ବିଜେପି ନେତାଙ୍କୁ ଖଣ୍ଡାରେ ଆକ୍ରମଣ ଘଟଣା, ଗିରଫଦାରୀ ସଂଖ୍ୟା ୫କୁ ବୃଦ୍ଧି

ଗୋପାଳପୁର : ଗୋଳନ୍ଥରା ଥାନା ଅନ୍ତର୍ଗତ ହଳଦିଆପଦର ତୁଳୁ ରାସ୍ତା ଗତ ଶୁକ୍ରବାର ସନ୍ଧ୍ୟାରେ ଖଣ୍ଡାରେ ଆକ୍ରମଣ ଘଟଣାରେ ସମ୍ପୃକ୍ତ ୨ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ପୁଲିସ । ଯାହାଫଳରେ ଗିରଫଦାରୀ ସଂଖ୍ୟା ୫କୁ ବୃଦ୍ଧି ପାଇଛି। ଗିରଫ ଦୁଇ ଜଣ ରଣ୍ଢା ପଞ୍ଚାୟତର ସରପଞ୍ଚ ଅଜିତ କୁମାର ରାଉଳ ଓ କନିଷି ସାପ ମୁଖ୍ୟ ରାସ୍ତାର ଶୁଭାଶିଷ ସାହୁ ଓରଫ ବଣ୍ଟି ବୋଲି ପୁଲିସ ସୁଚନା ଦେଇଛି। ପୂର୍ବରୁ ଏହି ମାମଲାରେ ପୁଲିସ ସୁବାସ ଦାସ, ଆଶିଷ ଦଳାଇ ଓ ସଦାନନ୍ଦ ଦାସକୁ ଗିରଫ କରି କୋର୍ଟ ଚାଲାଣ କରିଥିବା ସହ ଆକ୍ରମଣରେ ବ୍ୟବହୃତ ଦୁଇଟି ଖଣ୍ଡା ଓ ୨ ଟି ମୋଟରସାଇକେଲ ଜବତ କରିଥିଲା। ଘଟଣା ପରେ ଆକ୍ରମଣ କାରୀଙ୍କ ବିରୋଧରେ ୫ ଟି ମାମଲା ରୁଜୁ ହୋଇଥିବାବେଳେ ଶୁଭାଶିଷଙ୍କ ଘର ଉପରକୁ ବୋମା ମାଡ ହୋଇଥିବା ଘଟଣାରେ ଏକ ମାମଲା ରୁଜୁ କରିଥିଲା। ଘଟଣା ଘଟାଇବାକୁ ବଣ୍ଟି ଓ ଅଜିତ ସହଯୋଗ କରିବା ସହ ସେମାନଙ୍କୁ ଉସୁକାଇ ଥିବା ନେଇ ପୁଲିସ ପକ୍ଷରୁ ସେମାନଙ୍କୁ ଗିରଫ କରାଯାଇଥିବା ପୁଲିସ ପକ୍ଷରୁ କୁହାଯାଇଛି ।