୧୦୩୭ ଶିକ୍ଷକ/ଶିକ୍ଷୟିତ୍ରୀଙ୍କ ମଧ୍ୟରୁ ୪୦ ପ୍ରତିଶତ ଉପସ୍ଥିତ ନାହାନ୍ତି, ଦୀର୍ଘବର୍ଷ ହେଲା ଭାରପ୍ରାପ୍ତ ବିଇଓରେ ଚାଲିଛି କାର୍ଯ୍ୟାଳୟ

ମୋହନା: ରାଜ୍ୟରେ ଏବେ ମହାମାରୀ କରୋନା ପାଇଁ ବିଭିନ୍ନ ମହଲରେ ଭୟର ବାତାବରଣ ଦେଖା ଦେଇଥିବା ବେଳେ ରାଜ୍ୟ ସରକାର ପୁଲିସ, ଡାକ୍ତର, ସ୍ୱାସ୍ଥ୍ୟକର୍ମୀ, ବ୍ଲକ କର୍ମଚାରୀ, ତହସିଲ କର୍ମଚାରୀ ଓ ଶିକ୍ଷାବିଭାଗ କର୍ମଚାରୀଙ୍କ ଛୁଟି ବାତିଲ କରିଛନ୍ତି। କିଛି କର୍ମଚାରୀ ନିଜ ପରିବାରକୁ ଛାଡି ରାତି ଦିନ ଏକକରି ଜନସାଧାରଣଙ୍କ ସେବାରେ ନିୟୋଜିତ ରହିଛନ୍ତି। ହେଲେ କିଛି ସରକାରୀ କର୍ମଚାରୀ କରେ।ନା ମହାମାରୀର ଫାଇଦା ଉଠାଇ ବ୍ଳକ ହେଡକ୍ୱାଟରରେ ଉପସ୍ଥିତ ନ ରହି ମଧ୍ୟ ମାସକର ବେତନ ଘରେ ବସି ରାଜକୋଷକୁ ଚଳୁ କରିବାରେ ଲାଗିଛନ୍ତି। ଏପରିକି ମୋହନା ବ୍ଲକର ବହୁ ଶିକ୍ଷକ କର୍ମକ୍ଷେତ୍ରରେ ଉପସ୍ଥିତ ନରହି ବାହାରେ ନିଜ ନିଜ ଗ୍ରାମରେ ବିଶ୍ରାମ ନେଇଛନ୍ତି। କିଛି ଶିକ୍ଷକ କମଳାପୁର ଚେକଗେଟରେ ଓ ସଂଗରୋଧ ଗୃହରେ ନିୟୋଜିତ ଅଛନ୍ତି। ହାତଗଣତି କିଛି ସିଆରସିସି ମଧ୍ୟ ଉପସ୍ଥିତ ରହୁଛନ୍ତି । ବାକି ସମସ୍ତେ ନିଜ ନିଜ ଗ୍ରାମରେ।

ଜିଲ୍ଲାପାଳଙ୍କ ଚିଠି ଅନୁଯାଇ ୧୦୩୭ ଜଣ ଶିକ୍ଷକ/ ଶିକ୍ଷୟିତ୍ରୀ ନିଜର ହେଡ କ୍ଵାଟରରେ ଉପସ୍ଥିତ ରହିବେ। ହେଲେ ଜିଲ୍ଲାପାଳ ଓ ଜିଲ୍ଲା ଶିକ୍ଷାଅଧିକାରୀଙ୍କ ନିୟମକୁ ଉଲଙ୍ଗନ କରି ହେଡକ୍ୱାଟର ଛାଡି ଶିକ୍ଷକ/ ଶିକ୍ଷୟିତ୍ରୀମାନେ ନିଜ ନିଜ ଘରେ ରହୁଛନ୍ତି। କିନ୍ତୁ ବିଦ୍ୟାଳୟର ପ୍ରଧାନଶିକ୍ଷକ ଓ ସମସ୍ତ ସହକାରୀ ଶିକ୍ଷକ /ଶିକ୍ଷୟିତ୍ରୀ ଉପସ୍ଥିତ ରହୁଥିବା କାଗଜପତ୍ରରେ ଦର୍ଶାଇ ସିଆରସିଙ୍କ ଜରିଆରେ ମାସିକ ଦରମା ବିଲ କରାଯାଉଛି। ଏପରିକି ସିଆରସିସିମାନେ ବିଦ୍ୟାଳୟ ପରିଦର୍ଶନ ନ କରି ଶିକ୍ଷକ/ଶିକ୍ଷୟତ୍ରୀଙ୍କ ଦସ୍ତ୍ରଖତ କରି ବ୍ଲକ ଶିକ୍ଷାଅଧିକାରୀଙ୍କ କାର୍ୟ୍ୟାଳୟରେ ଦରମା ବିଲ ଦେଉଛନ୍ତି।ତାହା ଏବେ ବୃଦ୍ଧିଜୀବି ମହଲରେ ଚର୍ଚାର ବିଷୟ ପାଲଟିଛି । ଏଠି ଶିକ୍ଷକ/ ଶିକ୍ଷୟିତ୍ରୀ ଓ ସିଆରସିସିଙ୍କ ମଧ୍ୟରେ ମଧୁଚନ୍ଦ୍ରିକା ଚାଲିଛି ।

ଏହି ବିଷୟରେ ମୋହନା ବ୍ଲକରେ ଭାରପ୍ରାପ୍ତ ରହିଥିବା ରା.ଉଦୟଗିରି ଗୋଷ୍ଠୀ ଶିକ୍ଷା ଅଧିକାରୀ ବିଶ୍ଵନାଥ ଭୂୟାଁଙ୍କୁ ପଚାରିବାରୁ ସେ କହିଛନ୍ତି ଏହି ବିଷୟରେ ମୁଁ କିଛି ଜାଣିନି । ତେବେ ଶିକ୍ଷାଅଧିକାରୀଙ୍କ ଅଜାଣତରେ କିପରି ଶିକ୍ଷକମାନେ ମାସିକ ଦରମା ନେଉଛନ୍ତି ଓ ହେଡକ୍ୱାଟର ଛାଡ଼ି ବାହାରେ ରହୁଛନ୍ତି ତାହା ତଦନ୍ତ ସାପେକ୍ଷ । ମୋହନାରେ ସ୍ଥାୟୀ ବ୍ଲକ ଶିକ୍ଷାଅଧିକାରୀ ନଥିବାରୁ ଏଠାରେ ପିସି କାରବାର ଜୋରସୋରରେ ଚାଲିଥିବା ଶୁଣିବାକୁ ମିଳୁଛି। ଏହାର ଉଚ୍ଚ ତଦନ୍ତ କରି ଦୁର୍ନିତୀଖୋର ଅଧିକାରୀଙ୍କ ପ୍ରତି ଦୃଢ କାର୍ୟ୍ୟାନୁଷ୍ଠାନ ଗ୍ରହଣ କରିବା ପାଇଁ ଅଞ୍ଚଳବାସୀଙ୍କ ପକ୍ଷରୁ ଦାବି ହେଉଛି।