ନୂଆଦିଲ୍ଲୀ : ଭାରତର କିମ୍ବଦନ୍ତୀ ମହିଳା ବକ୍ସର ମେରି କମ୍ ଏଠାରେ ଚାଲିଥିବା ବିଶ୍ୱ ମହିଳା ବକ୍ସିଂ ଚମ୍ପିଆନସିପ୍ରେ ରେକର୍ଡ ୬ଷ୍ଠ ଥର ପାଇଁ ସ୍ୱର୍ଣ୍ଣପଦକ ହାସଲ କରିଛନ୍ତି। ଶନିବାର ଅନୁଷ୍ଠିତ ୪୮ କିଗ୍ରା ବର୍ଗ ଫାଇନାଲରେ ମେରି ୫-୦ ପଏଣ୍ଟରେ ୟୁକ୍ରେନର ହାନା ଓକୋଟାଙ୍କୁ ପରାସ୍ତ କରିଛନ୍ତି। ଏଥରକୁ ମିଶାଇ ମେରି ବିଶ୍ୱ ଚମ୍ପିଆନସିପ୍ରେ ରେକର୍ଡ ୬ଷ୍ଠ ସ୍ୱର୍ଣ୍ଣପଦକ ସହ ମୋଟ ୭ଟି ପଦକ ଜିତିଛନ୍ତି। ମେରି ପୂର୍ବରୁ ୨୦୦୨ (ଆଣ୍ଟାଲ୍ୟା),୨୦୦୫(ପୋଡୋଲସ୍କ୍), ୨୦୦୬(ନୂଆଦିଲ୍ଲୀ), ୨୦୦୮(ନିଙ୍ଗ୍ବୋ ସିଟି) ଓ ୨୦୧୦ (ବ୍ରିଜଟାଉନ)ରେ ସ୍ୱର୍ଣ୍ଣ ଜିତିଥିବାବେଳେ ୨୦୦୧ (ସ୍କ୍ରାନ୍ଟନ୍)ରେ ରୌପ୍ୟପଦକ ହାସଲ କରିଥିଲେ। ଚଳିତ ଟୁର୍ଣ୍ଣାମେଣ୍ଟ ପୂର୍ବରୁ ମେରି କମ୍ ଓ ଆୟରଲାଣ୍ଡ ବକ୍ସର କ୍ୟାଟି ଟେଲର ବିଶ୍ୱ ଚମ୍ପିଆନସିପ୍ରେ ପ୍ରତ୍ୟେକ ୬ଟି ପଦକ ଜିତି ସମାନ ସ୍ଥିତିରେ ଥିଲେ। ତେବେ ଟେଲର ଇତିମଧ୍ୟରେ ପେସାଦାର ବକ୍ସିଂରେ ପ୍ରବେଶ କରିସାରିଥିବାରୁ ଏବର୍ଷ ବିଶ୍ୱ ଚମ୍ପିଆନସିପ୍ରେ ଅଂଶଗ୍ରହଣ କରିବାରୁ ବଞ୍ଚିତ ହୋଇଛନ୍ତି। ଏହି ପରିପ୍ରେକ୍ଷୀରେ ମେରି ବର୍ତ୍ତମାନ ୭ଟି ପଦକ ସହ ବିଶ୍ୱ ଚମ୍ପିଆନସିପ୍ରେ ସଫଳତମ ମହିଳା ବକ୍ସରର ମାନ୍ୟତାଲାଭ କରିଛନ୍ତି। ଏଭଳି କୃତିତ୍ୱ ଅର୍ଜନ କରିବାରେ ମେରି କ୍ୟୁବାର ପୁରୁଷ ବକ୍ସର ଫେଲିକ୍ସ ସାଭନଙ୍କ ସମକକ୍ଷ ହୋଇପାରିଛନ୍ତି। ବିଶ୍ୱ ବକ୍ସିଂ ଚମ୍ପିଆନସିପ୍ (ପୁରୁଷ ଓ ମହିଳା)ରେ ଉଭୟ ବକ୍ସର ୭ଟି ଲେଖାଏଁ ପଦକ ଜିତି ଯୁଗ୍ମଭାବେ ଶୀର୍ଷରେ ରହିଛନ୍ତି। ଏଭଳି ବିରଳ କୃତିତ୍ୱର ଅଧିକାରୀ ହେବାପରେ ମେରି ଷ୍ଟାଡିୟମରେ ଉପସ୍ଥିତ ଦର୍ଶକଙ୍କୁ ଧନ୍ୟବାଦ ଜଣାଇବା ସହ ବିଗତ କିଛି ବର୍ଷ ଧରି ସେମାନଙ୍କ ନିକଟରୁ ପାଇଥିବା ସମର୍ଥନକୁ ସ୍ୱୀକାର କରିଥିଲେ।
ବିଶ୍ୱ ଚମ୍ପିଆନସିପ୍ ବ୍ୟତୀତ ମେରି କମ୍ ୨୦୧୨ ଲଣ୍ଡନ ଅଲିମ୍ପିକ୍ସରେ ବ୍ରୋଞ୍ଜ, ୨୦୧୮ ରାଜ୍ୟଗୋଷ୍ଠୀ କ୍ରୀଡାରେ ସ୍ୱର୍ଣ୍ଣ, ଏସୀୟ କ୍ରୀଡାରେ ଗୋଟିଏ ସ୍ୱର୍ଣ୍ଣ (୨୦୧୪-ଇଞ୍ଚିଅନ) ଓ ଗୋଟିଏ ବ୍ରୋଞ୍ଜପଦକ (ଗ୍ୱାଙ୍ଗ୍ଝୌ) ଜିତିଛନ୍ତି। ମେରି ୨୦୦୩ରେ ଅର୍ଜୁନ ପୁରସ୍କାର, ୨୦୦୬ରେ ପଦ୍ମଶ୍ରୀ ଓ ୨୦୦୯ରେ ରାଜୀବ ଗାନ୍ଧୀ ଖେଳରତ୍ନ ପୁରସ୍କାରରେ ସମ୍ମାନିତ ହୋଇସାରିଛନ୍ତି। ମେରି ବର୍ତ୍ତମାନ ରାଜ୍ୟସଭା ସାଂସଦ ଅଛନ୍ତି।
ମାରିକମ୍ଙ୍କୁ ଷଷ୍ଠ ଥର ପାଇଁ ବିଶ୍ୱ ବକ୍ସିଂ ଚାମ୍ପିୟନସିପ୍ ଟାଇଟଲ
Popular Categories
Previous article
Next article