ନୂଆଦିଲ୍ଲୀ: କୋଭିଡ୍ ଅନେକ ଭାରତୀୟ ଧନୀଙ୍କ ପାଇଁ ଶୁଭଙ୍କର ସାବ୍ୟସ୍ତ ହୋଇଛି। କାରଣ ଏହି ସମୟରେ ଭାରତୀୟ ଅତିଧନୀଙ୍କ ସମ୍ପତ୍ତି ପରିମାଣରେ ୨୦% ବୃଦ୍ଧି ଘଟିଥିବା ଜଣାଯାଇଛି। ଆଇଆଇଏଫ୍ଏଲ୍ ହୁରୁନ୍ ଧନୀ ତାଲିକାନୁଯାୟୀ, ୧୦୦୦ କୋଟି ଟଙ୍କାରୁ ଅଧିକ ସମ୍ପତ୍ତିଧାରୀ ଧନୀ ବ୍ୟକ୍ତିଙ୍କ ସଂଖ୍ୟା ବଢ଼ିବାରେ ଲାଗିଛି। ସୂଚୀ ଅନୁଯାୟୀ, ଚଳିତ ବର୍ଷ ୧୦୦୦ କୋଟି ଟଙ୍କାରୁ ଅଧିକ ସମ୍ପତ୍ତିଧାରୀ ଏହି ଧନୀ ବ୍ୟକ୍ତିଙ୍କ ସଂଖ୍ୟାରେ ପୂର୍ବବର୍ଷ ତୁଳନାରେ ୯୪ ବୃଦ୍ଧି ଘଟି ୮୨୮ରେ ପହଞ୍ଚିଛି।
ଏହି ୮୨୮ ଅତି ଧନୀ ବ୍ୟକ୍ତିଙ୍କ ମୋଟ ସମ୍ପତ୍ତି ପରିମାଣ ୮୨୧ ବିଲିୟନ୍ ଡଲାର (୬୦,୫୯,୫୦୦ କୋଟି ଟଙ୍କା)। ୨୦୧୯ରେ ୧୦୦୦ କୋଟି ଟଙ୍କାରୁ ଅଧିକ ସମ୍ପତ୍ତିଧାରୀ ଏହି ଅତିଧନୀଙ୍କ ସମ୍ପତ୍ତି ପରିମାଣ ୧୪୦ ବିଲିୟନ୍ ଡଲାର (୧୦,୨୯,୪୦୦ କୋଟି ଟଙ୍କା) ରହିଥିଲା। ଫ୍ଲିପକାର୍ଟର ପୂର୍ବତନ କାର୍ୟ୍ୟନିର୍ବାହୀ ଆମୋଦ ମାଲବ୍ୟ, ସୁଜିତ୍ କୁମାର ଏବଂ ବୈଭବ ଗୁପ୍ତା ନିଜର ନୂଆ ଉଦ୍ୟୋଗ ତଥା ବି-ଟୁ-ବି ଇ-କମର୍ସ ପୋର୍ଟାଲ ଉଡାନ୍ର ସଫଳତା ପାଇଁ ସମ୍ପତ୍ତିରେ ୨୭୪% ବୃଦ୍ଧି ଘଟାଇଛନ୍ତି। ଉଡାନ୍ର ବଜାର ପୁଞ୍ଜି ୨୦୧୯ ଅକ୍ଟୋବରରେ ୨୦,୦୦୦ କୋଟି ଟଙ୍କା ରହିଥିବା ବେଳେ ୨୦୨୦ ଫେବୃଆରୀରେ ଏହା ୫୨,୫୦୦ କୋଟି ଟଙ୍କାକୁ ବୃଦ୍ଧି ଘଟିଛି।
