କଲକାତା: କରୋନା ରୋଗୀଙ୍କ ଚିକିତ୍ସା ପାଇଁ ଦରକାର ପଡ଼ୁଥିବା ଅମ୍ଳଜାନ ଟାଙ୍କି ଏବଂ ଔଷଧ ଓ ବିଭିନ୍ନ ଉପକରଣ ଉପରେ କେନ୍ଦ୍ର ସରକାର ସାମଗ୍ରୀ ଓ ସେବା କର (ଜିଏସଟି) ସମେତ ଅନ୍ୟାନ୍ୟ ଶୁଳ୍କ ଲାଗୁ କରିଛନ୍ତି। ଏହାକୁ ବିଭିନ୍ନ ମହଲରେ ତୀବ୍ର ବିରୋଧ କରାଯାଉଥିବାବେଳେ ରବିବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖିଛନ୍ତି। କରୋନା ଚିକିତ୍ସା ପାଇଁ ଦରକାର ପଡ଼ୁଥିବା ଉପକରଣ, ଅମ୍ଳଜାନ ଏବଂ ଔଷଧ ଉପରୁ ସମସ୍ତ ପ୍ରକାର ଶୁଳ୍କ ଛାଡ଼ କରିବାକୁ ମମତା ଚିଠିରେ ଦାବି କରିଛନ୍ତି।
ସୂଚନାଯୋଗ୍ୟ, ଦେଶର ବହୁ ସଂଗଠନ, ବ୍ୟକ୍ତି ବିଶେଷ, ବେସରକାରୀ ସଂସ୍ଥା କରୋନା କାଳରେ ରୋଗୀଙ୍କୁ ସହାୟତା କରିବାକୁ ଆଗେଇ ଆସିଛନ୍ତି। ସେମାନେ ଅମ୍ଳଜାନ ଟାଙ୍କି, କନ୍ସେନ୍ଟ୍ରେଟର, କ୍ରାୟୋଜେନିକ ଷ୍ଟୋରେଜ ଟାଙ୍କି, ଟ୍ୟାଙ୍କର, କଣ୍ଟେନର ଏବଂ କରୋନା ଚିକିତ୍ସା ପାଇଁ ଦରକାର ହେଉଥିବା ଔଷଧ ଯୋଗାଇ ଦେଉଛନ୍ତି। ଅନେକ ବ୍ୟକ୍ତି ରାଜ୍ୟ ସରକାରଙ୍କୁ ଆର୍ଥିକ ସହାୟତା ମଧ୍ୟ କରୁଛନ୍ତି। ତେବେ ସେମାନେ କରୋନା ଚିକିତ୍ସା ପାଇଁ ଦରକାର ପଡ଼ୁଥିବା ସମସ୍ତ ସାମଗ୍ରୀ କ୍ରୟ ସମୟରେ ଆମଦାନୀ ଶୁଳ୍କ, ଏସଜିଏସଟି, ସିଜିଏସଟି, ଆଇଜିଏସଟି ଆଦି ପ୍ରଦାନ କରୁଛନ୍ତି। ତେଣୁ ଏଗୁଡ଼ିକୁ ଛାଡ଼ କରିବା ଲାଗି ଦାନ ଦେଉଥିବା ବ୍ୟକ୍ତି ଓ ସଂଗଠନ ଦାବି କରୁଥିବା ମମତା ଚିଠିରେ ଲେଖିଛନ୍ତି।
