ଖଲ୍ଲିକୋଟ: କମାରସିଂ ଛକରେ ଯୁବକଙ୍କୁ ସଂଘବଦ୍ଧ ଆକ୍ରମଣ। ସାଙ୍ଗ ସହ ବାଇକରେ ଫେରୁଥିବାବେଳେ ମରଣାନ୍ତକ ଆକ୍ରମଣ। ପୂର୍ବ ଶତ୍ରୁତାର ଛୁରୀ ଭୁସିବା ସହ ଖଣ୍ଡାରେ ହାଣିଲେ ୫ ଦୁର୍ବୁତ୍ତ। ଗୁରୁତର ଅବସ୍ଥାରେ ଯୁବକ ବ୍ରହ୍ମପୁର ସ୍ଥାନାନ୍ତର ହୋଇଥିବା ସୂଚନା ମିଳିଛି।
ମିଳିଥିବା ସୂଚନା ଅନୁଯାୟୀ ଗଞ୍ଜାମ ଜିଲା ଖଲ୍ଲିକୋଟ ଥାନା କମାର ସିଂହ ଗ୍ରାମ ନିକଟରେ ଦୁଇ ବନ୍ଧୁ ବାଇକ୍ରେ ଯାଉଥିବାବେଳେ ହଠାତ୍ ବାଟରେ ୫ ଜଣ ଦୁର୍ବୃତ୍ତ ମାରଣାସ୍ତ୍ର ଦେଖାଇ ଗାଡ଼ି ଅଟକାଇଥିଲେ। ଜୀବନ ବଞ୍ଚାଇବା ପାଇଁ ବାଇକ୍ ପଛରେ ବସିଥିବା ବନ୍ଧୁ ଘଟଣାସ୍ଥଳରୁ ପଳାଇଯାଥିଲା। ତେବେ ବାଇକ୍ ଚଳାଉଥିବା ଅନ୍ୟ ଜଣେ ବନ୍ଧୁ ଖସି ପାରି ନ ଥିଲେ। ସେମାନେ ତାଙ୍କୁ ଗୋଡ଼ାଇ ଗୋଡ଼ାଇ ମାଡ଼ ମାରିବା ପରେ ଛୁରୀରେ ଭୁଷି ଦେଇଥିଲେ। ଏହାସହିତ ଖଣ୍ଡାରେ ହାତକୁ ହାଣି ଦେଇଥିବା ଅଭିଯୋଗ ହୋଇଛି। ଆକ୍ରମଣରେ ଗୁରୁତର ଯୁବକ ଜଣକ ହେଉଛନ୍ତି ଖଲ୍ଲିକୋଟ ଥାନା ବାକୁଟୁ ଗାଁ’ର ଆଲୋକ ସାହୁ। ସଂଜ୍ଞାହୀନ ଅବସ୍ଥାରେ ତାଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଯାଇଛି।
ଆଲୋକ ସାହୁ ଓ ତା’ର ବନ୍ଧୁ କାର୍ତ୍ତିକ ନାହାକ ସହ ଆଜି ସକାଳୁ ବାଇକ ଯୋଗେ ବାଦପଲ୍ଲୀରୁ ନିଜ ଗାଁ’କୁ ଫେରୁଥିଲେ। କମାର ସିଂ ଗ୍ରାମ ନିକଟରେ ପୂର୍ବରୁ ଛକି ରହିଥିବା ପ୍ରାୟ ୫ ଜଣ ଦୁର୍ବୃତ୍ତ ଖଣ୍ଡା ଓ ଛୁରୀ ଧରି ସେମାନଙ୍କୁ ଅଟକାଇଥିଲେ। ବାଇକ ପଛରେ ବସିଥିବା କାର୍ତ୍ତିକ ଖସି ପଳାଇବାରେ ସକ୍ଷମ ହୋଇଥିବାବେଳେ ଆଲୋକ ଆକ୍ରମଣର ଶିକାର ହୋଇଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି।
