କେନ୍ଦୁଝରଗଡ: ଆଦିବାସୀ କଳା ଓ ସଂସ୍କୃତିର ପ୍ରଚାର ପ୍ରସାର ପାଇଁ ସ୍ୱତନ୍ତ୍ର ଉନ୍ନୟନ ପରିଷଦ କେନ୍ଦୁଝର ଆନୁକୂଲ୍ୟରେ କେନ୍ଦୁଝର ଷ୍ଟାଡିୟମ ପଡିଆରେ ୩ଦିନ ଧରି ଚାଲିଥିବା ଆଦି ମହୋତ୍ସବ ସୋମବାର ଉଦଯାପିତ ହୋଇଯାଇଛି। ସମନ୍ୱିତ ଆଦିବାସୀ ଉନ୍ନୟନ ସଂସ୍ଥା କେନ୍ଦୁଝରର ପ୍ରକଳ୍ପ ପ୍ରଶାସକ ତପନ କୁମାର ନାଏକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆୟୋଜିତ ୩ଦିନବ୍ୟାପୀ ଏହି କାର୍ଯ୍ୟକ୍ରମର ଉଦଯାପନୀ ଦିବସ ପରିପ୍ରେକ୍ଷୀରେ ସୋମବାର ସକାଳୁ ଆଦିବାସୀ ଯୁବକ ଯୁବତୀଙ୍କୁ ନେଇ ଜିଲାପାଳ କାର୍ଯ୍ୟାଳୟରୁ ପୁରୁଣାବଜାର ବଳଦେବଜୀଉ ମନ୍ଦିର ପର୍ଯ୍ୟନ୍ତ ଗଣଦୌଡ ଅନୁଷ୍ଠିତ ହୋଇଥବଲା।
ଏହି ଗଣଦୌଡରେ ପୁରୁଷ ବର୍ଗରେ ସଞ୍ଜୟ ହାଁସଦା, କ୍ଷୀରୋଦ ଚନ୍ଦ୍ର ହାଁସଦା ଓ ବୀରସିଂ ମାଝୀ ଏବଂ ମହିଳା ବର୍ଗରେ ମଞ୍ଜୁ ମୁଣ୍ଡା, ସୁଖୀ ବାସ୍କେ ଓ ଲିଲି ମାଝୀ ଯଥାକ୍ରମେ ପ୍ରଥମ, ଦ୍ୱିତୀୟ ଓ ତୃତୀୟ ସ୍ଥାନ ଅଧିକାର କରିଛନ୍ତି। ଏହି ଗଣଦୌଡରେ ପ୍ରଥମ ସ୍ଥାନ ଅଧିକାର ପ୍ରତିଯୋଗୀଙ୍କୁ ୫୦୦୦୦ଟଙ୍କା, ଦ୍ୱିତୀୟ ସ୍ଥାନ ଅଧିକାର କରିଥିବା ପ୍ରତିଯୋଗୀଙ୍କୁ ୩୦୦୦୦ ଏବଂ ତୃତୀୟ ସ୍ଥାନ ଅଧିକାର କରିଥିବା ପ୍ରତିଯୋଗୀଙ୍କୁ ୨୦୦୦୦ ଟଙ୍କା ଆର୍ôଥକ ରାଶି ପୁରସ୍କାର ସ୍ୱରୂପ ପ୍ରଦାନ କରାଯାଇଥିଲା।
ଜିଲା ଯୋଜନା ବୋର୍ଡ ଅଧ୍ୟକ୍ଷ ତଥା ପାଟଣା ବିଧାୟକ ଜଗନ୍ନାଥ ନାଏକ, ସ୍ୱତନ୍ତ୍ର ଉନ୍ନୟନ ପରିଷଦ କେନ୍ଦୁଝରର ଅଧ୍ୟକ୍ଷା ସୁଶ୍ରୀ ଲକ୍ଷ୍ମୀ ନାଏକ, ସ୍ୱତନ୍ତ୍ର ଉନ୍ନୟନ ପରିଷଦ କେନ୍ଦୁଝରର ଉପାଧ୍ୟକ୍ଷ ନାରାୟଣ ପୂର୍ତ୍ତି ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ଏହି ପରିପ୍ରେକ୍ଷୀରେ ଶଙ୍କରପୁରସ୍ଥିତ ଧରଣୀଧର ସ୍ପୋର୍ଟସ କମ୍ପେ୍ଲକ୍ସରେ ଏକ ବନ୍ଧୁତ୍ୱପୂର୍ଣ୍ଣ ଫୁଟବଲ ମ୍ୟାଚ୍ ଅନୁଷ୍ଠିତ ହୋଇଥିଲା। ସୂଚନାଯୋଗ୍ୟ ଯେ, ଉଦଘାଟନୀ ଦିବସରେ ଜିଲାର ୧୩ ବ୍ଲକରୁ ୨୬ଟି ଆଦିବାସୀ ନୃତ୍ୟ ଦଳଙ୍କ ମଧ୍ୟରେ ପ୍ରତିଯୋଗିତା ଆୟୋଜନ ହୋଇଥିଲା।
ଉକ୍ତ ପ୍ରତିଯୋଗିତାରେ ସାଙ୍ଗେ ସୁସୁଙ୍ଗେ ଆଦିବାସୀ ହୋ ଡ୍ୟାନ୍ସ ଗ୍ରୁପ୍ କଣିଆ ପ୍ରଥମ, ଗିରିଧାରୀ ହୋ କମ୍ୟୁନିଟି ଚମ୍ପୁଆ ଦ୍ୱିତୀୟ ଓ ବିର୍ସା ମୁଣ୍ଡା ହୋ ଡ୍ୟାନ୍ସ ଟ୍ରୁପ, ଦୈତାରୀ ତୃତୀୟ ସ୍ଥାନ ଅଧିକାର କରି ଯଥାକ୍ରମେ ୫୦ହଜାର, ୩୦ହଜାର ଓ ୨୦ହଜାର ଟଙ୍କା ପୁରସ୍କାର ଗ୍ରହଣ କରିଥିଲେ। ରବିବାର ମହୋତ୍ସବର ଦ୍ୱିତୀୟ ଦିନରେ ସ୍ୱତନ୍ତ୍ର ଉନ୍ନୟନ ପରିଷଦର ରାଜ୍ୟ ଉପଦେଷ୍ଟା ତଥା ପୂର୍ବତନ ସାଂସଦ ପ୍ରଦୀପ ମାଝୀ ଓ କେନ୍ଦୁଝର ସାଂସଦ ଚନ୍ଦ୍ରାଣି ମୁର୍ମୁ ଆୟୋଜିତ ସଭାରେ ଯୋଗଦେଇ ଆଦିବାସୀ ମାନଙ୍କ ପାଇଁ ରାଜ୍ୟ ସରକାର ପ୍ରଣୟନ କରିଥିବା ବିଭିନ୍ନ ଉନ୍ନୟନମୂଳକ ଯୋଜନା ସମ୍ପର୍କରେ ଅବଗତ କରିବା ସହ ଏହାର ସୁଫଳ ନେବାକୁ ଆହ୍ୱାନ ଦେଇଥିଲେ। କେନ୍ଦୁଝର ବୁଦ୍ଧିଜୀବୀ ମହଲରେ ଏହି କାର୍ଯ୍ୟକ୍ରମ ବେଶ୍ ପ୍ରଶଂସିତ ହୋଇପାରିଛି।
Comments are closed.