ଭୁବନେଶ୍ବର : ମିଳିଲା ହସ୍ପିଟାଲରୁ ଚୋରି ହୋଇଥିବା ଶିଶୁ । ବାଲେଶ୍ବର ଜିଲା ମୁଖ୍ୟ ହସ୍ପିଟାଲରୁ ଶିଶୁ ପୁତ୍ର ଚୋରି ଘଟଣାରେ ଶିଶୁ ପୁତ୍ର ମିଳିବା ସହ ଜଣେ ମହିଳାଙ୍କୁ ଅଟକ ରଖିଛି ପୁଲିସ । ଗତକାଲି ହସ୍ପିଟାଲରୁ ଶିଶୁ ପୁତ୍ର ଗାଏବ ହେବା ଘଟଣା ସମସ୍ତଙ୍କୁ ଚକିତ କରିଥିଲା । ଶିଶୁ ଚୋରି ହେବା ନେଇ ତା ପିତା-ମାତା ଥାନାରେ ଅଭିଯୋଗ କରିଥିଲେ । ସୂଚନା ଅନୁସାରେ ଶିଶୁର ପିତା-ମାତା ବାଲିଆପାଳ ଆଠବାଟିଆର ଅଧିବାସୀ । ସପ୍ତାହେ ତଳେ ମହିଳା ଜଣକ ଶିଶୁପୁତ୍ରକୁ ଜନ୍ମ ଦେଇଥିଲେ । ତେବେ ଚିକିତ୍ସା ଚାଲିଥିବା ସମୟରେ କେହି ପିଲାକୁ ଚୋରି କରିନେଇଥିବା ଅଭିଯୋଗ ଆଣିଥିଲେ ଦମ୍ପତି । ଅଭିଯୋଗ ପରେ ସାରା ରାତି ଖୋଜାଖୋଜି କରିବା ପରେ ଦୁର୍ଗାଦେବୀରୁ ଶିଶୁ ପୁତ୍ର ମିଳିଥିଲା । ପିଲାକୁ ଜଣେ ମହିଳା ଚୋରି କରି ନେଇଯାଇଥିବା ଜଣାପଡିଥିଲା । ତେବେ ମହିଳାଙ୍କୁ ଥାନାରେ ଅଟକ ରଖି ପଚରାଉଚରା କରୁଛି ପୁଲିସ ।
Comments are closed.