ଗୁରୁଡ଼ିଝାଟିଆ: ୫୫ ନଂ ଜାତୀୟ ରାଜପଥର ରାଧାଦାମୋଦରପୁରଠାରେ ଦୁର୍ଘଟଣାରେ ଆରିୟାନ ପରିଡ଼ା ନାମକ ନାବାଳକ ମୃତ୍ୟୁ ଘଟିଥିଲା। କ୍ଷତିପୂରଣ ଦାବି, ତୁରନ୍ତ ଖୁଣ୍ଟୁଣୀ ଥାନାଠାରୁ ରାଧାଦାମୋଦରପୁର ଛକ ପର୍ୟ୍ୟନ୍ତ ଜାତୀୟ ରାଜପଥ ପାର୍ଶ୍ବରେ ସର୍ଭିସ ରୋଡ ନିର୍ମାଣ ଦାବି କରି ଉତ୍ତ୍ୟକ୍ତ ଲୋକେ ରାସ୍ତାରୋକ କରିଥିଲେ।
ଘଟଣାସ୍ଥଳରେ ଆଠଗଡ଼ ଉପଜିଲ୍ଲାପାଳ ପ୍ରଶାନ୍ତ କୁମାର ତରାଇ, ତହସିଲଦାର କ୍ଷେତ୍ରମୋହନ ସ୍ୱାଇଁ, ଚୌଦ୍ୱାର ଏସଡିପିଓ ଉମାକାନ୍ତ ନାୟକ, ଥାନା ଅଧିକାରୀ ଭବାନୀ ଶଙ୍କର ଖୁଣ୍ଟିଆ ପ୍ରମୁଖ ପହଞ୍ଚି ଧାରଣା ଦେଇଥିବା ଜନସାଧାରଣ ଓ ମୃତକଙ୍କ ପରିବାର ସଦସ୍ୟଙ୍କ ସହିତ ଆଲୋଚନା କରିଥିଲେ। ଜାତୀୟ ରାଜପଥ କର୍ତ୍ତୃପକ୍ଷ ତୁରନ୍ତ ସର୍ଭିସରୋଡ ନିର୍ମାଣ ପାଇଁ ପଦକ୍ଷେପ ନେବା ନିମନ୍ତେ ପ୍ରଶାସନ ରାଜପଥ କର୍ତ୍ତୃପକ୍ଷଙ୍କ ସହ ଆଲୋଚନା କରି ବ୍ୟବସ୍ଥା ଗ୍ରହଣ କରିବେ। ମୃତଦେହ ସତ୍କାର ପାଇଁ ରେଡକ୍ରସରୁ ୩୦ହଜାର ଟଙ୍କା ପ୍ରଦାନ କରାଯିବା ପରେ ଧାରଣା ପ୍ରତ୍ୟାହୃତ ହୋଇଥିଲା।
ସୂଚନାଯୋଗ୍ୟ, ଶୁକ୍ରବାର ଅପରାହ୍ନରେ ଦହିବରା ବିକ୍ରି କରୁଥିବା ରାଧାଦାମୋଦରପୁର ଗ୍ରାମର ଅକ୍ଷୟ କୁମାର ପରିଡ଼ା ଦହିବରା ବିକ୍ରିକରି ସାରି ଏକ ଅଟୋରେ ନିଜ ନାବାଳକ ପୁତୁରାକୁ ବସାଇ ଘରକୁ ଫେରୁଥିବା ବେଳେ ରାଧା ଦାମୋଦରପୁର ଛକରେ ଏକ ଅଜଣା ଗାଡି ଧକ୍କା ଦେଇଥିଲା। ଫଳରେ ପୁତୁରା ଆରିୟାନର ମୃତ୍ୟୁ ଘଟିଥିବା ବେଳେ ଦାଦା ଅକ୍ଷୟ ଗୁରୁତର ଆହତ ହୋଇଥିଲେ।
