ନୀଳଗିରି: ସମ୍ପ୍ରତି ବାଲେଶ୍ଵର ଜିଲା ଅଧୀନ ନୀଳଗିରିରେ ଗଜରାଜ୍ ଅସୁରକ୍ଷିତ ହୋଇପଡିଛି। ଦୀର୍ଘ ଦିନ ହେବ ନୀଳଗିରିର କୁଲଡିହା ଅଭୟାରଣ୍ୟରୁ ଖସି ଆସି ସ୍ଥାନୀୟ ତିନିକୋଶିଆ ଜଙ୍ଗଲରେ ଘୁରି ବୁଲୁଥିବା ଏକ ଦନ୍ତା ହାତୀର ଶୋଚନୀୟ ମୃତ୍ୟୁ ଘଟିଛି । ହାତୀର ଉପଦ୍ରବ ସମ୍ପର୍କରେ ଅଞ୍ଚଳବାସୀ ବନ ବିଭାଗକୁ ବାରମ୍ବାର ଅଭିଯୋଗ କରିଥିଲେ ସୁଧା କର୍ମଚାରୀ ମାନେ କର୍ତ୍ତବ୍ୟରେ ଖିଲାପ କରିବା ତଥା ହାତୀକୁ ନିଜ ସ୍ଥାନକୁ ନପହଞ୍ଚାଇବା ଯୋଗୁଁ ଏଭଳି ଶୋଚନୀୟ ମୃତ୍ୟୁ ଘଟିଥିବା ଅଭିଯୋଗ କରିଛନ୍ତି ।
ସେପଟେ କିଛିଦିନ ପୂର୍ବରୁ ଏହି ଦନ୍ତାଟି ନରଣପୁରର ବାରହାଗଡିଆ ଗାଁର ଜଣେ ଯୁବକକୁ କଚାଡି ମାରିଥିଲା । ପୁଣି ସେହି ଗାଁରେ ହାତୀଟି ମରି ପଡ଼ିଥିବା ଯୋଗୁଁ ଏହା ବିଷକ୍ରିଆରେ ମୃତ୍ୟୁ ହୋଇ ଥାଇପାରେ ବୋଲି ଅଭିଯୋଗ ଉଠିଛି । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ହାତୀ ମୃତ୍ୟୁର ରହସ୍ୟ ଉନ୍ମଚିତ ହେବ ବୋଲି କୁହାଯାଉଛି। ବନ ବିଭାଗ କର୍ମଚାରୀ ମାନେ ଘଟଣାସ୍ଥଳରେ ଉପସ୍ଥିତ ଅଛନ୍ତି ।
