ନୂଆଦିଲ୍ଲୀ : ଜାତୀୟ ରାଜଧାନୀ ଦିଲ୍ଲୀ ସମେତ ସମଗ୍ର ଉତ୍ତର ଭାରତରେ ଶୀତଲହରୀ ଜାରି ରହିଛି । ଦିଲ୍ଲୀରେ ଗୁରୁବାର ରାତିରେ ସର୍ବନିମ୍ନ ତାପମାତ୍ରା ୪.୨ ଡିଗ୍ରୀ ସେଲ୍ସିୟସ୍ ରେକର୍ଡ କରାଯାଇଛି। ୧୯୦୧ ମସିହା ପରଠାରୁ ଚଳିତ ବର୍ଷ ଡିସେମ୍ବର ମାସରେ ଦିଲ୍ଲୀ ଓ ଜାତୀୟ ରାଜଧାନୀ ଅଞ୍ଚଳରେ ସବୁଠାରୁ ଅଧିକ ଥଣ୍ଡା ଅନୁଭୂତ ହେବ ବୋଲି ଅନୁମାନ କରାଯାଉଛି। ପ୍ରତିକୂଳ ପାଗ ଯୋଗୁଁ ୨୧ଟି ଟ୍ରେନ୍ ବିଳମ୍ବରେ ଯାତ୍ରା କରୁଛି।
ପାଣିପାଗ ବିଭାଗ କହିଛି, ଏହି ଅଞ୍ଚଳରେ ଆକାଶ ପରିଷ୍କାର ରହିବା ସହ ଭୀଷଣ ଥଣ୍ଡା ଅନୁଭୂତ ହେବ। ହରିଆଣା ଓ ପଞ୍ଜାବରେ ମଧ୍ୟ ହାଡ଼ଭଙ୍ଗା ଶୀତ ଅନୁଭୂତ ହେଉଛି। ରାଜସ୍ଥାନର ଶିକର ଜିଲ୍ଲାର ଫତେପୁରଠାରେ ଚଳିତ ବର୍ଷର ସର୍ବନିମ୍ନ ତାପମାତ୍ରା ୩ ଡିଗ୍ରୀ ସେଲ୍ସିୟସ୍ ରେକର୍ଡ କରାଯାଇଛି। ମଧ୍ୟପ୍ରଦେଶରେ ବର୍ଷା, କୁହୁଡ଼ି ଓ କାଲୁଆପବନ ଯୋଗୁଁ ସ୍ଥିତି ଅସହ୍ୟ ହୋଇପଡ଼ିଛି । ବିହାରରେ ଅତ୍ୟଧିକ ଥଣ୍ଡା ଯୋଗୁଁ ଅଧିକାଂଶ ଜିଲ୍ଲାରେ ସରକାରୀ ସ୍କୁଲ୍ଗୁଡ଼ିକରେ ପାଠପଢ଼ା ବ୍ୟାହତ ହୋଇଛି। ହିମାଚଳ ପ୍ରଦେଶରେ ପାଗ ବର୍ତ୍ତମାନ ଶୁଖିଲା ରହିଥିଲେ ମଧ୍ୟ ଆସନ୍ତା ୩୧ ତାରିଖ ଓ ଜାନୁଆରୀ ୧ ତାରିଖରେ ରାଜ୍ୟର ଉଚ୍ଚ ପାର୍ବତ୍ୟାଞ୍ଚଳରେ ତୁଷାରପାତ ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି।
ଜାମ୍ମୁ କାଶ୍ମୀର ଓ ଲଦାଖ କେନ୍ଦ୍ରଶାସିତ ଅଞ୍ଚଳର କାର୍ଗିଲ୍ ଜିଲ୍ଲାର ଦ୍ରାସରେ ସର୍ବନିମ୍ନ ତାପମାତ୍ରା ବିଯୁକ୍ତ ୩୧. ୨ ଡିଗ୍ରୀ ସେଲ୍ସିୟସ୍ ରେକର୍ଡ କରାଯାଇଛି।
