ବରିଷ୍ଠ ସାମ୍ବାଦିକ ନବୀନ ଦାସଙ୍କ ପୁଅ ମନୀଷ ଅନୁରାଗ ମୃତ୍ୟୁ ମାମଲାରେ କମିସନରେଟ ପୁଲିସକୁ ବଡ ସଫଳତା ମିଳିଛି। ଏହି ମୃତ୍ୟୁ ମାମଲାରେ କେଉଁମାନେ ସମ୍ପୃକ୍ତ, କେଉଁ ପରିସ୍ଥିତିରେ ମୃତ୍ୟୁ ଘଟିଛି, ପାଣିରେ ପଡିବା ପୂର୍ବରୁ କିମ୍ବା ପରେ ମୃତ୍ୟୁ ହୋଇଛି ଓ ଅଭିଯୁକ୍ତମାନେ କିଏ, ଏଭଳି କେତୋଟି ପ୍ରଶ୍ନକୁ ନେଇ କମିସନରେଟ ପୁଲିସ ଦିନରାତି ଏକ କରିଥିବା ବେଳେ ଏହି ଘଟଣାର ତଦନ୍ତ ପାଇଁ ଗଠିତ ସ୍ୱତନ୍ତ୍ର ଟିମ ଘଟଣାର ଖିଅ ଖୋଜି ପାଇବାରେ ସମର୍ଥ ହୋଇଛି। ଏହି ଘଟଣାରେ ସମ୍ପୃକ୍ତି ଥିବା ୩ ଜଣ ମୃତ୍ୟୁଞ୍ଜୟ ମିଶ୍ର ଓରଫ ମୁନ୍ନା, ଦିନେଶ ମହାପାତ୍ର ଓରଫ ଲିଟୁ ଓ ଅମ୍ରିତ ବିଶ୍ୱାଳଙ୍କୁ ଆଜି କମିସନରେଟ୍ ପୁଲିସ ଗିରଫ କରିଛି। ଡିସିପି ଉମାଶଙ୍କର ଦାଶ ଏକ ସାମ୍ବାଦିକ ସମ୍ମିଳନୀରେ ଏ ଘଟଣା ସମ୍ପର୍କରେ ସମ୍ପୂର୍ଣ୍ଣ ସୂଚନା ଦେବା ସହ ହତ୍ୟାକାଣ୍ଡ କିଭଳି ଘଟିଥିଲା, ତାହା ବିଷୟରେ ସୂଚନା ଦେଇଛନ୍ତି।
ଡିସିପି ଦାଶ କହିଛନ୍ତି, ମନୀଷ ଅନୁରାଗ ନିଜ ବନ୍ଧୁ କୁହାଯାଉଥିବା ଅମ୍ରିତ, ଦିନେଶ ଓ ମୃତ୍ୟୁଞ୍ଜୟଙ୍କ ସହ ହୋଟେଲକୁ ଯାଇଥିଲେ। ହୋଟେଲ ଭିତରେ ମଦ୍ୟପାନ ଓ ଖାଇବା ପରେ ଅର୍ଥ ପୈଠ କରିବାକୁ ନେଇ ସେମାନଙ୍କ ମଧ୍ୟରେ ଝଗଡା ହୋଇଥିଲା। ପରେ ମନୀଷ ନିଜ ବାପାଙ୍କ ଠାରୁ ଅର୍ଥ ଆଣି ପୈଠ କରିଥିଲେ କିନ୍ତୁ ହୋଟେଲ ବାହାରକୁ ଆସିବା ପରେ ସମ୍ପୃକ୍ତ ୩ ବନ୍ଧୁ ମନୀଷଙ୍କ ଉପରେ ଆକ୍ରମଣ କରିଥିଲେ ଯେଉଁଥିରେ ମନୀଷଙ୍କ ମୃତ୍ୟୁ ହୋଇଥିବା କୁହାଯାଇଛି। ପରେ ପ୍ରମାଣ ନଷ୍ଟ ଉଦ୍ଦେଶ୍ୟରେ ମନୀଷଙ୍କ ମୃତଦେହକୁ ନିକଟସ୍ଥ ପୋଖରୀରେ ଫିଙ୍ଗିଦେଇ ଚାଲିଯାଇଥିଲେ।
ଆଜି ଅମ୍ରିତ ବିଶ୍ବାଳ, ଦିନେଶ ମହାପାତ୍ର ଓ ମୃତ୍ୟୁଞ୍ଜୟ ମିଶ୍ରଙ୍କୁ କୋର୍ଟ ଚାଲାଣ କରାଯିବ ଏବଂ ପୁଲିସ ରିମାଣ୍ଡରେ ଆଣି ସିନ୍ ରିକ୍ରିଏଟ୍ କରିବ ବୋଲି ଡିସିପି କହିଛନ୍ତି। ଅଭିଯକ୍ତମାନଙ୍କ ବିରୋଧରେ ଆଇପିସିର ଧାରା ୩୬୪(ଏ), ୩୦୨, ୨୦୧ ଓ ୩୪ରେ ମାମଲା ରୁଜ୍ଜୁ କରାଯାଇଛି। ଅନ୍ୟପକ୍ଷରେ ଶବ ବ୍ୟବଚ୍ଛେଦର ପ୍ରାଥମିକ ରିପୋର୍ଟରେ ଶ୍ୱାସରୁଦ୍ଧ ହୋଇ ତାଙ୍କର ମୃତ୍ୟୁ ହୋଇଥିବା ନେଇ ସ୍ପଷ୍ଟ ହୋଇଛି। ଏସଂପର୍କରେ ଏମ୍ସ ପିଆରଓ ପ୍ରଭାସ ତ୍ରିପାଠୀ ସୂଚନା ଦେଇଛନ୍ତି।
