରେ ରହୁଥିବା ପରିବାର ସ୍ୱଜନ ଗାଁକୁ ଫେରିଛନ୍ତି। ସେମାନଙ୍କ ଆଗମନରେ ଗାଁ ଓ ସହର ପୁରିଉଠିଛି। ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା’ ସମଲେଶ୍ବରୀ  ମନ୍ଦିରରେ ଆସନ୍ତାକାଲି ବିଶେଷ ପୂଜାର୍ଚ୍ଚନା କରାଯିବ। ମା’ ସମଲେଶ୍ୱରୀଙ୍କ ନବାନ୍ନ ଅର୍ପଣ ଲାଗି ଲଗ୍ନ ଧାର୍ଯ୍ୟ କରାଯାଇଛି। ଆସନ୍ତାକାଲି ସକାଳ ୧୦ଟା ୫ମିନିଟ୍‍ରୁ ୧୦ଟା ୨୦ମିନିଟ୍‍ ମଧ୍ୟରେ ମା’ ସମଲେଶ୍ୱରୀଙ୍କ ନିକଟରେ ନବାନ୍ନ ଲାଗି କରାଯିବା ନେଇ ସମୟ ସ୍ଥିର ହୋଇଛି।

ମାଟି, ମାଆ ଓ ପ୍ରକୃତିର ପୂଜା ଏହି ନିଆରା ପରମ୍ପରା ପାଇଁ ଆଜି ପଶ୍ଚିମ ଓଡ଼ିଶାର ବିଭିନ୍ନ ସ୍ଥାନରେ ସ୍ୱତନ୍ତ୍ର ହାଟ ବସିଛି। ଲୋକେ ହାଟରୁ ବିଭିନ୍ନ ସାମଗ୍ରୀ କିଣୁଛନ୍ତି। ନୂଆଖାଇ ପାଇଁ  ବଲାଙ୍ଗୀର, ସୁନ୍ଦରଗଡ଼, ବରଗଡ଼, କଳାହାଣ୍ଡି, ନୂଆପଡା ସମେତ ପଶ୍ଚିମାଞ୍ଚଳର ବିଭିନ୍ନ ସ୍ଥାନରେ ଜୋର୍‍ଦାର ପ୍ରସ୍ତୁତି ଚାଲିଛି।