ଝୁମ୍ପୁରା: କୋରମ ଅଭାବରୁ ବାତିଲ ହେଲା ଖୁଣ୍ଟାପଡା ପଞ୍ଚାୟତର ନାଏବ ସରପଞ୍ଚ ନିର୍ବାଚନ। ତ୍ରିସ୍ତରୀୟ ପଞ୍ଚାୟତ ନିର୍ବାଚନ ସରିବା ପରେ ମାର୍ଚ୍ଚ ୧୧ ତାରିଖ ଦିନ ନାଏବ ସରପଞ୍ଚ ନିର୍ବାଚନ ଅନୁଷ୍ଠିତ ହେବାକୁ ଦିନ ଧାର୍ଯ୍ୟ ହୋଇଥିଲା। ଝୁମ୍ପୁରା ବ୍ଲକର ୨୨ ଗୋଟି ପଞ୍ଚାୟତର ନାଏବ ସରପଞ୍ଚ ପଦବୀ ନିମନ୍ତେ ଶୁକ୍ରବାର ନିର୍ବାଚନ କରିବା ପାଇଁ ବ୍ଲକ ନିର୍ବାଚନ ଅଧିକାରୀ ସ୍ଥିର କରିବା ସହିତ ପ୍ରତି ପଞ୍ଚାୟତର ମୁଖ୍ୟାଳୟରେ ବ୍ଲକ ନିର୍ବାଚନ ଅଧିକାରୀ ପଦାଧିକାରୀମାନଙ୍କୁ ନିଯୁକ୍ତି କରିଥିଲେ। ଏହି ବ୍ଲକର ଖୁଣ୍ଟାପଡା ପଞ୍ଚାୟତର ନାଏବ ସରପଞ୍ଚ ନିର୍ବାଚନ କରିବା ପାଇଁ ବ୍ଲକ ତରଫରୁ ପଦ୍ମଲୋଚନ ଜେନାକୁ ନିର୍ବାଚନ ପରିଚାଳନା କରିବା ପାଇଁ ଦାୟିତ୍ୱ ପ୍ରଦାନ କରିଥିଲେ। ସଂପୃକ୍ତ ଅଧିକାରୀ ପୂର୍ବାହ୍ନ ୧୦ ଘଟିକା ସମୟରେ ପଞ୍ଚାୟତ କାର୍ଯ୍ୟାଳୟରେ ଉପସ୍ଥିତ ରହିଥିଲେ। ଏହି ପଞ୍ଚାୟତର ୧୩ ଗୋଟି ୱାର୍ଡ ରହିଛି ସେଥିମଧ୍ୟରୁ ୧୧ ଗୋଟି ୱାର୍ଡରେ ୱାର୍ଡ ସଭ୍ୟ ନିର୍ବାଚିତ ହୋଇଥିବା ବେଳେ ୨ ଟି ୱାର୍ଡରେ କୌଣସି ପ୍ରାର୍ଥି ହୋଇ ନଥିବାରୁ ଉକ୍ତ ଦୁଇଟି ୱାର୍ଡର ୱାର୍ଡ ସଭ୍ୟପଦ ଏବେ ମଧ୍ୟ ଖାଲି ପଡିଛି। ନାଏବ ସରପଞ୍ଚ ପଦବୀ ନିମନ୍ତେ ଶୁକ୍ରବାର ପଞ୍ଚାୟତ ପରିସର ମଧ୍ୟରେ ନିର୍ବାଚନ ଅନୁଷ୍ଠିତ ହେବାର ଥିଲା। କିନ୍ତୁ ନିର୍ବାଚିତ ହୋଇଥିବା ୱାର୍ଡ ସଭ୍ୟମାନଙ୍କ ମଧ୍ୟରୁ ସରକାରଙ୍କ ନିୟମ ଅନୁସାରେ ୫୦ ପ୍ରତିଶତ ସଭ୍ୟ ଉପସ୍ଥିତ ରହିଲେ ନିର୍ବାଚନ ଅନୁଷ୍ଠିତ କରିବାର ନିୟମ ରହିଛି। କିନ୍ତୁ ନିୟମ ଅନୁସାରେ ନିର୍ବାଚନ ପାଇଁ ଯେତିକି ସଭ୍ୟ ଉପସ୍ଥିତ ରହିବା କଥା ସେତିକି ସଭ୍ୟ ନିର୍ବାଚନ ସ୍ଥାନରେ ଅନୁପସ୍ଥିତ ରହିଥିବାରୁ ଦାୟିତ୍ୱରେ ରହିଥିବା ଅଧିକାରୀ ନାଏବ ସରପଞ୍ଚ ନିର୍ବାଚନକୁ କୋରମ ଅଭାବରୁ ସ୍ଥଗିତ କରି ଫେରିଯାଇଥିବା ଦେଖିବାକୁ ମିଳିଥିଲା।
Comments are closed.