ନୂଆଦିଲ୍ଲୀ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମସି ମୁଖ୍ୟ ମମତା ବାନାର୍ଜୀ ଗୁରୁବାର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କୁ ଭେଟିଛନ୍ତି। କଲକାତାର ପୂର୍ବତନ ପୁଲିସ କମିଶନର ରାଜୀବ କୁମାରଙ୍କ ମୁଣ୍ଡ ଉପରେ ସିବିଆଇ ଖଣ୍ଡା ଝୁଲୁଥିବାବେଳେ ତାଙ୍କୁ ସୁରକ୍ଷା ଦେବା ପାଇଁ ମମତା ଅମିତ ଶାହଙ୍କୁ ଭେଟିଥିବା ଚର୍ଚ୍ଚା ଜୋର ଧରିଛି। ରାଜୀବ କୁମାର ମମତାଙ୍କର ଅତି ଘନିଷ୍ଠ ହୋଇଥିବାରୁ ମମତା ତାଙ୍କୁ ରକ୍ଷା କରିବା ଲାଗି ପ୍ରୟାସ କରୁଥିବା ଆଲୋଚନା ହେଉଛି।
ତେବେ ଶାହଙ୍କୁ ଭେଟିବା ପରେ ମମତା କହିଥିଲେ, ପଶ୍ଚିମବଙ୍ଗରେ ଏନଆରସିକୁ ନେଇ ଶାହଙ୍କ ସହିତ କୌଣସି ଆଲୋଚନା ହୋଇନାହିଁ। ସେ ଶାହଙ୍କୁ ଏକ ପତ୍ର ପ୍ରଦାନ କରିଛନ୍ତି, ଯେଉଁଥିରେ ଏନଆରସିରୁ ବାଦ୍ ପଡ଼ିଥିବା ଲୋକମାନଙ୍କୁ ଆଉ ଏକ ସୁଯୋଗ ଦେବା ଲାଗି ନିବେଦନ କରିଛନ୍ତି ବୋଲି କହିଛନ୍ତି। ସୂଚନାଯୋଗ୍ୟ, ମମତା ୩ଦିନିଆ ଦିଲ୍ଲୀ ଗସ୍ତରେ ଆସିଛନ୍ତି। ସେ ଗତ ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିଥିଲେ। ଏହି ସାକ୍ଷାତକୁ ମମତା ଦୁଇ ସରକାର ମଧ୍ୟରେ ବୈଠକ ବୋଲି ଦର୍ଶାଇଥିଲେ। ରାଜ୍ୟର ବିକାଶ ପ୍ରସଙ୍ଗ ଉପରେ ଉଭୟଙ୍କ ମଧ୍ୟରେ ଆଲୋଚନା ହୋଇଥିବା ଗଣମାଧ୍ୟମକୁ ସୂଚନା ଦେଇଥିଲେ।
