କେନ୍ଦୁଝରଗଡ଼: ମୋହନ ଚରଣ ମାଝୀ ମୁଖ୍ୟମନ୍ତ୍ରୀ ହେବା ପୂର୍ବରୁ ୩ଥର ସଦର ବିଧାୟକ ଭାବେ ନିର୍ବାଚିତ ହୋଇଥିଲେ। ବିଧାୟକ କାର୍ଯ୍ୟକାଳରେ ଶ୍ରୀ ମାଝୀଙ୍କ ଛାଇ ମାଡୁନଥିବା ନିଜ ନିର୍ବାଚନମଣ୍ଡଳୀ ଓ ଜିଲାର କେତେକ ଅନ୍ୟ ଦଳର ନେତା ମୋହନ ମୁଖ୍ୟମନ୍ତ୍ରୀ ହେବାପରେ ଏବେ ଭୁବନେଶ୍ୱର ଗସ୍ତ କରି ତାଙ୍କୁ ଭେଟି ପୁଷ୍ପଗୁଛ ଦେଇ ସମ୍ବର୍ଦ୍ଧନା ଜଣାଇବା ସହ ଫଟୋ ଉଠାଇ ସାମାଜିକ ଗଣମାଧ୍ୟମରେ ପୋଷ୍ଟ କରି ମୁଖ୍ୟମନ୍ତ୍ରୀଙ୍କ ପାଖ ଲୋକ ବୋଲାଇବା ଏବେ ଜିଲାବ୍ୟାପୀ ଚର୍ଚ୍ଚାର ବିଷୟ ହୋଇଛି।
ଏଭଳିସ୍ଥିତିରେ ସଦ୍ୟ ସମାପ୍ତ ସାଧାରଣ ନିର୍ବାଚନରେ ମୋହନଙ୍କ ବିରୋଧରେ ସ୍ୱାଧିନପ୍ରାର୍ଥୀ ଭାବେ ପ୍ରତିଦ୍ୱନ୍ଦିତା କରିଥିବା ପୂର୍ବତନ ସଦର ବ୍ଲକ ଅଧ୍ୟକ୍ଷା ତଥା ଶିରିଷପାଳ ପଞ୍ଚାୟତର ସମିତିସଭ୍ୟା ସଶ୍ମୀତାରାଣୀ ସିଂହଙ୍କ ନେତୃତ୍ୱରେ ସଦର ବ୍ଲକ ଅଧିନ ପଳାଶପଙ୍ଗା, ପର୍ଜନପୁର, କଣ୍ଡରାପଶି, ରାଇକଳା, ହାଣ୍ଡିଭଙ୍ଗା, ନୂଆଗାଁ, ବରଦାପାଳ, ମହାଦେଇଯୋଡା, ରାଇସୁଆଁ, ଗୋପୀନାଥପୁର, ବୋଦାପଳସା, ନରଣପୁର, ଜନାର୍ଦ୍ଦନପୁର, ନେଲୁଙ୍ଗ, ଗୋବର୍ଦ୍ଧନ, କାଠବାରୀ ଓ ବାଉରିପଦା ପଞ୍ଚାୟତକୁ ମିଶାଇ ୧୮ଜଣ ସମିତିସଭ୍ୟ ସଭ୍ୟା ଚଳିତମାସ ୧ ତାରିଖ ଭୁବନେଶ୍ୱର ଗସ୍ତ କରି ମୁଖ୍ୟମନ୍ତ୍ରୀଙ୍କୁ ଭେଟି ସ୍ୱାଗତ ଜଣାଇବା ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିବା ଜଣାପଡିଛି।
ସେଥିମଧ୍ୟରୁ ସଦର ବ୍ଲକର ଅଧ୍ୟକ୍ଷା ଜ୍ୟୋର୍ତିମୟୀ ନାଏକଙ୍କ ବିରୋଧରେ ସଦର ବ୍ଲକର ୨୫ଜଣ ସମିତିସଭ୍ୟଙ୍କ ମଧ୍ୟରୁ ୧୮ଜଣ ସମିତସଭ୍ୟ ସଭ୍ୟା ନିଜ ନିଜର ଅସନ୍ତୋଷ ମୁଖ୍ୟମନ୍ତ୍ରୀଙ୍କ ସମ୍ମୁଖରେ ଉପସ୍ଥାପନ କରିବା ସହ ତାଙ୍କୁ କିଭଳି ଅନାସ୍ଥାପ୍ରସ୍ତାବ ଅଗାତ କରାଯାଇ ଗାଦିଚ୍ୟୁତ କରାଯିବ ସେ ସମ୍ପର୍କରେ ମଧ୍ୟ ଆଲୋଚନା କରାଯାଇଥିବା ପଳାଶପଙ୍ଗା ସମିତିସଭ୍ୟ ସଞ୍ଜୟ କୁମାର ନାଏକ କହିଛନ୍ତି।
ସୂଚନାଯୋଗ୍ୟ ଯେ, ଜ୍ୟୋର୍ତିମୟୀ ନାଏକ ଗତ ପଞ୍ଚାୟତ ନିର୍ବାଚନରେ କାଉଁରିକଳା ପଞ୍ଚାୟତ ସମିତିସଭ୍ୟା ଭାବେ ବିଜୟୀ ହେବାପରେ ସଦର ବ୍ଲକ ଅଧ୍ୟକ୍ଷା ଭାବେ ନିଦ୍ୱର୍ନ୍ଦରେ ନିର୍ବାଚିତ ହୋଇଥିଲେ। ସଦ୍ୟ ସମାପ୍ତ ସାଧାରଣ ନିର୍ବାଚନ ପରେ ରାଜ୍ୟରେ ରାଜନୈତିକ ପଟପରିବର୍ତ୍ତନ ହେବା ପରଠାରୁ ବିଶେଷକରି କେନ୍ଦୁଝର ସଦର ବିଧାୟକ ମୋହନ ଚରଣ ମାଝୀ ମୁଖ୍ୟମନ୍ତ୍ରୀ ହେବାପରେ କେନ୍ଦୁଝର ଜିଲାରେ କ୍ଷମତାସୀନ ବିଜେଡି ସମର୍ଥୀତ ନେତାଙ୍କ ବିରୋଧରେ କିଭଳି ଅନାସ୍ଥାପ୍ରସ୍ତାବ ଆଗତ କରି କ୍ଷମତାଚ୍ୟୁତ କରାଯିବ ସେ ନେଇ ରାଜନୈତିକ ଗୋଟିଚାଳନା ଆରମ୍ଭ ହୋଇଥିବା ନେଇ ଚର୍ଚ୍ଚା ଜୋର ଧରିଛି।
