ଗୋଆ: ମନୋହର ପାରିକରଙ୍କ ବିୟୋଗ ପରେ ଗୋଆ ବାଚସ୍ପତି ପ୍ରମୋଦ ସାୱନ୍ତ ରାଜ୍ୟର ନୂଆ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ସୋମବାର ବିଳମ୍ବିତ ରାତିରେ ରାଜ୍ୟପାଳ ତାଙ୍କୁ ପଦ ଏବଂ ଗୋପନୀୟତାର ସହ ଶପଥ ପାଠ କରାଇଥିଲେ। ଏହି ଅବସରରେ ସେ କହିଥିଲେ ଯେ, ପାରିକର ରାଜ୍ୟର ବିକାଶ ଲାଗି ଯେଉଁ ସବୁ ପଦକ୍ଷେପ ନେଇଥିଲେ ତାହାକୁ ସମ୍ପୂର୍ଣ୍ଣ କରିବାକୁ ସେ ପୂର୍ଣ୍ଣ ଉଦ୍ୟମ କରିବେ। ଏହାବ୍ୟତୀତ ବିଜେପିର ସହଯୋଗୀ ମହାରାଷ୍ଟ୍ରବାଦୀ ଗୋମନ୍ତକ ପାର୍ଟି(ଏମଜିପି)ର ସୁଦିନ ଧାବଲିକର ଏବଂ ଗୋଆ ଫରୱାର୍ଡ ପାର୍ଟିର ବିଜୟ ସରଦେଶାଇଙ୍କୁ ରାଜ୍ୟର ଉପମୁଖ୍ୟମନ୍ତ୍ରୀ ପଦ ଦିଆଯାଇଛି।
ସୂଚନା ମୁତାବକ, ପାରିକରଙ୍କ ମୃତ୍ୟୁ ପରେ ଗୋଆରେ ନୂଆ ମୁଖ୍ୟମନ୍ତ୍ରୀ କିଏ ହେବ ତାହାକୁ ନେଇ ବିବାଦ ଦେଖାଦେଇଥିଲା। ମେଣ୍ଟ ସରକାର ଗଢ଼ିଥିବା ବିଜେପିକୁ ସହଯୋଗୀ ଦଳଗୁଡ଼ିକ ସମର୍ଥନ କରିବେ ନାହିଁ ବୋଲି କଂଗ୍ରେସ ଯୁକ୍ତି କରିବା ସହ ରାଜ୍ୟରେ ସରକାର ଗଢ଼ିବାକୁ ରାଜ୍ୟପାଳଙ୍କ ନିକଟରେ ଦାବି କରିଥିଲା। ତେବେ ଶେଷରେ ବିଜେପି ବହୁ ବିଚାରବିମର୍ଶ କରିବା ପରେ ଏହାର ସହଯୋଗୀ ଦଳଗୁଡ଼ିକୁ ମନାଇବାରେ ସଫଳ ହୋଇଥିଲା।
