ମାଲାକାନଗିରି : ଅଧାରାସ୍ତାରେ ଆଖି ବୁଜିଲେ ମାଲାକାନଗିରି ପୀଡ଼ିତା । ଗୁରୁତର ଅବସ୍ଥାରେ ମାଲକାନଗିରି ଜିଲା ସଦର ଚିକିତ୍ସାଳୟରେ ଭର୍ତ୍ତି ହୋଇଥିଲେ ।ଦୁଇଦିନ ହେଲା ଚେତାଶୂନ୍ୟ ଅବସ୍ଥାରେ ଥିବାବେଳେ ଏବେ ହସ୍ପିଟାଲରେ ଜୀବନ ସହ ସଂଗ୍ରାମ କରୁଥିଲେ ପୀଡ଼ିତା । ତେବେ ପୀଡିତାଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତର କରାଯାଇଥିଲା। ହେଲେ ଯିବା ରାସ୍ତାରେ ରାୟଗଡା ନିକଟରେ ତାଙ୍କର ମୃତ୍ୟୁ ହୋଇଛି। ଏହି ଘଟଣାରେ ମାଲକାନଗିରି ପୋଲିସ୍ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିବା ବେଳେ ମାଲକାନଗିରି ଏସପି ଏହି ଘଟଣାକୁ ଗମ୍ଭୀରତାର ସହ ନେଇ ଏକ ସ୍ବତସ୍ତ୍ର ଟିମ୍ ଗଠନ କରି ତଦନ୍ତ କରିବାକୁ ନିର୍ଦେଶ ଦେଇଛନ୍ତି । 
ସୂଚନା ଅନୁସାରେ, ମହିଳା ଜଣକ ମାଲକାନଗିରି ପୁଲିସ କ୍ୟାଣ୍ଟିନରେ କାମ କରୁଥିଲେ। ତାଙ୍କ ସ୍ବାମୀ ୩ୟ ବିବାହ କରିବା ପରେ ସମୟେ ସମୟେ ତାଙ୍କ ନିକଟକୁ ଯାଇ ତାଙ୍କ ଭଲମନ୍ଦ ପଚାରି ବୁଝୁଥିଲେ। ୨ଦିନ ତଳେ ପୁଲିସ କ୍ୟାଣ୍ଟିନର ଜଣେ କର୍ମଚାରୀ ତାଙ୍କ ଘରକୁ ଆସି ସ୍ତ୍ରୀଙ୍କ ଦେହ ବହୁତ ଖରାପ ଥିବା ସୂଚନା ଦେଇଥିଲେ। ଏହା ପରେ ସ୍ବାମୀ ସ୍ତ୍ରୀ ରହୁଥିବା ସ୍ଥାନକୁ ଯାଇଥିଲେ। ତାଙ୍କ ଘରେ ପହଞ୍ଚିଲା ବେଳକୁ ମହିଳା ଜଣକ ଚେତା ହରାଇ ତଳେ ପଡ଼ିରହିଥିଲେ। ଶରୀରର ଏକାଧିକ ସ୍ଥାନରୁ ରକ୍ତସ୍ରାବ ହେଉଥିବା ଦେଖି ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ୨ ଦିନ ଧରି ଚେତାଶୂନ୍ୟ ରହିବା ପରେ ରବିବାର ଅପରାହ୍ନରେ କିଛି ସମୟ ପାଇଁ ତାଙ୍କର ଚେତା ଆସିଥିଲା। ଘଟଣା ସମ୍ପର୍କରେ ସ୍ବାମୀ ଥାନାରେ ଅଭିଯୋଗ କରି କହିଥିଲେ ତାଙ୍କ ସ୍ତ୍ରୀଙ୍କୁ ଦୁଷ୍କର୍ମ କରି ହତ୍ୟା କରାଯାଇଛି । ଏଥି ସହିତ ତାଙ୍କ ସ୍ତ୍ରୀକୁ ଦୁଷ୍କର୍ମ କରିବା ପରେ ତାଙ୍କୁ ହତ୍ୟା କରିବାକୁ ଉଦ୍ୟମ କରାଯାଇଥିବା ମଧ ମହିଳାଙ୍କ ସ୍ବାମୀ ଥାନାରେ ଏତଲାରେ ଦର୍ଶାଇଥିଲେ ।
