ନୂଆଦିଲ୍ଲୀ: ଆଜି ଦିଲ୍ଲୀରେ ବସିବ ଏନଡିଏ ନେତାଙ୍କ ବୈଠକ । ରାଷ୍ଟ୍ରପତି ନିର୍ବାଚନ ଓ ମୌସୁମୀ ଅଧିବେଶନ ପୂର୍ବରୁ ଏହି ବୈଠକ ବସୁଥିବା ଜଣାପଡ଼ିଛି । ଆଜି ସଂଧ୍ୟାରେ ବସିବାକୁ ଥିବା ଏହି ବୈଠକରେ ଉଭୟ ଗୃହର ସାଂସଦମାନେ ଏଥିରେ ଉପସ୍ଥିତ ରହିବେ । ଖାଲିସେତିକି ନୁହେଁ ଏହି ଆଲୋଚନାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ସାମିଲ ହେବେ ବୋଲି ସୂଚନା ମିଳିଛି ।
ଆଗକୁ ଆସୁଥିବା ରାଷ୍ଟ୍ରପତି ନିର୍ବାଚନ ଓ ମୌସୁମୀ ଅଧିବେଶନ ପାଇଁ ଏହି ବୈଠକ ଦଳ ପାଇଁ ବହୁ ଗୁରୁତ୍ୱପୂର୍ଣ୍ଣ ବହନ କରିବ । ଏହି ଦୁଇ ପ୍ରସଙ୍ଗକୁ ନେଇ ବିସ୍ତୃତ ଆଲୋଚନା କରାଯିବ । ସାଂସଦ ମାନେ ରାଷ୍ଟ୍ରପତି ନିର୍ବାଚନରେ ଅଂଶଗ୍ରହଣ କରିବାର ପ୍ରକ୍ରିୟା ବିଷୟରେ ବସିବାକୁଥିବା ଏହି ବୈଠକରେ ଅବଗତ ହେବା ସହ ସାଂସଦ ମାନଙ୍କୁ ଅନେକ ଗୁରୁମନ୍ତ୍ର ଦେଇପାରନ୍ତି ପ୍ରଧାନମନ୍ତ୍ରୀ । ଏନଡିଏ ପକ୍ଷରୁ ରାଷ୍ଟ୍ରପତି ନିର୍ବାଚନ ପାଇଁ ଦ୍ରୌପଦୀ ମୁର୍ମୁଙ୍କୁ ପ୍ରାର୍ଥୀ କରାଯାଇଥିବା ବେଳେ ଗତ ୨୪ ତାରିଖରେ ସେ ନାମାଙ୍କନ ଦାଖଲ କରିଥିଲେ । ତାଙ୍କ ନାମାଙ୍କନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ଏନଡିଏର ବହୁ ବଡ଼ ବଡ଼ ନେତା ଉପସ୍ଥିତ ଥିଲେ ।
ତାହାସହ ଅନ୍ୟ ଦଳର କିଛି ନେତା, ମନ୍ତ୍ରୀ ଓ ସାଂସଦ ମଧ୍ୟ ଉପସ୍ଥିତ ଥିବା ଦେଖିବାକୁ ମିଳିଥିଲା । ଭାରତରେ ପ୍ରଥମ ଥର ପାଇଁ ଦ୍ରୌପଦୀ ମୁର୍ମୁ ଆଦିବାସୀ ମହିଳା ରାଷ୍ଟ୍ରପତି ପ୍ରାର୍ଥୀ ହୋଇଛନ୍ତି । ଯଦି ଦ୍ରୌପଦୀ ଏହି ନିର୍ବାଚନ ଜିତନ୍ତି ତେବେ ସେ ଭାରତର ପ୍ରଥମ ଆଦିବାସୀ ମହିଳା ରାଷ୍ଟ୍ରପତି ଓ ଦ୍ୱିତୀୟ ମହିଳା ରାଷ୍ଟ୍ରପତି ହେବେ ।
