ନୟାଗଡ଼: ନୟାଗଡ଼ ସହରରେ ଚାଲିଥିବା ଏକ ନକଲି ନୋଟ କାରବାର ରାକେଟ୍ର ପୁଲିସ ପର୍ଦ୍ଦାଫାସ କରିଛି। ଏହି ପରିପ୍ରେକ୍ଷୀରେ,ଜଣେ ଅଭିଯୁକ୍ତ ଗିରଫ ହୋଇଥିଲା ଅନ୍ୟ ଜଣଙ୍କୁ ପୁଲିସ ଥାନାରେ ଅଟକ ରଖିଛି। ଗିରଫ ଅଭିଯୁକ୍ତ ଠାରୁ ୧ଲକ୍ଷ ୨୫ହଜାର ଟଙ୍କାର ୨୫୦ଖଣ୍ଡ ୫୦୦ ଟଙ୍କିଆ ନକଲି ନୋଟ, ଛପାଇବା ନିମନ୍ତେ ବ୍ୟବହୃତ ଯନ୍ତ୍ରପାତି, ପ୍ରିଣ୍ଟର, କମ୍ପ୍ୟୁଟର, କେମିକାଲ ଇତ୍ୟାଦି ପୁଲିସ ଜବତ କରିଛି। ଏହି ଘଟଣାର ଅଭିଯୁକ୍ତ ଖଣ୍ଡପଡ଼ା ଥାନା କୋସ୍କା ଫାଣ୍ଡି ଶରଧାପୁର ଗ୍ରାମର ଦିବ୍ୟ ଅଞ୍ଜନ ହୋତା ନୟାଗଡ଼ ଟାଉନର ରାଜାବଗିଚାରେ ଏକ ଭଡ଼ା ଘରେ ରହୁଥିଲା।
ସେଠାରେ ପୁଲିସ ଚଢ଼ଉ କରି ନକଲି ନୋଟ ଛପାଇବା ନିମନ୍ତେ କାଗଜ,କେମିକାଲ, ଡ଼େସଟେପ ପ୍ରିଣ୍ଟର ଇତ୍ୟାଦି ଜବତ କରିଛି ବୋଲି ଥାନା ଅଧିକାରୀ ଜୟଦୀପ ମହାନ୍ତି କହିଛନ୍ତି।
ଉଲ୍ଲେଖନୀୟ ଯେ, ଘଡୁଆଳଠାରେ ଥିବା ୟାମାହା ଶୋରୁମରୁ ଏକ ବାଇକ କିଣିବା ପାଇଁ ଖଣ୍ଡପଡ଼ା ଥାନା କୋସ୍କା ଫାଣ୍ଡି ଶରଧାପୁର ଗ୍ରାମର ଦିବ୍ୟ ଅଞ୍ଜନ ହୋତା ଯାଇଥିଲା। ବାଇକ କିଣିବା ପାଇଁ ସେ ଶୋରୁମ ମାଲିକଙ୍କୁ ୧ଲକ୍ଷ ୩୦ହଜାର ଟଙ୍କା ଦେଇଥିଲା। ତେବେ,ଏହି ନୋଟ ଗୁଡ଼ିକ ଦେଖି ଶୋରୁମ ମାଲିକଙ୍କ ସନ୍ଦେହ ହେବାରୁ ସେ ତୁରନ୍ତ ଟାଉନ ଥାନାକୁ ଖବର ଦେଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତକୁ ଗିରଫ କରିଥିଲାବେଳେ ଫତେଗଡ଼ ଥାନା ଅଞ୍ଚଳର ଅନ୍ୟଜଣଙ୍କୁ ଅଟକ ରଖାଯାଇଛି ବୋଲି ଶ୍ରୀ ମହାନ୍ତି ସୂଚନା ଦେଇଛନ୍ତି। ପୁଲିସ ଘଟଣାର ଅଧିକ ଅନୁସନ୍ଧାନ ଚଳାଇଛି।
