ଲଣ୍ଡନ : ବର୍ତ୍ତମାନ ୟୁରୋପରେ କରୋନାର ନୂଆ ପ୍ରଜାତି (ଭାରିଆଣ୍ଟ) ଏକ୍ସଇସି ଆତଙ୍କ ଖେଳାଇଥିବା ଜଣାପଡିଛି। ଗତ ଜୁନରେ ଜର୍ମାନୀରେ ଏହି ପ୍ରଜାତି ପ୍ରଥମେ ଚିହ୍ନଟ ହୋଇଥିବାବେଳେ ବର୍ତ୍ତମାନ ଏହା ୟୁରୋପର ୧୩ ରାଷ୍ଟ୍ରକୁ ବ୍ୟାପିଥିବା କୁହାଯାଇଛି। ଓମିକ୍ରନ ଉପ ପ୍ରଜାତି (ସବ୍ଭାରିଆଣ୍ଟ) କେଏସ.୧.୧ ଏବଂ କେପି.୩.୩.ର ମିଶ୍ରଣରୁ ଏକ୍ସଇସି ପ୍ରଜାତି ସୃଷ୍ଟି ହୋଇଥିବା ଜଣାପଡିଛି। କିଛି ବର୍ଷ ପୂର୍ବେ କେଏସ.୧.୧. ଉପ ପ୍ରଜାତିର ପ୍ରଭାବରେ ବିଶ୍ବରେ କୋଭିଡ୍ ଆକ୍ରାନ୍ତଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇଥିଲା। ଅପରପକ୍ଷରେ କେପି.୩.୩. ଉପ ପ୍ରଜାତି ଯୋଗୁଁ ମନୁଷ୍ୟ ଶରୀରର କୋଷକୁ କ୍ଷତିଗ୍ରସ୍ତ କରିଥିଲା। ବର୍ତ୍ତମାନ ଏକ୍ସଇସି ପ୍ରଜାତିର ଆବିର୍ଭାବ ଯୋଗୁଁ ଟିକା ଏବଂ ବୁଷ୍ଟର ଡୋଜ୍ ନେବା ଜରୁରୀ ବୋଲି ସ୍ବାସ୍ଥ୍ୟ ବିଶେଷଜ୍ଞମାନେ ପରାମର୍ଶ ଦେଇଛନ୍ତି। ଏହି ପ୍ରଜାତିରେ ଗୁରୁତର ଆକ୍ରାନ୍ତ କୋଭିଡ୍ ରୋଗୀଙ୍କୁ ମାଗଣାରେ ବୁଷ୍ଟର ଡୋଜ୍ ଦେବାକୁ ବ୍ରିଟେନର ଜାତୀୟ ସ୍ବାସ୍ଥ୍ୟ ସେବା ବିଭାଗ ପକ୍ଷରୁ କୁହାଯାଇଛି। ଏକ୍ସଇସି ପ୍ରଜାତି ଦ୍ବାରା ଆକ୍ରାନ୍ତ ରୋଗୀଙ୍କ ଶରୀରରେ ଜ୍ବର, କଫ, ଗଳା ଦରଜ, ଦେହମୁଣ୍ଡ ବ୍ୟଥା, ଅଳସୁଆପଣ ଏବଂ ଭୋକ ନ ହେବା ଭଳି ଲକ୍ଷଣ ଦେଖାଯାଇଥାଏ। ଓମିକ୍ରନ ପ୍ରଜାତିର ବଂଶଧର ହୋଇଥିବାରୁ ଟିକା ଦ୍ବାରା ଏକ୍ସଇସି ଆକ୍ରାନ୍ତ ଆରୋଗ୍ୟଲାଭ କରିପାରିବେ ବୋଲି କୁହାଯାଇଛି।
Popular Categories
Previous article
Next article