ଆସନ୍ତାକାଲି ପଞ୍ଚାୟତ ସମିତି ଅଧ୍ୟକ୍ଷା ନିର୍ବାଚନ: ଅଜ୍ଞାତ ବାସରୁ ଫେରି ନିର୍ବାଚନରେ ଭାଗ ନେବେ ସମିତି ସଭ୍ୟ ଓ ସଭ୍ୟା

ଲକ୍ଷ୍ମୀପୁର: ଶନିବାର ଲକ୍ଷ୍ମୀପୁରରେ ଅନୁଷ୍ଠିତ ହେବ ପଞ୍ଚାୟତ ସମିତି ଅଧ୍ୟକ୍ଷା ନିର୍ବାଚନ। ହେଲେ ଗତ ୨୭ ତାରିଖ ନିର୍ବାଚନ ଫଳାଫଳ ଘୋଷଣା ପରେ ଅଜ୍ଞାତ ବାସରେ ଯାଇଛନ୍ତି ସମିତି ସଭ୍ୟ ଓ ସଭ୍ୟାମାନେ। ଆଶାୟୀ ଥିବା ପ୍ରାର୍ଥୀମାନଙ୍କ ପକ୍ଷରୁ ନବନିର୍ବାଚିତ ସମିତି ସଭ୍ୟ ଓ ସଭ୍ୟାମାନଙ୍କୁ ନିଆଯାଇ ଅଜ୍ଞାତ ବାସରେ ରଖାଯାଇଛି। ତେବେ ଆସନ୍ତା କାଲି ନିର୍ବାଚନ ହେବାକୁ ଥିବାରୁ କାଲି ସକାଳେ ସିଧାସଳଖ ଆସି ନିର୍ବାଚନ ଅଧିକାରୀଙ୍କ ନିକଟରେ ଉପସ୍ଥିତ ହୋଇ ଭୋଟରେ ଭାଗନେଇ ଉକ୍ତ ନିର୍ବାଚିତ ପ୍ରତିନିଧିମାନେ ସମିତି ସଭ୍ୟାଙ୍କୁ ଅଧ୍ୟକ୍ଷା ଭାବେ ବାଛିବାକୁ ସ୍ଥିର ହୋଇଛି ।

ଏହି ପ୍ରରିପ୍ରେକ୍ଷୀରେ କୋରାପୁଟ ଜିଲା ଲକ୍ଷ୍ମୀପୁର ବ୍ଲକରେ ଶାସକ ଦଳ ପକ୍ଷରୁ ପ୍ରାୟ ୯ ଜଣ ସମିତିସଭ୍ୟ, ସଭ୍ୟାମାନଙ୍କୁ ନିର୍ବାଚନ ପରେ ବିଭିନ୍ନ ଲଜରେ ରଖାଯିବା ସହିତ ଦର୍ଶନୀୟ ସ୍ଥାନ ବୁଲାଯାଉଥିଲା। ଶନିବାର ଅଧ୍ୟକ୍ଷା ନିର୍ବାଚନ ଥିବାରୁୁ ସକାଳୁ ସିଧାସଳଖ ଆସି ସେମାନେ ନିର୍ବାଚନ ଅଧିକାରୀଙ୍କ ନିକଟରେ ଉପସ୍ଥିତ ହେବା ସହିତ ଜନୈକ ପୂର୍ବତ୍ତନ ପଞ୍ଚାୟତ ସମିତି ଅଧ୍ୟକ୍ଷାଙ୍କ ସପକ୍ଷରେ ଭୋଟ ଦେଇ ନିର୍ବାଚିତ କରିବା ପାଇଁ ସମସ୍ତ ପଥ ପରିଷ୍କାର ହୋଇଥିବା ଜଣାପଡିଛି। ତେବେ କେବଳ ଜଣେ ମାତ୍ର ପ୍ରାର୍ଥୀ ଅଧ୍ୟକ୍ଷା ଦୌଡରେ ଅଛନ୍ତି ନା ଆଉ କେଉଁମାନେ ଭାଗ ନେଉଛନ୍ତି ତାହା ଆସନ୍ତାକାଲି ସ୍ପଷ୍ଟ ହୋଇଯିବ ।