କେନ୍ଦ୍ରୀୟ ଯୋଜନାର ସଠିକ କ୍ରିୟାନ୍ୱୟନ ପାଇଁ ପଞ୍ଚାୟତ ପ୍ରତିନିଧିଙ୍କ ସାମିଲ ଜରୁରୀ : ଧର୍ମେନ୍ଦ୍ର ପ୍ରଧାନ

ଡେସ୍କ :  ପଞ୍ଚାୟତିରାଜ ସଂସ୍ଥା ମାନଙ୍କର ପ୍ରତିନିଧି ମାନଙ୍କୁ ସଠିକ ଭାବେ ଶକ୍ତିଶାଳୀ ନ କଲେ ଓ ସେମାନଙ୍କୁ ସାମିଲ ନ କଲେ କେନ୍ଦ୍ରୀୟ ଯୋଜନା ଗୁଡିକର ସଠିକ ଭାବେ କ୍ରିୟାନ୍ୱୟନ କିମ୍ବା ଧନରାଶିର ସଠିକ ବିନିଯୋଗ ହୋଇ ପାରିବ ନାହିଁ । ଭୁବନେଶ୍ୱର ଠାରେ ପଞ୍ଚାୟତରେ (ଏଲଏସଡିଜି) ଲୋକାଲାଇଜେସନ୍ ଉପରେ ତିନି ଦିନିଆ ଜାତୀୟ କର୍ମଶାଳାରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହା କହିଛନ୍ତି ।
ସେ କହିଛନ୍ତି ଯେ ବର୍ତ୍ତମାନ ପ୍ରତ୍ୟେକ ଜିଲ୍ଲାରେ ସ୍କିଲ ମ୍ୟାପିଂର କାର୍ଯ୍ୟ ଜିଲ୍ଲାପାଳ ମାନଙ୍କର ତତ୍ୱାବଧାନରେ ଚାଲିଛି । ଏହି କାର୍ଯ୍ୟରେ ସମସ୍ତ ସରପଞ୍ଚ, ବ୍ଲକ ଚେୟାରମ୍ୟାନ ତଥା ଜିଲ୍ଲା ପରିଷଦର ସଦସ୍ୟ ମାନଙ୍କୁ ସହଯୋଗ ପ୍ରଦାନ କରିବାକୁ କେନ୍ଦ୍ର ମନ୍ତ୍ରୀ ଶ୍ରୀ ପ୍ରଧାନ ନିବେଦନ କରିଛନ୍ତି ।
ସୂଚନାଯୋଗ୍ୟ ଭାରତ ସରକାରଙ୍କ ପଞ୍ଚାୟତିରାଜ ମନ୍ତ୍ରଣାଳୟ, ପଞ୍ଚାୟତିରାଜ ଏବଂ ପାନୀୟ ଜଳ ବିଭାଗ, ଓଡ଼ିଶା ସରକାର ଏବଂ ରାଜ୍ୟ ଗ୍ରାମ୍ୟ ଉନ୍ନୟନ ଓ ପଞ୍ଚାୟତିରାଜ (ଏସଆରଆରଡି ଏବଂ ପିଆର), ଓଡ଼ିଶାର ସହଯୋଗରେ ଥିମ୍ ୩ : ଶିଶୁ ଅନୁକୂଳ ଗ୍ରାମ ଓ ଥିମ୍ ୯ : ମହିଳା ଅନୁକୂଳ ଗ୍ରାମର ବିଷୟଗତ ନୀତି ଗ୍ରହଣ କରି ଗ୍ରାମ ପଞ୍ଚାୟତରେ ନିରନ୍ତର ବିକାଶ ଲକ୍ଷ୍ୟର ଲୋକାଲାଇଜେସନ ଉପରେ ଜାତୀୟ କର୍ମଶାଳା ଭୁବନେଶ୍ୱର ଠାରେ ଆଜି ଠାରୁ ଆରମ୍ଭ ହୋଇଛି।